შეუძლიათ მკვდრებს ცოცხლების დახმარება?

სამხრეთ აფრიკაში მცხოვრებ ტამბას სკოლაში გამოცდა უნდა ჩაებარებინა.a დედამისმა დაიჟინა, რომ გამოცდის წარმატებით ჩასაბარებლად მას მკვდარი ნათესავებისთვის დახმარება უნდა ეთხოვა. პალერმოში (სიცილია) ტურისტები ხშირად სტუმრობენ მიწისქვეშა სამარხს, სადაც ასობით გვამი ინახება. ზოგს სწამს, რომ ეს მუმიფიცირებული გვამები ცოცხლებს ზებუნებრივ დახმარებას აღმოუჩენენ. ყოველ წელს ნიუ-იორკის შტატის დასავლეთით მდებარე ქალაქ ლილი-დეილში უამრავი ადამიანი ჩადის, რადგან იციან, რომ იქ ძალიან ბევრი მედიუმი ცხოვრობს. მათ იმედი აქვთ, რომ კავშირს დაამყარებენ გარდაცვლილ ნათესავებთან ან მეგობრებთან და მათგან დახმარებას მიიღებენ.

მთელ მსოფლიოში ბევრს სწამს, რომ მკვდრებს ცოცხლების დახმარება შეუძლიათ. თქვენ რას ფიქრობთ ამის შესახებ? შესაძლოა ბავშვობიდან თქვენც ამას გასწავლიდნენ ან ისეთი ადამიანების გარემოცვაში ხართ, ვისაც ამის სჯერა. ბუნებრივია, გენატრებოდეთ საყვარელი ადამიანი, რომელიც სიკვდილმა წაგართვათ. მედიუმები ჰპირდებიან ხალხს, რომ გარდაცვლილ ახლობლებთან დააკავშირებენ. ჟურნალ „ტაიმში“ ციტირებული იყო ერთი მედიუმის სიტყვები, რომელიც ირწმუნებოდა, რომ სულიერი სამყარო „ნებისმიერს დაეხმარება, ვინც მას მიმართავს“. სიმართლეა ეს? მართლა შეუძლიათ მკვდრებს ცოცხლების დახმარება? ბიბლიის პასუხმა შეიძლება გაგაოცოთ.

ცხოვრობენ სადმე მკვდრები?

ბიბლია მარტივად და გასაგებად გვიხსნის, რა მდგომარეობაში არიან მკვდრები. ეკლესიასტეს 9:5-ში წერია: „ცოცხლებმა იციან, რომ მოკვდებიან, მკვდრებმა კი არაფერი იციან“. აქვთ მკვდრებს გრძნობები? მე-6 მუხლში ვკითხულობთ: „ქრება მათი სიყვარული, სიძულვილი და შური; რაც მზის ქვეშ ხდება, აღარაფერში აღარასოდეს ექნებათ წილი“. ამავე თავის მე-10 მუხლში კი მიცვალებულებზე ნათქვამია, რომ „არც საქმე, არც ჩანაფიქრი, არც ცოდნა და არც სიბრძნე არ არის სამარეში“, სადაც მიდიან. საინტერესოა, რომ ბერძნული წერილების მიხედვით, იესო ქრისტე სიკვდილის შემდეგ გარკვეული პერიოდი სამარეში იყო (საქმეები 2:31).

იესო ბევრს ეხმარებოდა, როცა ცოცხალი იყო. მაგრამ მან იცოდა, რომ უნდა მომკვდარიყო. ამიტომ მოელოდა ის, რომ სამარეში მყოფი კვლავაც შეძლებდა ვინმეს დახმარებას? რა თქმა უნდა, არა! მან თავისი სიკვდილი შეადარა ღამეს, როცა საქმის კეთება შეუძლებელია (იოანე 9:4). იესომ კარგად იცოდა, რომ ადამიანები „უსიცოცხლოები არიან“, როცა არსებობას წყვეტენ (ესაია 26:14).

