კეთილი ვაკეთოთ და ქება დავიმსახუროთ!

¹ „ის სიმშვიდე, რაც მე მათში დავინახე, სხვებში არასდროს შემიმჩნევია“. „მათი მიღება სასიამოვნოა“. ეს ის ზოგი დადებითი გამოხმაურებაა, რომლებიც დამკვირვებლებმა გამოთქვეს გასული წლის საოლქო კონგრესების შემდეგ. და ეს იმ კარგი რეპუტაციის მაჩვენებელია, რომელიც გვაქვს, როგორც ორგანიზაციას (იგავ. 27:2; 1 კორ. 4:9). საბოლოო ჯამში კი, ეს ქება იეჰოვას ეკუთვნის (მათ. 5:16). ღვთის განდიდების კიდევ ერთი შესანიშნავი შესაძლებლობა წელს გვეძლევა, საოლქო კონგრესზე, სახელწოდებით „ღვთის სიტყვის მასწავლებლები“.

² ყოველწლიურად გულთბილად შეგვახსენებენ კონგრესის დროს სათანადო ყოფაქცევის საჭიროებას. რატომ? ამ წუთისოფელში განწყობილება, ჩაცმულობისა და ქცევის ნორმები სულ უფრო უარესდება, ჩვენ კი არ გვსურს, ამ ნორმების გავლენის ქვეშ მოვექცეთ. არ გვსურს ჩვენი კარგი რეპუტაციის შელახვა (ეფეს. 2:2; 4:17). მოდი გვახსოვდეს შემდეგი გაფრთხილებები.

³ კეთილის კეთება სასტუმროებში. ჩვენ პატიოსან ადამიანებად ვართ ცნობილი (ებრ. 13:18). მაშასადამე, ზუსტად უნდა განვაცხადოთ, თუ რამდენი ადამიანი იქნება ჩვენთან ერთად სასტუმრო ოთახში. თუ ნებადართული არაა, საჭმელი არ უნდა მოვამზადოთ ოთახში. ერთი სასტუმროს მეპატრონემ აღნიშნა, რომ მან იეჰოვას მოწმეებს იაფად მიაქირავა ოთახები, რადგან არასდროს ეკარგებოდა პირსახოცები. მან იცის, რომ მის საკუთრებას კარგად მოუვლიან. უეჭველია, ჩვენ არასდროს წამოვიღებთ „სუვენირებს“ სასტუმროდან. გარდა ამისა, სადაც მიღებულია, მადლიერების ნიშნად წვრილმანი გასამრჯელო დაუტოვე პერსონალს გაწეული სამსახურისთვის. ყოველთვის თავაზიანი და მომთმენი იყავი სასტუმროს პერსონალის მიმართ.

⁴ სხვებზე გავლენას ახდენს იმის დანახვა, რომ ჩვენი ბავშვები ზრდილობიანები და მორჩილები არიან (ეფეს. 6:1, 2). მშობლებო, გთხოვთ თვალყური ადევნოთ ბავშვებს, რომ მათ ხელი არ შეუშალონ სხვებს მაშინაც კი, თუ ისინი საცურაო აუზში ან სხვა გასართობ ადგილებში არიან. ყველა უნდა მოვერიდოთ კარის მიჯახუნებას და ხმაურს, განსაკუთრებით კი გვიან საღამოს.

⁵ კარგად მოვიქცევით, თუ ყურადღებიანი ვიქნებით სასტუმროში მცხოვრები სხვა სტუმრების მიმართ, რომლებიც მოწმეები არ არიან. ზოგიერთ სასტუმროში ჩივიან, რომ კონგრესის დელეგატები თავიანთი მაცივრებისთვის საყინულიდან მთელ ყინულს იყენებენ. აგრეთვე არ იქნებოდა კარგი, აგვეღო დამატებითი საჭმელი ან ყავით აგვევსო ჭურჭელი შემდგომი გამოყენებისთვის. არ უნდა ვიფიქროთ, რომ სასტუმროში გამონაკლისს მხოლოდ ჩვენთვის დაუშვებენ.

