გამოავლინეთ ქრისტიანული ერთგულება ნათესავის კრებიდან გარიცხვის დროს
1. როდის შეიძლება გამოიცადოს ქრისტიანული ერთგულება?
1 ჩვეულებრივ, ნათესაური კავშირები საკმაოდ მტკიცეა. ამიტომ, ქრისტიანისთვის განსაცდელია, როდესაც მისი მეუღლე, შვილი, მშობელი ან რომელიმე ახლო ნათესავი ირიცხება თუ თავად უარყოფს კრებას (მათ. 10:37). როგორი დამოკიდებულება უნდა ჰქონდეთ ერთგულ ქრისტიანებს ასეთ ნათესავებთან? იცვლება თუ არა რაიმე, როდესაც გარიცხული ოჯახის წევრია? პირველ რიგში, ვნახოთ, რას ამბობს ბიბლია ამ საკითხთან დაკავშირებით და იმ პრინციპების გამოყენების შესახებ, რომლებიც, როგორც გარიცხულებს, ისე კრების უარმყოფელებს ეხება.
2. ბიბლიის თანახმად, როგორ უნდა მოექცნენ ქრისტიანები კრებიდან გარიცხულებს?
2 როგორ მოვექცეთ გარიცხულებს. ღვთის სიტყვა ამბობს, რომ ქრისტიანებმა არ უნდა იქონიონ ურთიერთობა მათთან, ვინც კრებიდან გარიცხულია: „არ იქონიოთ კავშირი იმასთან [„არავისთან“, აქ], ვინც ძმად იწოდება, მაგრამ გარყვნილია, ან ხარბი, ან კერპთაყვანისმცემელი, ან მაგინებელი, ან ლოთი, ან მტაცებელი. ასეთთან არც კი ჭამოთ. . . მოიშორეთ ბოროტი თქვენგან“ (1 კორ. 5:11, 13). მათეს 18:17-ში ჩაწერილი იესოს სიტყვებიც ამავე აზრს ავითარებს: „იყოს იგი [გარიცხული] შენთვის, როგორც წარმართი და მებაჟე“. იესოს მსმენელებმა კარგად იცოდნენ, რომ იუდეველებს არანაირი ურთიერთობა არ ჰქონდათ წარმართებთან, ანუ სხვა ხალხებთან, და ერიდებოდნენ გადასახადების ამკრეფებს, რადგან მათ განდევნილებად მიიჩნევდნენ. ამგვარად, იესომ ურჩია თავის მიმდევრებს, არ ჰქონოდათ ურთიერთობა გარიცხულებთან (იხილეთ აგრეთვე 1982 წლის 1 მარტის „საგუშაგო კოშკი“, გვერდები 18—20 [რუს.] [სასწავლო სტატიები ამ ჟურნალიდან ქართულ ენაზე გამოცემულია ცალკე]).
3, 4. როგორი სახის ურთიერთობა არის აკრძალული გარიცხულებთან და კრების უარმყოფელებთან?
3 ამიტომ, ერთგულ ქრისტიანებს სულიერ საკითხებთან დაკავშირებით არავითარი კავშირი არ უნდა ჰქონდეთ კრებიდან გარიცხულებთან. მაგრამ ეს ბევრად უფრო მეტს მოიცავს. ღვთის სიტყვა აღნიშნავს: „ასეთთან არც კი ჭამოთ“ (1 კორ. 5:11). აქედან გამომდინარე ყოველდღიურ საქმეებშიც კი არ გვაქვს მათთან ურთიერთობა. თავისთავად გამოირიცხება მათთან ერთად დროის გატარება პიკნიკებზე; მეგობრულ შეხვედრებზე, ბურთის სათამაშოდ, საყიდლებზე თუ თეატრში წასვლა. ასევე, ერთ სუფრასთან ჯდომაც კი, იქნება ეს სახლში თუ რესტორანში.