იესომ აგრეთვე გამოიყენა შედარება, რომელიც კარგად აღწერს მკვდრების მდგომარეობას. როდესაც მისი მეგობარი ლაზარე მოკვდა, იესომ სიკვდილი ძილს შეადარა (იოანე 11:11—13). რა თქმა უნდა, ჩვენ არ ველით, რომ მძინარე ადამიანი რამეში დაგვეხმარება, რადგან მას არ შეუძლია ვინმეს სასარგებლოდ მოქმედება.

განაგრძობს სული არსებობას ადამიანის სიკვდილის შემდეგ?

ბევრს სჯერა, რომ ადამიანის სიკვდილის შემდეგ სული უხილავად განაგრძობს არსებობას. მაგრამ ბიბლია საპირისპიროს გვასწავლის. ბიბლიის პირველ წიგნში, „დაბადებაში“ სული ადამიანთან დაკავშირებით გამოიყენება. პირველი ადამიანის შექმნაზე დაბადების 2:7-ში ნათქვამია, რომ ის „ცოცხალ სულად იქცა“. ადამიანი თავად არის სული და ცხოველებიც სულები არიან (დაბადება 1:20—25). აქედან გამომდინარე, როცა ადამიანი ან ცხოველი კვდება, სული კვდება. ბიბლია სწორედ ამას ასწავლის (ეზეკიელი 18:4).

მაგრამ რა შეიძლება ითქვას იმ შემთხვევებზე, როცა ბევრი ამბობს, რომ მკვდრებთან დაამყარეს კონტაქტი, მათი ხმა მოისმინეს და დაინახეს კიდეც ისინი. ასეთ ამბებს მსოფლიოს მრავალ კუთხეში მოისმენთ. ეს ისტორიები იმედს უნერგავს მათ, ვისაც საყვარელი ადამიანი დაეღუპა, და აღძრავს, მედიუმთან მივიდნენ მკვდრებთან ურთიერთობის დასამყარებლად.

სიმართლეს შეესაბამება ასეთი ისტორიები? თუ დიახ, განა არ ეწინააღმდეგება ეს ზემოთ მოყვანილ ბიბლიურ აზრებს? იესო ქრისტემ ღვთის სიტყვას ჭეშმარიტება უწოდა (იოანე 17:17). ჭეშმარიტება კი საკუთარ თავს არ ეწინააღმდეგება. ბიბლიაში ნათლად არის ნაჩვენები, შეუძლიათ თუ არა მკვდრებს ცოცხლების დახმარება. წმინდა წერილებში მოთხრობილია ერთ ადამიანზე, რომელიც მკვდრისგან დახმარების მიღებას ცდილობდა. ამ მონაკვეთის ყურადღებით გამოკვლევა კიდევ ერთხელ დაგვანახვებს, რას ამბობს ბიბლია მკვდრებთან დაკავშირებით.

მეფე დახმარებისთვის მკვდარს მიმართავს

ისრაელის ჩრდილოეთით მტრის ჯარი იყო დაბანაკებული. მეფე საული თავისი მეომრებით საშიში მოწინააღმდეგის, ფილისტიმელების პირისპირ იდგა. მათი ბანაკის დანახვაზე საულს „მეტისმეტად შეუკრთა გული“. თავისი მეფობის ამ პერიოდში საულს უკვე მიტოვებული ჰქონდა ჭეშმარიტი თაყვანისმცემლობა. მან იეჰოვას სთხოვა დახმარება, რაზეც იეჰოვამ არაფერი უპასუხა. ღვთის წინასწარმეტყველი სამუელი მკვდარი იყო, ამიტომ ვის მიმართავდა ის დახმარებისთვის? (1 სამუელი 28:3, 5, 6).

საული ფიქრობდა, რომ ენდორში მცხოვრები მედიუმის დახმარებით მიიღებდა მითითებებს. მან მედიუმს სთხოვა, რომ სამუელის სული გამოეძახა. მედიუმი ასეც მოიქცა. „სამუელმა“ უთხრა საულს, რომ ფილისტიმელებთან ბრძოლაში დამარცხდებოდნენ და საული და მისი ვაჟები დაიღუპებოდნენ (1 სამუელი 28:7—19). მართლა მკვდარ სამუელს ესაუბრებოდა საული?

