გქონდეთ კარგი ქცევა, რომლითაც ღმერთი განდიდდება
1 სადაც უნდა ვიყოთ, ჩვენი საქციელი, ჩაცმულობა და გარეგნობა მეტყველებს ჩვენზე და ღმერთზე, რომელსაც თაყვანს ვცემთ. ეს განსაკუთრებით შესამჩნევი ხდება ღვთის ხალხის დიდ შეხვედრებზე, სადაც მრავალი ადამიანი გვაკვირდება. როცა სამაგალითოდ ვიქცევით, ეს განადიდებს იეჰოვას სახელს (1 პეტ. 2:12). მაგრამ მხოლოდ რამდენიმე ადამიანის ცუდმა საქციელმა ან დაუფიქრებელმა მოქმედებამ შეიძლება ჩრდილი მიაყენოს ღვთის სახელსა და მის ხალხს (ეკლ. 9:18ბ). რადგან გვახსოვს, რომ გარეშე პირებს ჩვენი საქციელით ექმნებათ წარმოდგენა ჩვენს ორგანიზაციასა და ჩვენს ღმერთზე, რომელსაც თაყვანს ვცემთ, ყველანაირად უნდა ვეცადოთ, ‘ყველაფერი ღვთის სადიდებლად ვაკეთოთ’ (1 კორ. 10:31).
2 სამაგალითო ქცევა საერთო საცხოვრებლებში, სასტუმროებსა და სკოლებში. ბევრ შემთხვევაში სასტუმროს პერსონალზე დიდ შთაბეჭდილებას ახდენს იეჰოვას მოწმეების წესრიგიანობა, კარგი მანერები და სისუფთავე. როცა იეჰოვას მოწმეთა ოჯახებზე ლაპარაკობდა, სასტუმროს ადმინისტრატორმა თქვა: „იეჰოვას მოწმეების ბავშვები საუკეთესო ბავშვები არიან! ისინი უფროსი ადამიანებივით იცვამენ, ზრდილობიანები და თავაზიანები არიან, კარგი მანერები აქვთ და არანაირ პრობლემას არ ქმნიან. ამისთვის თქვენ შექებას იმსახურებთ. ძალიან კმაყოფილები დავრჩით თქვენი შვილებით“. ასეთი სიტყვები ხშირად გვესმის, რადგან ისინი, ვისთანაც საქმე გვაქვს, იეჰოვას ხალხში არსებულ სიყვარულსა და პატივისცემას ხედავენ.
3 სხვა მხრივ, ზოგი სასტუმროს, საერთო საცხოვრებლისა და სკოლის პერსონალის შენიშვნა იმაზე მეტყველებს, რომ მათ პრობლემებს უქმნიან ისინი, ვინც არ უფიქრდება თავის მოქმედებებს და აკრძალულ რამეს აკეთებს შენობაში. ეს კი იწვევს პრობლემებსა და კრიტიკას, რაც არ უნდა ხდებოდეს. ზოგი ადმინისტრატორი უკმაყოფილოა, რომ ბავშვები ხმაურიანები და უმართავები არიან, რადგან მშობლები ყურადღებას არ აქცევენ, როცა თავიანთი შვილები შენობაში დარბიან.
4 მრავალ საერთო საცხოვრებელში დადგენილია გარკვეული წესები, რომლებსაც სტუმრები უნდა იცავდნენ. ზოგი ძმა არღვევს ამ წესებს, მაგალითად, დასაშვებზე მეტ ხმაურს იწვევს, გვიან ბრუნდება ან სისუფთავეს არ იცავს. მნიშვნელოვანია, რომ ყოველმხრივ დავიცვათ სისუფთავე. ეს ეხება წესრიგსაც ოთახებში, რადგან კონგრესზე წასვლამდე მნიშვნელოვანია, რომ ყველაფერი წესრიგში დავტოვოთ. კარგი იქნება, თუ ოთახიდან ყოველდღე გავიტანთ ნაგავს, ეს, განსაკუთრებით, საჭმლის ნარჩენებს ეხება. როცა მივემგზავრებით, განსაკუთრებით მნიშვნელოვანია, რომ ჩვენი წასვლის შემდეგ ოთახი მოწესრიგებული დავტოვოთ. თუ რაღაცა გაფუჭდა, აუცილებლად დაუყოვნებლივ შეატყობინეთ თქვენს ჯგუფზე პასუხისმგებელს, რომელთან ერთადაც საჭირო ზომებს მიიღებთ ან შეატყობინებთ კონგრესის დაბინავების განყოფილებას.