4 შეიძლება თუ არა გარიცხულთან ლაპარაკი? თუმცა ბიბლიაში არ არის განხილული ყველა შესაძლო სიტუაცია, 2 იოანეს 10 (აფ) გვეხმარება ამ საკითხთან დაკავშირებით იეჰოვას თვალსაზრისის დანახვაში: „თუ ვინმე მოდის თქვენთან და არ მოაქვს ეს მოძღვრება, ნუ მიიღებთ სახლში და ნურც მიესალმებით მას“. ამ საკითხთან დაკავშირებით 1982 წლის 1 მარტის „საგუშაგო კოშკში“ ნათქვამია: «უბრალოდ „გამარჯობის“ თქმა ვინმესთან საუბრის და, შესაძლებელია, მეგობრობის დაწყების პირველ ნაბიჯს წარმოადგენდეს. ნუთუ გადავდგამთ ამ პირველ ნაბიჯს გარიცხულისკენ?»
5. რას კარგავს გარიცხული?
5 ზემოხსენებულ „საგუშაგო კოშკში“ აღნიშნული იყო: „ცხადია, რომ ქრისტიანი, რომელიც სცოდავს და ირიცხება, ბევრს კარგავს: ღვთის კეთილგანწყობილებას. . . სასიამოვნო ურთიერთობას ძმებთან და ქრისტიან ნათესავებთან შეუზღუდავ სიახლოვეს“.
6. უნდა შეწყვიტონ თუ არა ქრისტიანებმა ყველანაირი ურთიერთობა ერთ ჭერქვეშ მცხოვრებ გარიცხულ ნათესავთან? ახსენით.
6 ოჯახის წევრი. ნიშნავს თუ არა ეს, რომ ქრისტიანი, რომელიც ერთ ჭერქვეშ ცხოვრობს კრებიდან გარიცხულ ოჯახის წევრთან, უნდა მოერიდოს გარიცხულთან ლაპარაკს და არც კი უნდა ჭამოს მასთან ერთად? აგრეთვე არ ჰქონდეს არანაირი ურთიერთობა ყოველდღიურ საქმიანობაში? 1991 წლის 15 აპრილის „საგუშაგო კოშკში“ (რუს.) ნათქვამია: „თუ გარიცხული ცხოვრობს ქრისტიანულ ოჯახში, ის ძველებურად მონაწილეობს ყოველდღიურ ოჯახურ საქმეებში“. ამგვარად, ოჯახის წევრებმა უნდა გადაწყვიტონ, ჭამონ თუ არა ერთად ან რა ზომით მიიღონ მონაწილეობა ჩვეულებრივ შინაურ საქმეებში. და მაინც, ქრისტიანებს არ სურთ, რომ ძმებს, ვისთანაც მათ ურთიერთობა აქვთ, ისეთი შთაბეჭდილება შეექმნათ, თითქოს ყველაფერი ისევ ისე დარჩა, როგორც მათი ოჯახის წევრის გარიცხვამდე იყო.
7. როგორ იცვლება სულიერი ურთიერთობა, ოჯახის ერთ-ერთი წევრის გარიცხვის შემთხვევაში?
7 მაგრამ, 1982 წლის 1 მარტის „საგუშაგო კოშკი“ გარიცხულებთან და კრების უარმყოფელებთან დაკავშირებით აღნიშნავს: „ყველა სულიერი კვანძი მთლიანად წყდება. ეს სულიერი კვანძები წყდება მის ყველა ნათესავთან, მათ შორის ოჯახის უშუალო წევრებთანაც. . . ეს ნიშნავს ცვლილებებს სულიერ საკითხებზე ურთიერთობაში, რომელიც შეიძლება არსებობდა ოჯახში. მაგალითად, თუ ქმარი გარიცხულია, ცოლი და შვილები უხერხულად იგრძნობდნენ თავს ოჯახური შესწავლის ჩატარებისას ან ბიბლიის კითხვისა და ლოცვის დროს. თუ მას სურს ლოცვის წარმოთქმა, მაგალითად სადილის წინ, მას აქვს ამის უფლება თავის სახლში. მაგრამ ოჯახის დანარჩენი წევრები გულში ილოცებენ (იგავ. 28:9; ფსალმ. 118:145, 146). რა უნდა ქნან ოჯახის წევრებმა, თუ გარიცხულს დასწრება სურს ბიბლიის კითხვის ან ოჯახური შესწავლის დროს? მათ შეუძლიათ ნება დართონ მას, დაესწროს, რომ მოისმინოს, თუ არ შეეცდება ასწავლოს მათ ან გაუზიაროს თავისი რელიგიური შეხედულებები“.