დაფიქრდით შემდეგზე: ბიბლია ამბობს, რომ მკვდარი ‘უბრუნდება მიწას და ქრება მისი ფიქრები’ (ფსალმუნი 146:4). საულმა და სამუელმა იცოდნენ, რომ ღმერთი კრძალავს სპირიტიზმს, ამიტომაც საულმა ქვეყნიდან მოაშორა მარჩიელები და სულების გამომძახებლები (ლევიანები 19:31).

ღვთის ერთგულ სამუელს სიკვდილის შემდეგ სიცოცხლე რომ გაეგრძელებინა როგორც სულს, დაარღვევდა ის ღვთის კანონს და დაუკავშირდებოდა საულს მედიუმის მეშვეობით? იეჰოვას არ სურდა საულთან ლაპარაკი. შეძლებდა მედიუმი, იძულებული გაეხადა ყოვლისშემძლე ღმერთი, მკვდარი სამუელის მეშვეობით დაკავშირებოდა საულს? რა თქმა უნდა, ვერ შეძლებდა. ნათელია ეს „სამუელი“ არ იყო ღვთის ერთგული წინასწარმეტყველი. ეს იყო სული, ბოროტი დემონი, რომელიც თავს მკვდარ სამუელად აჩვენებდა.

დემონები არიან ანგელოზები, რომლებიც კაცობრიობის ისტორიის ადრეულ პერიოდში ღვთის უზენაესი ხელისუფლების წინააღმდეგ წავიდნენ (დაბადება 6:1—4; იუდა 6). ამ დემონებს შეუძლიათ დაიმახსოვრონ, როგორ ლაპარაკობდა, გამოიყურებოდა და იქცეოდა ესა თუ ის ადამიანი სიცოცხლეში და სიკვდილის შემდეგ მიბაძონ მას. მათი მიზანია, ხალხს დააჯერონ, რომ ბიბლია მცდარია. ამიტომ გასაკვირი არ არის, რატომ გვაფრთხილებს ბიბლია, არანაირი ურთიერთობა არ ვიქონიოთ ამ ბოროტ სულიერ ძალებთან (კანონი 18:10—12). ეს ბოროტი სულები დღესაც აქტიურად მოქმედებენ.

ახლა უკვე გვესმის, რატომ ყვება ხალხი, როგორ „მოისმინეს“ საყვარელი გარდაცვლილების ხმა და „დაინახეს“ ისინი. ერთი შეხედვით შეიძლება ამაში ცუდი არაფერი იყოს, მაგრამ ბოროტ სულიერ ძალებს შეცდომაში შეჰყავთ ადამიანები (ეფესოელები 6:12). აგრეთვე დაფიქრდით: იეჰოვა მოსიყვარულე და მზრუნველი ღმერთია. თუ ჩვენი საყვარელი ადამიანები სიკვდილის შემდეგ განაგრძობენ სიცოცხლეს და შეუძლიათ ჩვენი დახმარება, განა მოსიყვარულე შემოქმედი აგვიკრძალავდა მათთან ურთიერთობას და სულების გამოძახებას სისაძაგლედ მოიხსენიებდა? ცხადია, არა (1 პეტრე 5:7). მაშ, სად უნდა ვეძებოთ დახმარება?

ნამდვილი იმედი ცოცხლებისთვის და მკვდრებისთვის

როგორც წინა აბზაცებიდან გავიგეთ, მკვდრებს არ შესწევთ ძალა, ცოცხლებს დაეხმარონ. უფრო მეტიც, მათგან დახმარების მიღების მცდელობა ცუდ შედეგებს მოგვიტანს, რადგან ეს ღვთის კანონების დარღვევაა და ასე მოქმედებით შეიძლება დემონების გავლენის ქვეშ მოვექცეთ.

ბიბლია გვეუბნება, რომ საუკეთესო დახმარებას ჩვენი შემოქმედი, იეჰოვა ღმერთი გაგვიწევს. მას შეუძლია სიკვდილისგან დაგვიხსნას (ფსალმუნი 33:19, 20). მისგან დახმარების მიღება დღესაც შეგვიძლია. ღმერთი მედიუმებისგან განსხვავებით ნამდვილ იმედს გვაძლევს.

