მათეს სახარება
15 მაშინ იერუსალიმიდან იესოსთან ჩავიდნენ ფარისევლები და მწიგნობრები,+ და უთხრეს: 2 „რატომ არღვევენ შენი მოწაფეები წინაპართა ადათ-წესებს? რატომ არ იბანენ ჭამის წინ ხელებს?*“+
3 მან კი მიუგო: «თქვენ რატომღა არღვევთ ღვთის მცნებებს თქვენი ადათ-წესებით?+ 4 ღმერთმა თქვა, პატივი ეციო მამას და დედას,+ და მამის ან დედის მლანძღველი მოკვდესო.+ 5 თქვენ კი ამბობთ: „ის, ვინც მამას ან დედას ეტყვის, ჩემი ქონება, რითაც უნდა მერჩინე, ღვთისთვის განკუთვნილი ძღვენიაო,+ 6 ვალდებული აღარ არის, პატივი სცეს თავის მამას“. ასე თქვენ თქვენივე ადათ-წესებით გააუფასურეთ ღვთის სიტყვა.+ 7 თქვე თვალთმაქცებო, რა ზუსტად იწინასწარმეტყველა ესაიამ თქვენზე:+ 8 „ეს ხალხი ბაგით მადიდებს, გულით კი შორს არიან ჩემგან. 9 ტყუილუბრალოდ მცემენ თაყვანს, რადგან ადამიანთა მოგონილ წესებს მცნებად უდებენ ხალხს“».+ 10 თავისთან მოიხმო ხალხი და უთხრა: „მოისმინეთ და ჩასწვდით ნათქვამის აზრს:+ 11 ადამიანს ის კი არ ბილწავს, რაც პირში შედის, არამედ ის, რაც პირიდან გამოდის“.+
12 მაშინ მოწაფეები მივიდნენ მასთან და უთხრეს: „იცი, რომ შენმა ნათქვამმა ფარისევლები დააბრკოლა?“+ 13 მან მიუგო: „ყოველი ნერგი, რომელიც ჩემს ზეციერ მამას არ დაურგავს, ამოიძირკვება. 14 თავი დაანებეთ მათ, ბრმა მეგზურები არიან. თუ ბრმას ბრმა მიუძღვის, ორივე ორმოში ჩავარდება“.+ 15 ამაზე პეტრემ უთხრა: „განგვიმარტე შენი ნათქვამი!“ 16 იესომ უთხრა: „ნუთუ აქამდე ვერც თქვენ მიხვდით?!+ 17 ნუთუ არ იცით, რომ ყველაფერი, რაც პირში შედის, მუცელს გაივლის და გარეთ გამოდის?! 18 პირიდან კი ის გამოდის, რაც გულშია, და ეს ბილწავს კაცს.+ 19 მაგალითად, გულიდან მოდის: ბოროტი აზრები,+ მკვლელობა, მრუშობა, უზნეობა*, ქურდობა, ცრუმოწმეობა და მკრეხელობა; 20 სწორედ ეს ბილწავს ადამიანს და არა დაუბანელი ხელებით ჭამა“.
21 იქიდან იესომ ტვიროსისა და სიდონის მხარეებს მიაშურა.+ 22 იქ ერთი ფინიკიელი ქალი მივიდა მასთან და შეღაღადა: „შემიწყალე, უფალო, დავითის ძეო! ჩემს ქალიშვილს საშინლად ტანჯავს დემონი“.+ 23 იესოს სიტყვაც არ დაუძრავს. მაშინ მივიდნენ მასთან მოწაფეები და სთხოვეს: „უთხარი ამ ქალს, თავი დაგვანებოს, თორემ მოგვდევს და მოგვყვირის“. 24 მან მიუგო: „მე მხოლოდ ისრაელის დაკარგულ ცხვრებთან ვარ გამოგზავნილი“.+ 25 ქალი კი მიუახლოვდა, მის წინაშე დაემხო და უთხრა: „უფალო, დამეხმარე!“ 26 იესომ მიუგო: „ვის გაუგია, შვილებს წაართვა პური და ფინიებს გადაუგდო?!“ 27 „ჰო, უფალო, მაგრამ ფინიებიც ხომ ჭამენ თავიანთი პატრონების სუფრიდან ჩამოცვენილ ნამცეცებს“, — უთხრა ქალმა.+ 28 იესომ მიუგო: „დიდი რწმენა გქონია, შეგისრულდეს სურვილი!“, და მაშინვე განიკურნა მისი ქალიშვილი.
29 იქიდან წამოსული გალილეის ზღვას მიადგა,+ მთაზე ავიდა და იქ დაჯდა. 30 მივიდა მასთან დიდძალი ხალხი, მიიყვანეს კოჭლები, ხეიბრები, უსინათლოები, მუნჯები და მრავალი სხვა სნეულიც; ფეხებთან უწვენდნენ მათ იესოს და ისიც ყველას კურნავდა.+ 31 ხალხი გაოცებული იყო და განადიდებდა ისრაელის ღმერთს, რადგან ხედავდნენ, რომ მუნჯები ალაპარაკდნენ, ხეიბრები გამოჯანსაღდნენ, კოჭლებმა გაიარეს და უსინათლოებს თვალები აეხილათ.+
32 იესომ მოწაფეებს მოუხმო და უთხრა: „გული მეწვის ამ ხალხის შემხედვარეს,+ უკვე სამი დღეა, ჩემთან არიან და საჭმელიც გამოელიათ. არ მინდა უჭმელად გავუშვა, გზაში რომ არ დაუძლურდნენ“.+ 33 მოწაფეებმა კი უთხრეს: „ამ მივარდნილ ადგილას სად ვიშოვოთ ამდენი ხალხის სამყოფი პური?“+ 34 იესომ ჰკითხა მათ: „რამდენი პური გაქვთ?“ მათ მიუგეს: „შვიდი, და რამდენიმე პატარა თევზი“. 35 მაშინ ხალხს უბრძანა, მიწაზე დამსხდარიყვნენ. 36 აიღო ის შვიდი პური და თევზები, ღმერთს მადლობა შესწირა, დატეხა და მოწაფეებს მისცა, მოწაფეებმა კი ხალხს ჩამოურიგეს.+ 37 ყველა კარგად დანაყრდა, მორჩენილი ნატეხებით კი შვიდი გოდორი გაავსეს.+ 38 თუ არ ჩავთვლით ქალებსა და ბავშვებს, 4 000-მა კაცმა ჭამა. 39 ბოლოს, ხალხი რომ გაუშვა, იესო ნავში ჩაჯდა და მაგდალის მხარეში მივიდა.+