8. რა პასუხისმგებლობა აკისრიათ მშობლებს მათ სახლში მცხოვრებ გარიცხულ არასრულწლოვან შვილთან დაკავშირებით?
8 არასრულწლოვანი შვილის გარიცხვის შემთხვევაში, მშობლებს არ ეხსნებათ მისი აღზრდის ვალდებულება. 1988 წლის 15 ნოემბრის „საგუშაგო კოშკში“ (ინგლ.) ვკითხულობთ: „მშობლებმა კვლავაც უნდა განაგრძონ შვილის უზრუნველყოფა საკვებით, ჩასაცმლითა და ბინით. მათ მართებთ აღზარდონ და დასაჯონ კიდეც ისინი ისე, როგორც ამას ღვთის სიტყვა მოითხოვს (იგავ. 6:20—22; 29:17). ამიტომ, მოსიყვარულე მშობლებმა უნდა ჩაატარონ შვილთან ერთად ბიბლიის საშინაო შესწავლა, თუნდაც ის გარიცხული იყოს. შესაძლოა, მან უფრო მეტი სარგებლობა მიიღოს, თუ შესწავლა მხოლოდ მას უტარდება. თუმცა, მშობლებმა შეიძლება გადაწყვიტონ, რომ გარიცხულმა ყველასთან ერთად მიიღოს ოჯახურ შესწავლაში მონაწილეობა“ (იხილეთ აგრეთვე 2001 წლის 1 ოქტომბრის „საგუშაგო კოშკი“, გვერდები 16, 17).
9. რამდენად ახლო ურთიერთობა შეუძლია ჰქონდეს ქრისტიანს გარიცხულ ნათესავთან, რომელიც ცალკე ცხოვრობს?
9 თუ გარიცხული ნათესავი ოჯახის წევრი არ არის: «თუ გარიცხული ან კრების უარმყოფელი ნათესავი ოჯახის წევრი არ არის, ამ შემთხვევაში სიტუაცია განსხვავდება, — აღნიშნულია 1988 წლის 15 აპრილის „საგუშაგო კოშკში“, გვერდი 28. — როგორც ჩანს, შესაძლებელია, რომ ამ ნათესავთან არანაირი კავშირი არ ვიქონიოთ. თუნდაც ზოგიერთი ოჯახური საქმე მოითხოვდეს გარკვეულ ურთიერთობას, უნდა ვეცადოთ, რომ ეს ურთიერთობა მინიმუმამდე დავიყვანოთ». ასეთი მოქცევა შეესაბამება ღვთის სიტყვაში მოცემულ მითითებას: „არ იქონიოთ ურთიერთობა არავისთან“, ვინც მოუნანიებელი ცოდვილია (1 კორ. 5:11, აქ). ერთგული ქრისტიანები უნდა ეცადონ, მოერიდონ ასეთ ნათესავთან ზედმეტ ურთიერთობას და საქმიანი კავშირიც კი მინიმუმამდე დაიყვანონ (იხილეთ აგრეთვე 1982 წლის 1 მარტის „საგუშაგო კოშკი“, გვერდები 29, 30).
10, 11. რაზე უნდა დაფიქრდეს ქრისტიანი, ვიდრე თავისთან საცხოვრებლად გარიცხულ ნათესავს მიიღებს?
10 „საგუშაგო კოშკი“ სხვა შემთხვევაზეც ამახვილებს ჩვენს ყურადღებას: „რა შეიძლება ითქვას იმ სიტუაციაზე, როცა გარიცხულ ახლო ნათესავს, მაგალითად შვილს ან მშობელს, რომელიც ოჯახთან ერთად არ ცხოვრობს, შინ დაბრუნება სურს? ოჯახი გადაწყვეტს, რა მოიმოქმედოს მდგომარეობისდა მიხედვით. მაგალითად, გარიცხული მშობელი შეიძლება ავად არის და აღარ შეუძლია საკუთარ თავზე ფინანსურად ან ფიზიკურად ზრუნვა. ქრისტიან შვილებს ბიბლიური და მორალური ვალდებულება აკისრიათ, დაეხმარონ მას (1 ტიმ. 5:8). . . ყველაფერი დამოკიდებულია მშობლის ნამდვილ საჭიროებებზე, მის გონება-განწყობილებასა და ოჯახის უფროსის მზრუნველობაზე თავისი ოჯახის წევრების სულიერი კეთილდღეობის მხრივ“ (1982 წლის 1 მარტის, გვერდები 28, 29).
