ახალგაზრდების შეკითხვები

შევძლებ დამოუკიდებლად ცხოვრებას?

„ხანდახან მგონია, ალმაცერად მიყურებენ იმის გამო, რომ 19 წლის ვარ და ჯერ კიდევ მშობლებთან ვცხოვრობ. თუ დამოუკიდებლად არ იცხოვრებ, სერიოზულ ადამიანად არავინ აღგიქვამს“ (ქეთი).a

„მალე 20 წლის გავხდები. ნერვები მეშლება, რომ იმას ვერ ვაკეთებ, რაც მსურს. სახლიდან მინდა წასვლა, რადგან ყელში ამომივიდა მშობლების ჭკუაზე სიარული და იმის მოსმენა, რომ მათ უკეთ იციან, რა არის ჩემთვის კარგი“ (ფიონა).

არაფერია იმაში გასაკვირი, თუ დამოუკიდებლად ცხოვრება გსურს. ღვთის თავდაპირველი განზრახვა სწორედ ის იყო, რომ ახალგაზრდებს ერთ მშვენიერ დღეს მიეტოვებინათ დედ-მამა და დამოუკიდებლად ეცხოვრათ (დაბადება 2:23, 24; მარკოზი 10:7, 8). მაგრამ საკმარისია მხოლოდ ცალკე ცხოვრების სურვილი? როგორ შეგიძლია განსაზღვრო, შეძლებ თუ არა დამოუკიდებლად ცხოვრებას? ქვემოთ განვიხილავთ სამ მნიშვნელოვან კითხვას. პირველი კითხვა:

რა მოტივები მაქვს?

ქვემოთ ჩამოთვლილი მიზეზები დაგანახვებს, რატომ გსურს ცალკე ცხოვრება. თანმიმდევრულად დანომრე იმის მიხედვით, რა უფრო მნიშვნელოვანია შენს შემთხვევაში:

․․․ ოჯახური პრობლემებისგან თავის დაღწევა

․․․ მეტი თავისუფლების სურვილი

․․․ მეგობრების კეთილგანწყობის მოპოვება

․․․ მეგობართან ერთად ცალკე საცხოვრებლად გადასვლა

․․․ მსახურების მიზნით სხვა ტერიტორიაზე ნებაყოფლობით გადასვლა

․․․ დამოუკიდებელი ცხოვრებისთვის საჭირო გამოცდილების შეძენა

․․․ მშობლებისთვის ტვირთის შემსუბუქება

․․․ სხვა ․․․

აქ ჩამოთვლილი მიზეზებიდან ვერც ერთზე ვერ ვიტყვით, რომ აზრს მოკლებულია. მაგრამ რაც უნდა იყოს მშობლებისგან წასვლის მიზეზი, გაითვალისწინე, რომ შენი გადაწყვეტილება დიდ გავლენას მოახდენს შენს მომავალზე. მაგალითად, თუ იმ მიზნით ტოვებ სახლს, რომ პრობლემებს გაექცე ან მეტი თავისუფლება მოიპოვო, ადვილი შესაძლებელია, მოულოდნელ სირთულეებს წააწყდე.

დანიელამ, რომელმაც 20 წლის ასაკში დატოვა მშობლიური სახლი, ბევრი რამ ისწავლა საკუთარი გამოცდილებიდან. იგი ამბობს: „რაღაცაში ყოველთვის ვართ შეზღუდული. როცა დამოუკიდებლად ცხოვრობ, სამუშაოს გრაფიკი ან მცირე შემოსავალი არ გაძლევს იმის საშუალებას, რომ ყველაფერი შენი სურვილისამებრ აკეთო“. კარმენი, რომელიც ექვსი თვით გადავიდა სხვა ქვეყანაში, ყვება: „მომწონდა დამოუკიდებლად ყოფნა, მაგრამ ხშირად არ მქონდა თავისუფალი დრო. ყველაფერი ჩემი გასაკეთებელი იყო, იქნებოდა ეს სახლის დალაგება, რამის შეკეთება, ბაღის მოვლა, ტანსაცმლის გარეცხვა თუ სხვა“.

