აფრიკა ყურადღების ცენტრში

მარტორქებზე ბრაკონიერობა

2013 წელს სამხრეთ აფრიკის რესპუბლიკაში არალეგალურად 1 004 მარტორქა მოკლეს, მაშინ როცა 2007 წელს ბრაკონიერობას მხოლოდ 13 მარტორქა შეეწირა. მიუხედავად იმისა, რომ შავ ბაზარზე მარტორქის რქის მიწოდება ასე გაიზარდა, მასზე მოთხოვნა კვლავაც იმდენად მაღალია, რომ 1 კგ რქა შესაძლოა 1 კგ ოქროზე ძვირიც კი ღირდეს. ზოგჯერ ერთი რქის ფასი ნახევარ მილიონ დოლარამდეც კი აღწევს.

დაფიქრდით: შეძლებენ ოდესმე სახელმწიფოები ბოლო მოუღონ უკანონობას? (იერემია 10:23).

გაუხმაურებელი მექრთამეობა

მსოფლიოში მექრთამეობის ყველაზე მაღალი მაჩვენებელი აღმოსავლეთ აფრიკის ქვეყნებში ფიქსირდება, — განაცხადა ანტიკორუფციულმა ორგანიზაციამ „საერთაშორისო გამჭვირვალობა“. თუმცა იმ ადამიანების დაახლოებით 90 პროცენტი, რომლებიც მექრთამეობას აწყდებიან, არ ახმაურებენ ასეთ ფაქტებს. ამ ორგანიზაციის კენიის ფილიალის წარმომადგენელი ამბობს: „მოქალაქეები, როგორც ჩანს, არ ენდობიან საკუთარ ხელისუფლებას, რადგან ფიქრობენ, რომ მთავრობა მაინც არაფერს იღონებს კორუფციის აღმოსაფხვრელად“.

რას ამბობს ბიბლია: „ქრთამი თვალხილულს აბრმავებს“ (გამოსვლა 23:8).

აფრიკა ონლაინში

„საერთაშორისო ტელეკომუნიკაციების კავშირის“ ვარაუდით, 2014 წლის ბოლოსთვის აფრიკელთა თითქმის 20% ისარგებლებდა ინტერნეტით. თუმცა აფრიკაში მობილური ინტერნეტის მომხმარებელთა რიცხვი ორჯერ უფრო სწრაფად იზრდება, ვიდრე დანარჩენ მსოფლიოში.