კარგი საქციელით დამოწმება
1 დღევანდელ საზოგადოებაში, სადაც ყველაფერი დაშვებულია, ბევრი ახალგაზრდა უგუნურად ირევს ცხოვრებას ნარკოტიკებით, უზნეობით, ჩხუბითა და ძალადობით. ამის საპირისპიროდ, ქრისტიანულ კრებაში გონიერი ახალგაზრდების სამაგალითო საქციელი გამახალისებელია მათთვის, ვინც მათ აკვირდება და, რასაკვირველია, ეს მოსწონს იეჰოვას. ეს ძლიერი დამოწმებაა, რომლითაც შეიძლება სხვების ჭეშმარიტებისკენ მიზიდვა (1 პეტ. 2:12).
2 მრავალი შემთხვევა აჩვენებს, რომ ქრისტიანი ახალგაზრდების კარგი საქციელი დადებით ზეგავლენას ახდენს მათზე, ვინც მათ აკვირდება. მოსწავლე იეჰოვას მოწმე გოგონაზე საუბრისას სკოლის მასწავლებელმა მთელ კლასს უთხრა, რომ ამ გოგონას ღმერთი, იეჰოვა, ჭეშმარიტი ღმერთია. ეს მან იმიტომ თქვა, რომ გოგონა ყოველთვის თავაზიანად იქცეოდა. სხვა მასწავლებელმა ჩვენს საზოგადოებას შემდეგი სიტყვები მისწერა: „მსურს შეგაქოთ კარგი ახალგაზრდებისთვის, რომლებიც თქვენს რელიგიაში არიან. . . თქვენი ახალგაზრდები ნამდვილად სამაგალითოები არიან. უფროსებს პატივს სცემენ, თავაზიანები არიან და მოკრძალებულად იცვამენ. და მერე როგორ იციან ბიბლია! ზუსტად ასეთი უნდა იყოს ჭეშმარიტი რელიგია!“
3 სხვა მასწავლებელზე შთაბეჭდილება მოახდინა თავისი მოსწავლის, შვიდი წლის ბიჭუნას, კარგმა ყოფაქცევამ. ის მიიზიდა ბიჭუნას მშვიდმა და სასიამოვნო პიროვნებამ, რომელიც მას სხვა ბიჭებისგან განასხვავებდა. მასწავლებელი გაოცებული იყო რწმენისადმი ბავშვის სერიოზული დამოკიდებულებით; ბიჭუნას არ რცხვენოდა იმის გამო, რომ სხვანაირი იყო რწმენით. მასწავლებელი ხედავდა, რომ მისი სინდისი განსწავლული იყო და შეეძლო ‘კეთილისა და ბოროტის გარჩევა’ (ებრ. 5:14). ბოლოს ბიჭუნას დედა მივიდა ამ მასწავლებელთან და ბიბლიის შესწავლა დაიწყეს. გარკვეული დროის შემდეგ მასწავლებელი მოინათლა, მოგვიანებით კი სრული დროით პიონერი გახდა!
4 ერთ-ერთ ახალგაზრდა მამაკაცზე ზეგავლენა მოახდინა თავისი სკოლის მოსწავლე გოგონას კარგმა საქციელმა. გოგონა ნამდვილად განსხვავებული იყო — ძალიან თავაზიანი, ბეჯითი, ყოველთვის მოკრძალებულად იცვამდა. ამასთანავე სხვა გოგონებისგან განსხვავებით არასდროს ეარშიყებოდა ბიჭებს. ამ მამაკაცმა დაინახა, რომ გოგონა ბიბლიის პრინციპებით ცხოვრობდა. ახალგაზრდა მამაკაცი შეეკითხა მას მისი რწმენის შესახებ და გაგებულით აღტაცებული დარჩა. მან დაიწყო ბიბლიის შესწავლა და მალევე მოინათლა; ჯერ პიონერი იყო, შემდეგ კი ბეთელში დაიწყო მსახურება.
5 თუ ახალგაზრდა ქრისტიანი ხარ და გსურს კარგად დაუმოწმო სხვებს, ყოველმხრივ გააკონტროლე შენი საქციელი. არასდროს მოადუნო სიფხიზლე წუთისოფლის ყველაფერზე ნებისდამრთველი შეხედულებების ან ცხოვრების სტილის მიმართ მიდრეკილების გაჩენით. იყავი სამაგალითო საუბარში, ჩაცმაში, გარეგნობაში არა მარტო სამქადაგებლო მსახურებისას და კრების შეხვედრებზე, არამედ ყოველთვის — სკოლაში ყოფნისას და დასვენებისას (1 ტიმ. 4:12). შენ ნამდვილად გაიხარებ, როცა ვინმე დაინტერესდება ჭეშმარიტებით იმის გამო, რომ კარგი საქციელით ‘ანათებს შენი ნათელი’ (მათ. 5:16).