უპირატესობა პატარებისთვის

¹ მრავალი, ვინც ახლა მშობელია, სიამოვნებით იხსენებს იმ უპირატესობას, რომელიც მათ ჰქონდათ, როცა ბავშვები იყვნენ და ჭეშმარიტებაში იზრდებოდნენ. ეს არის ჟურნალებით მსახურების დღეები. კრებებში ეს საქმე შემოიღეს 1949 წელს. კვირაში ერთ დღეს ყველას უნდა გაემახვილებინა ყურადღება იმაზე, რომ ქუჩაში, კარდაკარ, მაღაზიებში და სხვაგან გაევრცელებინათ ჟურნალები — „საგუშაგო კოშკი“ და „გამოიღვიძეთ!“. პატარა მაუწყებლები განსაკუთრებული მოუთმენლობით ელოდნენ ამ საქმეში მონაწილეობას, რადგან ეს მათ შესაძლებლობას აძლევდა, იმავე საქმეში მიეღოთ მონაწილეობა, რომელშიც კრების უფროსი წევრები მონაწილეობდნენ. ასე იყო ეს შენს შემთხვევაშიც, როცა პატარა იყავი?

² შენმა შვილებმაც მიიღონ მონაწილეობა. ძალიან პატარა ბავშვებს, რომლებსაც ჯერ უჭირთ ბიბლიური საუბრების დაწყება კართან, შეუძლიათ შესთავაზონ ჟურნალები. ამისთვის მათ ესაჭიროებათ უბრალო, რამდენიმე მოკლეწინადადებიანი შესავლის სწავლა. მოკლე კომენტარი, მაგალითად, ყდაზე მოცემულ ილუსტრაციასთან დაკავშირებით შეიძლება საკმარისი იყოს. მრავალი მობინადრე სიხარულით იღებს ჟურნალებს პატარებისგან და ხშირად აღნიშნავენ ჩვენი ბავშვების გულწრფელობასა და კარგ ყოფაქცევას. ეს საქმე რომ კარგად აკეთონ და სამეფოს შესახებ ცნობის გავრცელებაში თავიანთი წვლილი შეიტანონ, ბავშვებს მცირე დახმარება სჭირდებათ. რა თქმა უნდა, ისინი იზრდებიან, ამიტომ მშობლებს სურთ, დაეხმარონ მათ, რომ შვილები უფრო დახელოვნდნენ ქადაგებაში.

³ მანუელმა ქადაგება კარდაკარ სამი წლის ასაკში დაიწყო. მშობლები ასწავლიდნენ მას მოკლე შესავლებს, რომ ზეპირად ხსომებოდა. ის გულმოდგინედ მსახურობს მათთან ერთად და ავრცელებს მრავალ ჟურნალს, ბროშურასა და ტრაქტატს. აგრეთვე არაფორმალურადაც ქადაგებს. ერთხელ, როცა მისმა მშობლებმა პარკში წაიყვანეს დასასვენებლად, მან თავისი ინიციატივით გაავრცელა რამდენიმე ტრაქტატი. მიუხედავად იმისა, რომ მანუელი ჯერ კიდევ ძალიან პატარაა, მისი ენთუზიაზმი მსახურებაში ნამდვილად ამხნევებს მის მშობლებსა და მთელ კრებას (იგავ. 22:6).

⁴ „იეჰოვას მოწმეთა 2000 წლის კალენდარში“ ყოველი შაბათი დღე განკუთვნილია „ჟურნალებით მსახურებისთვის“. მშობლებო, განაახლეთ ამ საქმისადმი თქვენი ინტერესი, დაეხმარეთ შვილებს, რომ მათ რაც შეიძლება რეგულარულად მიიღონ მონაწილეობა ამგვარ მსახურებაში.