რის საფუძველზე უნდა ვენდოთ ბიბლიას
2. გულწრფელობა და პატიოსნება
ნდობის მოსაპოვებლად პატიოსნებაა საჭირო. პატიოსანი ადამიანი ადვილად მოიპოვებს ნდობას, მაგრამ ერთხელ მაინც თუ იცრუებს, შეიძლება რეპუტაცია შეელახოს.
ბიბლიის დამწერები პატიოსანი ადამიანები იყვნენ და ყველაფერს გულწრფელად წერდნენ. მათი გულწრფელობა იმაში გამოვლინდა, რომ სინამდვილე აღწერეს.
შეცდომები და სისუსტეები. ბიბლიის დამწერები გულწრფელად აღიარებდნენ თავიანთ შეცდომებსა და სისუსტეებს. მაგალითად, მოსემ ისეთი სერიოზული შეცდომა აღიარა, რომლის ჩადენაც ძვირად დაუჯდა (რიცხვები 20:7—13). ასაფს არ დაუმალავს, რომ შურდა ბოროტი ადამიანების, რომლებიც ფუფუნებაში ცხოვრობდნენ (ფსალმუნი 73:1—14). იონამაც გულწრფელად აღიარა, რომ ღვთისადმი დაუმორჩილებლობა გამოავლინა. მან ისიც აღიარა, რომ არ ესიამოვნა, როდესაც ღმერთმა მომნანიებელი შემცოდველები შეიწყალა (იონა 1:1—3; 3:10; 4:1—3). მათესაც არ დაუმალავს, რომ მიატოვა იესო დაპატიმრების ბოლო ღამეს (მათე 26:56).
ებრაული წერილების დამწერებმა აღიარეს, რომ მათმა თანამემამულეებმა არაერთხელ გამოავლინეს დრტვინვისა და ურჩობის სული (2 მატიანე 36:15, 16). მათ თავიანთი ქვეყნის მმართველებსაც კი არ დააფარეს ხელი (ეზეკიელი 34:1—10). გულწრფელობა მოციქულების წერილებიდანაც ჩანს. მათ ის სერიოზული შეცდომები მოიხსენიეს, რომლებსაც ზოგი ქრისტიანი ჩადიოდა, მათ შორის პასუხისმგებელი ძმები (1 კორინთელები 1:10—13; 2 ტიმოთე 2:16—18; 4:10).
ფაქტები შელამაზების გარეშე. ბიბლიის დამწერებს არც კი უცდიათ, შეელამაზებინათ ერთი შეხედვით დამამცირებელი ფაქტები. ისინი არ მალავდნენ იმას, რომ ხალხი მათ სულელებად თვლიდა და ზემოდან უყურებდა (1 კორინთელები 1:26—29). არც იმას მალავდნენ, რომ ხალხი იესოს მოციქულებს „უსწავლელ და უბრალო“ ადამიანებად მიიჩნევდა (საქმეები 4:13).
სახარების დამწერებს არც იმ მიზნით შეულამაზებიათ ფაქტები, რომ იესო სხვების თვალში დამცირებულად არ წარმოჩენილიყო. მათ გულახდილად დაწერეს, რომ იესო გლეხის ოჯახში დაიბადა და მას განათლება არ ჰქონდა მიღებული იმ დროისათვის პრესტიჟულ სასწავლებლებში, და რომ უმრავლესობა არ უსმენდა მას (მათე 27:25; ლუკა 2:4—7; იოანე 7:15).
როგორც დავინახეთ, ბიბლიის დამწერები გულახდილი ადამიანები იყვნენ. განა ეს ბიბლიისადმი ნდობით არ განგვაწყობს?!
[სურათი 6 გვერდზე]
ბიბლიის დამწერებს, მაგალითად იონას, არ დაუმალავთ საკუთარი შეცდომები