ᲠᲝᲒᲝᲠ ᲒᲐᲕᲗᲐᲕᲘᲡᲣᲤᲚᲓᲔᲗ ᲡᲘᲫᲣᲚᲕᲘᲚᲘᲡᲒᲐᲜ?

4 | ღმერთი გაგამარჯვებინებთ სიძულვილზე!

ბიბლიაში ნათქვამია:

„სულის ნაყოფია: სიყვარული, სიხარული, მშვიდობა, სულგრძელობა, სიკეთე, სიკარგე, რწმენა, რბილი ხასიათი და თავშეკავება“ (ᲒᲐᲚᲐᲢᲔᲚᲔᲑᲘ 5:22, 23).

რას ნიშნავს ეს სიტყვები:

ღვთის დახმარებით სიძულვილისგან გათავისუფლება შესაძლებელია. მისი წმინდა სული ისეთ თვისებებს შეგვძენს, რომელთა განვითარებაც საკუთარი ძალით გაგვიჭირდებოდა. ამიტომ ღმერთს უნდა ვთხოვოთ დახმარება, რომ გავთავისუფლდეთ სიძულვილისგან. თუ ასე მოვიქცევით, მოციქული პავლეს მსგავსად, ჩვენც თამამად ვიტყვით: „ყველაფრის ძალა შემწევს ჩემი განმამტკიცებლის დახმარებით“; და გავიზიარებთ ფსალმუნმომღერლის სიტყვებს: „ჩემი შველა იეჰოვასგან მოვა“ (ფილიპელები 4:13; ფსალმუნი 121:2).

როგორ დაგეხმარებათ ეს პრინციპი:

„იეჰოვას დახმარებით ერთ დროს დაუნდობელი მოძალადე მშვიდობიანი ადამიანი გავხდი“ (ᲕᲐᲚᲓᲝ).

სთხოვეთ იეჰოვას წმინდა სული, რომ მისი მოსაწონი თვისებები განივითაროთ (ლუკა 11:13). გაიგეთ, რას ამბობს ბიბლია სიყვარულზე, მშვიდობაზე, მოთმინებასა და თავშეკავებაზე; ამ თვისებების განვითარება სიძულვილისგან გაგათავისუფლებთ. დაუმეგობრდით მათ, ვინც ძალ-ღონეს არ იშურებს ამ თვისებების განსავითარებლად. მათთან ურთიერთობა „სიყვარულისა და კარგი საქმეებისკენ“ წაგახალისებთ (ებრაელები 10:24).

რეალური შემთხვევა

ვალდომ გაიმარჯვა სიძულვილზე

ვალდოს მძიმე ბავშვობა ჰქონდა, რის გამოც გული სიძულვილით აევსო. ის გვიყვება: „ხშირად ქუჩურ ჩხუბში ვებმებოდი ნარკოდილერებთან, რომლებმაც არაერთხელ სცადეს ჩემი მოკვლა. ერთხელ ერთმა ბანდამ ჩემ მოსაკლავად ბოროტმოქმედიც კი დაიქირავა. მან დანა დამარტყა, მაგრამ როგორღაც მოვახერხე გაქცევა“.

ვალდოს არ მოეწონა, როცა მისმა ცოლმა იეჰოვას მოწმეებთან ბიბლიის შესწავლა დაიწყო. ის განაგრძობს: „მოწმეებს ვერ ვიტანდი, მათ ხშირად ვუყვიროდი და ვაგინებდი, მაგრამ ჩემდა გასაკვირად ისინი ყოველთვის სიმშვიდეს ინარჩუნებდნენ“.

მოგვიანებით მანაც დაიწყო ბიბლიის შესწავლა. როგორც თავად ამბობს, ძალიან უჭირდა ნასწავლის გამოყენება; ფიქრობდა, რომ აგრესიულ ხასიათს ვერასდროს შეიცვლიდა. თუმცა ბიბლიიდან ნასწავლი მას ძირეული ცვლილებების მოხდენაში დაეხმარა.

ვალდო განაგრძობს: „ერთხელ ალეხანდრომ, რომელიც ბიბლიის შესწავლაში მეხმარებოდა, მთხოვა, გალატელების 5:22, 23 მუხლები წამეკითხა. ალეხანდრომ ამიხსნა, რომ ამ თვისებების გამოვლენას მხოლოდ ჩემი ძალით ვერ შევძლებდი. ეს ღვთის წმინდა სულით იქნებოდა შესაძლებელი. ამის გაგებამ მთლიანად შემიცვალა თვალსაზრისი“.

იეჰოვამ ვალდოს სიძულვილზე გაამარჯვებინა. ის ამბობს: „ნათესავებს და ყოფილ მეგობრებს უკვირთ, რომ ასე შევიცვალე. იეჰოვას დახმარებით ერთ დროს დაუნდობელი მოძალადე მშვიდობიანი ადამიანი გავხდი“.