თუ სახლიდან წახვალ, მეტი თავისუფლება გექნება და შეიძლება მეგობრების თვალში მაგარი გამოჩნდე. მაგრამ შეძლებ დამოუკიდებლად გადასახადების გადახდას, საჭმლის მომზადებას, სახლის დალაგებას და თუნდაც მეგობრებისა თუ ოჯახის წევრების გარეშე დროის გატარებას? ამიტომ, ნუ დაუშვებ, რომ სხვებმა ნაჩქარევად მიგაღებინონ გადაწყვეტილება (იგავები 29:20). მაშინაც კი, თუ კარგი მოტივით გინდა სახლიდან წასვლა, მხოლოდ ეს არ არის საკმარისი. შენ უნდა შეგეძლოს საკუთარი თავის რჩენა. მეორე კითხვა:

ვარ მზად?

დამოუკიდებლად ცხოვრება ველურ ბუნებაში ხეტიალის მსგავსია. გაემგზავრებოდი მიუვალ ადგილას, თუ არ იცი კარვის გაშლა, ცეცხლის დანთება, საჭმლის მომზადება ან რუკის გამოყენება? ბევრმა ახალგაზრდამ ელემენტარულიც კი არ იცის, მაგრამ მაინც გადადის ცალკე საცხოვრებლად.

ბრძენმა მეფე სოლომონმა თქვა: „წინდახედული აკვირდება თავის ნაბიჯებს“ (იგავები 14:15). იმისათვის, რომ განსაზღვრო, შეგიძლია თუ არა დამოუკიდებლად ცხოვრება, ტექსტში აღნიშნე, რისი გაკეთება იცი ✔ და რისი სწავლა გჭირდება

◯ ფულის ყაირათიანად ხარჯვა „არასდროს მიწევდა გადასახადების გადახდა, — ამბობს 19 წლის სერენა. — მეშინია ცალკე ცხოვრების, რადგან შეიძლება უაზროდ შემომეხარჯოს ფული“. როგორ შეგიძლია ისწავლო ფულის ყაირათიანად ხარჯვა?

ბიბლიურ იგავში ნათქვამია: „ბრძენი მოისმენს და მეტს ისწავლის“ (იგავები 1:5). კარგი იქნება, თუ მშობლებს ჰკითხავ, რა თანხაა ყოველთვიურად საჭირო ქირის გადასახდელად, პროდუქტების საყიდლად, მანქანის მოსავლელად და მგზავრობის ხარჯების დასაფარავად. აგრეთვე სთხოვეთ მშობლებს, დაგეხმარონ თანხების სწორად განაწილებაში. რატომ არის მნიშვნელოვანი ფულის ეკონომიურად ხარჯვა? კევინი ამბობს: „როცა დამოუკიდებლად ცხოვრებას დაიწყებ, ძალიან ბევრი გაუთვალისწინებელი ხარჯი გექნება. თუ წინდახედულობას არ გამოიჩენ, ასეთი ხარჯების დასაფარავად მუშაობაში დღე-ღამის გასწორება მოგიწევს“.

გინდა ცალკე გადასვლით აუტკივარი თავი აიტკიო? თუ მუშაობ, რაღაც პერიოდი მშობლებს მიეცი შენი ხელფასის ნაწილი, რაც საჭიროა ყოველთვიურად საკვებისთვის, ქირისა თუ სხვა ხარჯების დასაფარავად. თუ მშობლებთან ცხოვრების დროს ვერ შეძლებ, ირჩინო თავი ან არ გექნება ამის სურვილი, გამოდის, რომ არა ხარ მზად დამოუკიდებელი ცხოვრებისთვის (2 თესალონიკელები 3:10, 12).