⁶ კეთილის კეთება კონგრესზე. შემჩნეულ იქნა, რომ ზოგიერთი დელეგატი უარს ამბობდა მომსახურეებთან თანამშრომლობაზე და ისინი ქრისტიანისთვის შეუფერებელი ტონითაც კი ელაპარაკებოდნენ მათ. იმის გამო, რომ არ დაემორჩილნენ ძმების მითითებებს და მანქანები აკრძალულ ადგილას დააყენეს, ზოგიერთი დელეგატის მანქანა ბუქსირით გადააადგილეს. უდავოა, პირველობისკენ სწრაფვა არც ადამიანზე მეტყველებს, როგორც კარგის მკეთებელ პიროვნებაზე, და არც იეჰოვა ღმერთს მიაგებს პატივს. ამიტომ, ვიყოთ მოსიყვარულე, მომთმენი და თანამშრომლობის სულით აღვსილი (გალ. 5:22, 23, 25).

⁷ როდესაც კონგრესზე შესასვლელი კარი იღება 8:00-ზე, შეიძლება ზოგიერთი და-ძმის შემჩნევა, რომლებიც გარბიან, აწვებიან და ხელს კრავენ სხვებს, რომ „საუკეთესო“ ადგილები დაიკავონ. ასეთი ყოფაქცევით ზოგი დაშავდა. რადგან გვირჩევენ, რომ შუადღით მსუბუქად წავიხემსოთ, გონივრული არ იქნებოდა მანქანების სადგომზე სადილისთვის მაგიდების გაშლა. ეს პიკნიკის შთაბეჭდილებას დატოვებდა, რომელიც, ჩვეულებრივ, სპორტული ღონისძიების დროს ეწყობა.

⁸ ჩაცმულობა და ვარცხნილობა. გასული წლის საოლქო კონგრესის შემდეგ დედაქალაქის ერთი მრავალტირაჟიანი გაზეთის რედაქტორი წერდა: „ყველაზე უფრო გასაოცარი მოწმეების ქცევა იყო. რა აღმაფრთოვანებელი იყო ამდენი ადამიანის დანახვა, რომლებიც ასე ღირსეულად და პატივისცემით იქცეოდნენ. მშვენივრად ჩაცმულები, სხვადასხვა რასისა და ეთნიკური წარმოშობის ასობით ოჯახი მშვიდად მიემართებოდა შეკრების ადგილისკენ. მათი ქცევა მკვეთრად განსხვავდებოდა მრავალი თავყრილობის დროს ადამიანების ქცევისაგან. სინამდვილეში, მთლიანობაში, მოწმეები ძალიან განსხვავდებიან უმეტესობისგან. ყველასთვის ჩვეულებრივი გახდა საზოგადოებაში უხეში მოქცევა. . . მართლაც, მოწმეთა ჯგუფის დანახვა აღმაფრთოვანებელია“. დაე ჩვენი ჩაცმულობით, გარეგნობით ან ქცევით არასდროს შევუშალოთ ხელი კონგრესის სულიერ ატმოსფეროს (ფილ. 1:10; 1 ტიმ. 2:9, 10).

⁹ ნათლობის დროს. მოსანათლავებს სურთ, ამ შემთხვევას განსაკუთრებული პატივით მოეპყრონ. ქრისტიანისთვის შესაფერისი საცურაო კოსტიუმის ჩაცმა ამ მოვლენის სიწმინდისადმი მადლიერების გამოვლენა იქნება. მათთვის, ვინც ბიბლიის შესწავლას ატარებდა, ყველაზე საუკეთესო იქნება, შემსწავლელებთან კონგრესამდე განიხილონ „მკითხველთა შეკითხვები“, რომელიც მოცემულია 1995 წლის 1 აპრილის „საგუშაგო კოშკში“ (რუს.).

¹⁰ ჩვენი გარეგნობა და ღვთისმოსაწონი ქცევა ჩვენს ქრისტიანულ მრწამსს ადასტურებს და გულწრფელ ადამიანებს ჭეშმარიტების ამოცნობას უადვილებს. ამიტომაც, როცა დავესწრებით საოლქო კონგრესს, „ღვთის სიტყვის მასწავლებლები“, დაე ‘კეთილი ვაკეთოთ’ და ქება დავიმსახუროთ (რომ. 13:3).