11 რაც შეეხება შვილებს, იმავე სტატიაში ვკითხულობთ: «ზოგ შემთხვევაში ქრისტიანი მშობლები გარკვეული დროით ღებულობენ გარიცხულ შვილს, რომელსაც ფიზიკური ან ნერვული დაავადება სჭირს. მაგრამ, მშობლებმა ყოველთვის უნდა აწონ-დაწონონ მისი მდგომარეობა. გარიცხულ შვილს აღარ შეუძლია დამოუკიდებლად ცხოვრება? თუ მას უმთავრესად იოლი ცხოვრების გამო სურს დაბრუნება? რა შეიძლება ითქვას მისი ზნეობისა და გონება-განწყობილების შესახებ? „საფუარს“ ხომ არ შემოიტანდა ოჯახში? (გალ. 5:9)».
12. რა სარგებლობა მოაქვს გარიცხვის ღონისძიებას?
12 სარგებლობა, რომელიც იეჰოვასადმი ერთგულების შენარჩუნებას მოაქვს. გარიცხვასთან დაკავშირებული ბიბლიური მითითებების დაცვა და მოუნანიებელ ცოდვილთან ურთიერთობისგან თავის შეკავება ნამდვილად მოგვიტანს სარგებლობას. ეს დაიცავს კრების სისუფთავეს და ჩვენც გამოგვარჩევს, როგორც ბიბლიის მაღალზნეობრივი ნორმების დამცველებს (1 პეტ. 1:14—16). ამასთანავე დაგვიცავს ცუდი ზეგავლენისგან (გალ. 5:7—9). აგრეთვე ამით შემცოდველს საშუალება ეძლევა, სრული სარგებლობა მიიღოს ასეთი სახით დასჯისგან, ვინაიდან შეიძლება აღნიშნული სასჯელი მას „სიმართლის მშვიდობიანი ნაყოფის“ გამოღებაში დაეხმაროს (ებრ. 12:11).
13. რა ცვლილება მოახდინა ერთმა ოჯახმა და რა მოჰყვა ამას შედეგად?
13 სარაიონო კონგრესზე მოსმენილი მოხსენების შემდეგ, ერთი ძმა და მისი ტყუპისცალი და მიხვდნენ, რომ ექვსი წლის წინათ გარიცხული დედისადმი, რომელიც მათთან არ ცხოვრობდა, თავიანთი დამოკიდებულება უნდა შეეცვალათ. კონგრესის დამთავრებისთანავე, ვაჟმა დაურეკა დედას, დაარწმუნა თავის სიყვარულში და აუხსნა, რომ ვეღარ დაელაპარაკებოდა მას, თუ ამას აუცილებლობა არ მოითხოვდა. ძალიან მალე, დედამ დაიწყო კრების შეხვედრებზე დასწრება და საბოლოოდ აღდგა. მისმა ურწმუნო ქმარმაც დაიწყო ბიბლიის შესწავლა და გარკვეული დროის შემდეგ მოინათლა კიდეც.
14. რატომ უნდა დავუჭიროთ ერთგულად მხარი გარიცხვის ღონისძიებას?
14 ბიბლიაზე დაფუძნებული გარიცხვის ღონისძიებისადმი მხარდაჭერა ცხადყოფს, რომ გვიყვარს იეჰოვა და საშუალებას ვაძლევთ, რომ პასუხი გასცეს ღვთის მაგინებლებს (იგავ. 27:11). დარწმუნებული უნდა ვიყოთ, რომ იეჰოვა გვაკურთხებს. მეფე დავითი იეჰოვას შესახებ წერდა: «მისი წესებისთვის არ გადამიხვევია. . . მოწყალესთან მოწყალეობ, წრფელ კაცთან წრფელობ [„ერთგულთან ერთგულებ“, აქ]» (2 მეფ. 22:23, 26).