◯ საოჯახო საქმეების კეთება როგორც 17 წლის ბრაიენი ამბობს, ყველაზე მეტად სახლიდან წასვლა იმიტომ არ უნდა, რომ თავად მოუწევს ტანსაცმლის რეცხვა. როგორ შეგიძლია გაიგო, მზად ხარ თუ არა დამოუკიდებელი ცხოვრებისთვის? 20 წლის არენი თანატოლებს ურჩევს: „შეეცადე ერთი კვირა დამოუკიდებლად იცხოვრო. ყველაფერი შენი ხელფასით იყიდე; ჭამე მხოლოდ ის, რასაც თავად მოამზადებ; ჩაიცვი შენი გარეცხილი და დაუთოებული ტანსაცმელი; თავად გააკეთე ის, რაც შენი გასაკეთებელია სახლში; ტრანსპორტის ხარჯები თავად დაფარე“. ამ რჩევების გათვალისწინება ორ რამეში წაგადგება: 1) ბევრ რამეს ისწავლი და 2) უფრო დააფასებ მშობლების შრომას.

◯ სხვებთან ურთიერთობა კარგი ურთიერთობა გაქვს მშობლებთან და და-ძმებთან? თუ ასე არ არის, შეიძლება იფიქრო, რომ მეგობართან გადასვლით გაიიოლებ ცხოვრებას. ნახე, რას ამბობს 18 წლის ივი: „ჩემმა ორმა მეგობარმა ერთად ცხოვრება გადაწყვიტა. ისინი საუკეთესო მეგობრები იყვნენ, მაგრამ როცა ერთად დაიწყეს ცხოვრება, გაუგებრობებმა იჩინა თავი. ერთს ძალიან უყვარდა სისუფთავე, მეორე კი მოუწესრიგებელი იყო. ერთი სულიერად მოწიფული იყო, მეორე კი — არა. ისინი ვერ შეეგუვნენ ერთმანეთს“.

18 წლის ერინს ძალიან უნდა ცალკე ცხოვრება. ის ამბობს: „ოჯახის წევრებთან ურთიერთობა გასწავლის, როგორ მოეპყრო სხვებს, როგორ გადაჭრა პრობლემები და როგორ წახვიდე დათმობაზე. ისინი, ვინც სახლიდან იმ მიზნით მიდიან, რომ მშობლებთან გაუგებრობებს აარიდონ თავი, პრობლემების გადაჭრას კი არ სწავლობენ, არამედ გაურბიან მათ“.

◯ სულიერი საქმეებისთვის დროის გამოყოფა ზოგი სახლიდან იმის გამო მიდის, რომ არ სურს მშობლების რელიგიური შეხედულებები გაიზიაროს. ზოგი კი იმ მიზნით იწყებს დამოუკიდებლად ცხოვრებას, რომ ბიბლიის შესწავლის კარგი ჩვევა განივითაროს და უფრო გულმოდგინედ ემსახუროს ღმერთს, მაგრამ კარგის ნაცვლად ცუდი ჩვევები უვითარდება. როგორ უნდა მოიქცე, ‘შენი რწმენა ხომალდივით რომ არ დაიმსხვრეს’? (1 ტიმოთე 1:19).

ბრმად ნუ მიყვები მშობლების რელიგიას! იეჰოვა ღმერთს სურს, რომ თითოეული ჩვენგანი თავად დავრწმუნდეთ იმაში, რასაც ბიბლიიდან ვსწავლობთ (რომაელები 12:1, 2). შეადგინე ბიბლიის შესწავლის კარგი გეგმა და მიჰყევი მას. კალენდარში აღნიშნე, რა როდის გაქვს დაგეგმილი და დააკვირდი, შეძლებ თუ არა თვის მანძილზე ამ გეგმის მიყოლას მშობლების შეხსენების გარეშე.

და ბოლოს, დაფიქრდი მესამე კითხვაზე:

რა მიზნები მაქვს?

