წინასწარ მომზადებით გამოავლინე პირადი ინტერესი
1 მსახურებისთვის კარგი მომზადება სხვებისადმი ინტერესის გამოვლენაში დაგვეხმარება. როგორ? როდესაც კარგად ვართ მომზადებულები, შეთავაზების ნაცვლად უფრო მეტ ყურადღებას მობინადრეზე გადავიტანთ. ამასთანავე, აღარ ვინერვიულებთ და გულწრფელად შევძლებთ საუბარს. როგორ შეგვიძლია ეფექტური შეთავაზების მომზადება?
2 გამოიყენე სათანადო შეთავაზება. შეარჩიე 2006 წლის იანვრის „ჩვენი სამეფო მსახურებიდან“ ერთ-ერთი შეთავაზება, რომელიც შესაფერისი იქნება შენი უბნისთვის და დაფიქრდი, შენი სიტყვებით როგორ იტყოდი მას. შეთავაზება შენს ტერიტორიას მოარგე. მაგალითად, თუ ხშირად ხვდები გარკვეული რელიგიის ან ეთნიკური წარმოშობის ადამიანებს, დაფიქრდი, რა საკითხმა შეიძლება დააინტერესოს ისინი. შეთავაზება მობინადრის ინტერესების შესაბამისად შეცვალე, რითაც გულწრფელ ინტერესს გამოავლენ მისადმი (1 კორ. 9:22).
3 ვიდრე შეთავაზებას გამოიყენებ, კარგად მოემზადე. რადგან შესავალი სიტყვები განსაკუთრებით მნიშვნელოვანია, ყურადღება მიაქციე, ხალხი როგორ გამოეხმაურება შეთავაზების შესავალს. დააინტერესებთ მათ ეს თემა? აღძრავს მსმენელს დასმული კითხვა პასუხის გაცემისკენ? წინააღმდეგ შემთხვევაში შეცვალე შეთავაზება.
4 დამახსოვრებისთვის დამხმარე საშუალებები. ბევრმა აღმოაჩინა, რომ მობინადრის კართან დგომისას რთულია შეთავაზების გახსენება. თუ შენც მსგავსი რამ გემართება, უკეთესი ხომ არ იქნება, მობინადრესთან მისვლამდე სხვა მაუწყებელთან გაიმეორო ეს შეთავაზება? ასეთი სახით ძირითად აზრს დაიმახსოვრებ და მობინადრესთან მარტივად, ლოგიკურად წარადგენ. ეს აგრეთვე დაგეხმარება, ადვილად გაართვა თავი მობინადრეთა მხრიდან სხვადასხვანაირ გამოხმაურებას.
5 დამახსოვრების კიდევ ერთი საშუალებაა შეთავაზების მოკლედ დაწერა; მას კართან მისვლამდე გადახედავ. ზოგი მაუწყებელი აღნიშნავს, რომ ასეთი ჩანაწერების შედეგად უფრო მშვიდად არიან და გაცილებით თავისუფლად საუბრობენ. ასეთი სახით კარგად მომზადებული შეთავაზებები დაგვეხმარება, სხვებისადმი ინტერესი გამოვავლინოთ და ამგვარად, სასიხარულო ცნობა უკეთესად შევთავაზოთ.