სტატიის დასაწყისში მოხსენიებულმა ტამბამ იცოდა, რა სხვაობა იყო მედიუმების ცრუ იმედსა და იმ ჭეშმარიტებას შორის, რასაც იეჰოვა გვიმხელს. მედიუმები ამბობდნენ, რომ გარდაცვლილი წინაპრებისთვის თუ ტამბა მსხვერპლს არ შესწირავდა, გამოცდაზე ჩაიჭრებოდა. ამ დროისთვის ტამბა უკვე ბიბლიას სწავლობდა იეჰოვას მოწმეებთან. მან იცოდა, სინამდვილეში რა მდგომარეობაში იმყოფებიან მკვდრები და რომ გარდაცვლილთა სახით ადამიანებს ბოროტი სულიერი ქმნილებები ეცხადებიან. ზეწოლის მიუხედავად, ტამბა მედიუმთან არ წასულა. მან დედამისს უთხრა: „თუ ჩავიჭრები, უკეთ მოვემზადები და გამოცდაზე მომავალ წელს გავალ“.

ტამბამ პირველმა ჩააბარა გამოცდა. დედამისი გაოცებული იყო, მან მედიუმებისადმი რწმენა დაკარგა და აღარასოდეს უხსენიებია მკვდრებისთვის მსხვერპლის შეწირვა. ტამბამ ისწავლა, რომ იეჰოვას არ სიამოვნებს, როცა ადამიანი ‘ცოცხლებისთვის მკვდრებს მიმართავს’ (ესაია 8:19). ბიბლიის შესწავლამ ის დაარწმუნა, რომ წარმატება იეჰოვას კანონების დაცვას მოაქვს (ფსალმუნი 1:1—3).

რა იმედი არსებობს ჩვენი ახლობლებისთვის, რომლებიც დღეს ცოცხლები აღარ არიან? გარდა იმისა, რომ იეჰოვა მზად არის, დაეხმაროს ცოცხლებს, ის მკვდრებისთვისაც იძლევა იმედს. მას შემდეგ, რაც წინასწარმეტყველი ესაია აღწერს მკვდრების მდგომარეობას, 26-ე თავის მე-19 მუხლში ამბობს: „გაცოცხლდებიან შენი მკვდრები . . . გაიღვიძეთ და სიხარულით შესძახეთ, მტვერში დამკვიდრებულებო!“. წინასწარმეტყველებაში შემდეგ ნათქვამია, რომ უსიცოცხლოებს სიცოცხლე დაუბრუნდებათ.

წარმოიდგინეთ, რომ უმოქმედო მდგომარეობაში მყოფი, სიკვდილის ძილით მიძინებული მილიარდობით ადამიანი სიცოცხლეს დაუბრუნდება. როგორც ბიბლიიდან ვიგებთ, იეჰოვას ენატრება ის დრო, როცა მკვდრებს გააცოცხლებს (იობი 14:14, 15). არარეალურად ხომ არ მიგაჩნიათ ეს დაპირება? იესო ქრისტე იმდენად იყო დარწმუნებული ამ დანაპირების უტყუარობაში, რომ მან მკვდრები ისე მოიხსენია, თითქოს ისინი უკვე ცოცხლები იყვნენ იეჰოვას თვალში (ლუკა 20:37, 38).

ბიბლიის შესწავლა და საფუძვლიანი ცოდნის მიღება დაგარწმუნებთ, რომ იეჰოვას შესწევს ძალა, დაეხმაროს ცოცხლებს, მკვდრები კი აღადგინოს.b ღვთის ეს დანაპირები „სარწმუნო და ჭეშმარიტია“ (გამოცხადება 21:4, 5).

[სქოლიოები]

[ჩანართი 19 გვერდზე]

ბუნებრივია, გენატრებოდეთ საყვარელი ადამიანი, რომელიც სიკვდილმა წაგართვათ

[სურათი 20 გვერდზე]

გაცოცხლდა მკვდარი წინასწარმეტყველი სამუელი და ელაპარაკა მეფე საულს?