ზოგი, ვინც სახლიდან მიდის, სურს, მშობლებზე აღარ იყოს დამოკიდებული და ოჯახურ პრობლემებს გაერიდოს. ასეთ დროს ისინი არ ფიქრობენ, რომ თავზე ახალ პრობლემებს დაიტეხენ. ეს იმის მსგავსია, რომ მანქანის ტარებისას მხოლოდ უკანა ხედვის სარკეში იყურებოდე და არა — წინ. ერთი სული ნუ გექნება, როდის გაიქცევი სახლიდან, ამის ნაცვლად, დაისახე ღირებული მიზნები.

ზოგი ახალგაზრდა, რომელიც იეჰოვას მოწმეა, მსახურების გასაფართოებლად დაშორებულ ტერიტორიაზე ან სხვა ქვეყანაში გადადის. სხვები იმ მიზნით მიდიან სახლიდან, რომ თაყვანისმცემლობისთვის განკუთვნილი შენობებისა თუ იეჰოვას მოწმეთა ფილიალების აშენებაში მიიღონ მონაწილეობა. ზოგს იმიტომ უნდა მშობლიური სახლის დატოვება, რომ დაქორწინებამდე დამოუკიდებლად ცხოვრებას მიეჩვიოს.b

დაწერეთ, რატომ გინდათ ცალკე ცხოვრება და რა მიზნის მიღწევა გსურთ. ․․․․․

ზოგი ახალგაზრდა შეიძლება მშობლების სახლში დარჩეს, მაგრამ არაფერი ისწავლოს და არც სულიერად გაიზარდოს. ამიტომ, ნაჩქარევად ნუ მიიღებ გადაწყვეტილებას. კარგად აწონ-დაწონე ყველაფერი. ბიბლიურ იგავში ვკითხულობთ: „მუყაითის გეგმები წარმატებულია, მოჩქარე კი სიდუხჭირეში იქნება“ (იგავები 21:5). მოუსმინე მშობლებს და გაითვალისწინე მათი რჩევა (იგავები 23:22). ილოცე ამ საკითხზე და სანამ რამეს გადაწყვეტ, სტატიაში განხილულ ბიბლიურ პრინციპებს გაეცანი.

სათქმელად ადვილია სახლიდან წასვლა, მაგრამ რეალურად რამდენად შეძლებ თავის რჩენას? თუ თვლი, რომ დამოუკიდებლად იცხოვრებ, შეგიძლია გადახვიდე ცალკე საცხოვრებლად.

სხვა სტატიები რუბრიკიდან „ახალგაზრდების შეკითხვები“ იხილე ვებ-გვერდზე www.watchtower.org/ype

[სქოლიო]

დაფიქრდი

● რატომ არის კარგი მშობლიურ სახლში დარჩენა მაშინაც კი, თუ გიჭირს მშობლებთან ცხოვრება?

● სანამ მშობლებთან ერთად ერთ ჭერქვეშ ცხოვრობ, რა შეგიძლია ისწავლო ისეთი, რომ დღესვე გამოადგე მშობლებს და თავადაც წაგადგეს მომავალში?

[ჩარჩო⁄სურათები 11 გვერდზე]

შენი თანატოლები ამბობენ . . .

„როდესაც მშობლები ისეთ რამეს გავალებენ, რისი გაკეთებაც მარტო ცხოვრებისას აუცილებლად მოგიწევს, შესაძლებლობა გეძლევა, ეს გაცილებით მშვიდ გარემოში, მშობლების სახლში ისწავლო“.

„ცალკე ცხოვრების სურვილში გასაკვირი არაფერია, მაგრამ თუ ამას მხოლოდ იმიტომ აკეთებ, რომ თავი შეზღუდულად არ იგრძნო, ესე იგი, მზად არ ხარ დამოუკიდებელი ცხოვრებისთვის“.