5 ადმინისტრაციასთან სრული თანამშრომლობისთვის საჭიროა ნამდვილი ძალისხმევა. რა თქმა უნდა, ჩვენ არ გვსურს, ცუდი შთაბეჭდილება შევუქმნათ ვინმეს იეჰოვას ხალხის შესახებ. როგორც ქრისტიანებს, ყოველთვის პატიოსნად მოქცევა გვმართებს. არ შეიძლება თეთრეულის ან რამე „სუვენირის“ სახლში წაღება ოთახიდან, სადაც ვცხოვრობდით, რადგან ეს ქურდობაა; არ უნდა მოვიტყუოთ, როცა გვეკითხებიან, რამდენი ადამიანი იქნება ჩვენთან ერთად ოთახში.
6 სათანადო საქციელი კონგრესზე. მნიშვნელობა არა აქვს, რომელ შენობაში ტარდება კონგრესი, რადგან იმ დროს ის დიდი სამეფო დარბაზის როლს ასრულებს. სათანადო ჩაცმულობა და გარეგნობა ისეთივე უნდა იყოს, როცა შეხვედრებს ვესწრებით ადგილობრივ კრებაში. კონგრესის პროგრამის მსვლელობის დროს და დამთავრების შემდეგ ძმებმა და დებმა თავი უნდა შეიკავონ მოურიდებელი ან უცნაური ტანსაცმლის ჩაცმისგან, რაც ირეკლავს ქვეყნიურ სულს და აძნელებს იმის დანახვას, რომ ჩვენ სხვებისგან გამოვირჩევით. დები ფრთხილად უნდა იყვნენ, რომ მათი ტანსაცმლის სტილი და ქვედატანის სიგრძე სათანადო და წესიერი იყოს (1 ტიმ. 2:9, 10). მნიშვნელობა არა აქვს, კონგრესს ვესწრებით, საცხოვრებელში ვართ, სასადილოში ვსადილობთ თუ მაღაზიაში გავდივართ საყიდლებზე, ჩვენ ყოველთვის უნდა ვირეკლავდეთ იმას, რომ ღვთის მსახურები ვართ, და არ უნდა მივცეთ სხვებს დაბრკოლების საბაბი (2 კორ. 6:3).
7 ნათლობა ჩატარდება შაბათს დილით, კონგრესზე. 1995 წლის 1 აპრილის „საგუშაგო კოშკში“ (რუს.), 30-ე გვერდზე, ახსნილია, თუ როგორი დამოკიდებულება უნდა გვქონდეს ამ მოვლენისადმი. იქ ნათქვამია, რომ „ნათლობას საკადრისი სერიოზულობით უნდა ვუყუროთ. ეს არ არის ემოციების გადმოფრქვევის, წვეულებების მოწყობის ან მხიარულების დრო. მაგრამ ამ დროს არც მოღუშულად ყოფნა იქნებოდა სწორი“. არასწორი იქნებოდა, თუ მოსანათლები — მამაკაცები თუ ქალები — ღია და გამჭვირვალე საცურაო კოსტიუმებით მოვიდოდნენ. მაშასადამე, ყველამ უნდა აირეკლოს ქრისტიანული ნათლობის სიხარული და სერიოზულობა.
8 პეტრე შეგვახსენებს, თუ ‘როგორები უნდა ვიყოთ წმინდა ქცევასა და ღვთისმოსაობაში’ (2 პეტ. 3:11). დაე ჩვენი სიტყვები და საქმეები საოლქო კონგრესზე — „ღვთის სიტყვის შემსრულებლები“ — დაეხმაროს გულწრფელ ადამიანებს, შეიცნონ და თაყვანი სცენ ჩვენს დიდებულ ღმერთს, რომელიც პატივისა და დიდების ღირსია (1 კორ. 14:24, 25).