გაჰყევი იესოს
1 ერთ შემთხვევაში იესომ თქვა: „ვისაც უნდა, რომ მომყვეს, უარყოს თავისი თავი, აიღოს თავისი ჯვარი და გამომყვეს“ (მათ. 16:24). რასაკვირველია, ძალიან გვსურს, მოქმედებით გამოვეხმაუროთ იესოს სიტყვებს. ამიტომ, მოდი ვნახოთ, რას შეიცავს მისი მოწვევა.
2 „უარყოს თავისი თავი“. როცა თავი მივუძღვენით იეჰოვას, ჩვენ უარვყავით საკუთარი თავი. ბერძნული სიტყვის ძირითადი მნიშვნელობა, რომელიც გადმოთარგმნილია სიტყვად „უარყოს“, ნიშნავს „უარის თქმას“. ეს ნიშნავს, რომ ნებაყოფლობით ვთქვით უარი მიზნებზე, სურვილებზე, კომფორტსა და ეგოისტურ სიამოვნებებზე — გადავწყვიტეთ, რომ უსასრულოდ ვასიამოვნოთ იეჰოვას (რომ. 14:8; 15:3).
3 „აიღოს თავისი ჯვარი“. ქრისტიანის ცხოვრება ნიშნავს იეჰოვასადმი თავდადებული მსახურების ჯვრის, ანუ წამების ძელის, ზიდვას. თავგანწირვის სულის გამოვლენის ერთ-ერთი საშუალებაა, მეტი ძალისხმევა მოახმარო მსახურებას. დღემდე ამ წელს მრავალმა მაუწყებელმა დამხმარე პიონერად იმსახურა. შესაძლოა, შენც ერთ-ერთ მათგანს წარმოადგენ და შეგიძლია დაადასტურო, რომ კურთხევები, რომლებსაც ღებულობ, შენს მიერ გაღებულ მსხვერპლზე მეტს გინაზღაურებს. ისინი, რომლებიც ვერ მსახურობენ დამხმარე პიონერებად, ხშირად გეგმავენ უფრო მეტი დროის დათმობას სამქადაგებლო მსახურებისთვის როგორც კრების მაუწყებლები. ამ მიზნით, ზოგი კრება შეხვედრებს სამქადაგებლო მსახურებისთვის ჩვეულებრივზე რამდენიმე წუთით ადრე გეგმავს. მრავალი მაუწყებელი მადლიერებით იყენებს ამ გრძელ პერიოდს სამქადაგებლო მსახურებისთვის. ზოგმა შესანიშნავ შედეგებს მიაღწია მაშინაც, როცა გადაწყვიტა ‘კიდევ ერთ სახლში მისვლა’ ან ‘მხოლოდ რამდენიმე წუთით გაეხანგრძლივებინა’ მსახურება.
4 თავგანწირვის სულის გამოვლენის სხვა საშუალებაა პირადი მიზნების დასახვა. გულმოდგინე დაგეგმვითა და თავიანთი განრიგის შეცვლით ზოგი სრული დროით პიონერი გახდა. სხვებმა ისე მოაწესრიგეს თავიანთი საქმეები, რომ ბეთელში ან მისიონერად მსახურება შეძლებოდათ. ზოგი ისეთ ტერიტორიებში გადავიდა, სადაც სამეფოს მაუწყებლების დიდი მოთხოვნილებაა.
5 „გამომყვეს“. მიუხედავად იმისა, რომ იესოს მოციქულებმა მრავალი განსაცდელი გადაიტანეს, მათ ამხნევებდათ მსახურებაში მისი გულმოდგინება და მოთმინება (იოან. 4:34). ისინი თავიანთი სულის განახლებას გრძნობდნენ მისი იქ ყოფნითა და მისი ცნობით. აი, რატომ ავლენდნენ ჭეშმარიტ სიხარულს მისი მიმდევრები (მათ. 11:29). მოდი ასევე გავამხნევოთ ერთმანეთი, რათა განუწყვეტლივ შევასრულოთ სამეფოს ქადაგებისა და მოწაფეების მომზადების უაღრესად მნიშვნელოვანი საქმე.
6 მოდი ყველა გამოვეხმაუროთ იესოს მოწვევას მოქმედებით, გამუდმებით მივყვეთ მას თავგანწირვის სულის განვითარებით. თუ ასე ვიმოქმედებთ, უდიდესი სიხარული გვექნება ახლა და შევძლებთ, ველოდოთ კიდევ უფრო მეტ კურთხევებს მომავალში.