[სურათები]

სარა

არენი

[ჩარჩო 13 გვერდზე]

მშობლების საყურადღებოდ

სტატიაში მოხსენიებულ სერენას ეშინოდა ცალკე ცხოვრების. ის ამბობს, რა იყო ამის მიზეზი: „თუ ჩემი ფულით რაღაცის ყიდვა მინდოდა, მამა არ მაძლევდა ამის უფლებას. ის თვლიდა, რომ ეს მისი მოვალეობა იყო. ვერც კი შევბედავდი თანხის შეთავაზებას“. სერენას მამას, უეჭველად, კარგი უნდოდა შვილისთვის, მაგრამ ასე მხოლოდ დათვურ სამსახურს უწევდა თავის ქალიშვილს და არ ასწავლიდა დამოუკიდებლად ცხოვრებას (იგავები 31:10, 18, 27).

ზედმეტად ხომ არ ეფოფინებით შვილებს? აძლევთ მათ საშუალებას, დამოუკიდებლად ისწავლონ ცხოვრება? კვლავ განვიხილოთ სტატიაში მოცემული ოთხი საკითხი.

ფულის ყაირათიანად ხარჯვა. იციან თქვენმა უფროსმა შვილებმა, სად გადაიხადონ გადასახადები ან გადასახადებთან დაკავშირებული ადგილობრივი კანონები? (რომაელები 13:7). იციან მათ, როგორ ისარგებლონ კრედიტით ისე, რომ ვალები არ დაიდონ? (იგავები 22:7). შეუძლიათ სწორად გაანაწილონ ხელფასი და თვიდან თვემდე იმყოფინონ? (ლუკა 14:28—30). თავიანთი სიამოვნებისთვის ხარჯავენ ფულს თუ უყვართ გაცემა? გამოყოფენ დროსა და სახსრებს სხვების დასახმარებლად? (საქმეები 20:35).

საოჯახო საქმეების კეთება. იციან თქვენმა შვილებმა საჭმლის მომზადება? ასწავლეთ მათ ტანსაცმლის რეცხვა და დაუთოება? თუ მანქანა ჰყავთ, შეუძლიათ დამოუკიდებლად მისი მოვლა, მაგალითად ზეთის, დამცველების ან საბურავების გამოცვლა?

სხვებთან ურთიერთობა. როდესაც შვილებს ვინმესთან უთანხმოება წამოეჭრებათ, ყოველთვის თქვენ ხომ არ გამოდიხართ მოსამართლის როლში და მათ ნაცვლად ხომ არ იღებთ საბოლოო გადაწყვეტილებას? თუ ასწავლით, პრობლემები თავად მოაგვარონ მშვიდობიანად და მხოლოდ ამის შემდეგ გითხრან, როგორ შეძლეს უთანხმოების მოგვარება? (მათე 5:23—25).

სულიერი საქმეებისთვის დროის გამოყოფა. თავს ხომ არ ახვევთ შვილებს თქვენს რწმენას? (2 ტიმოთე 3:14, 15). ნაცვლად იმისა, რომ რელიგიურ და ზნეობრივ საკითხებში მათ მაგივრად მიიღოთ გადაწყვეტილებები, უმჯობესია, ასწავლოთ, განივითარონ „აღქმის უნარი“, რათა გაწაფონ „ის კარგისა და ცუდის გასარჩევად“ (იგავები 1:4; ებრაელები 5:14). გინდათ, რომ შვილები თქვენი ბიბლიის შესწავლის გეგმას მიჰყვნენ თუ აძლევთ საშუალებას, თავად გადაწყვიტონ, როგორი გეგმა ექნებათ?

უდავოა, შვილების აღზრდა დროსა და ძალისხმევას მოითხოვს. მაგრამ, როცა ერთ მშვენიერ დღეს ისინი მშობლიურ სახლს დატოვებენ და დამოუკიდებლად ცხოვრებას დაიწყებენ, დაინახავთ, რომ თქვენს შრომას უკვალოდ არ ჩაუვლია.

[სურათი 12 გვერდზე]

დამოუკიდებლად ცხოვრება ველურ ბუნებაში ხეტიალის მსგავსია. ასეთ მიუვალ ადგილას გამგზავრებამდე ბევრი რამის ცოდნაა საჭირო