თავი 9
იეჰოვას სიტყვა სწრაფად ვრცელდება (1976—1992)
„ბოლოს, ძმებო, ილოცეთ ჩვენთვის, რომ იეჰოვას სიტყვა სწრაფად გავრცელდეს და განდიდდეს, როგორც ეს თქვენ შორის ხდება“ (2 თეს. 3:1).
ამ სიტყვებით პავლე მოციქულმა სთხოვა თესალონიკელ თანამორწმუნეებს, ელოცათ, რომ მას და მის თანამსახურებს დაუბრკოლებლად ექადაგათ იეჰოვას სიტყვა. იეჰოვამ შეისმინა მათი ლოცვა. მაგრამ ეს იმას არ ნიშნავდა, რომ მოციქულს სირთულეები არ შეხვედრია. ის სერიოზულ წინააღმდეგობას წააწყდა როგორც ქვეყნიერების, ისე ცრუ ძმების მხრიდან (2 კორ. 11:23—27; გალ. 2:4, 5). მიუხედავად ამისა, დაახლოებით ათი წლის შემდეგ პავლემ დაწერა, რომ ღვთის წყალობით სასიხარულო ცნობა ნაყოფსაც იძლეოდა და ვრცელდებოდა კიდეც მთელ მსოფლიოში (კოლ. 1:6).
დღეს, როგორც არასდროს, სასიხარულო ცნობა ვრცელდება და ნაყოფს იძლევა. ახლა უფრო მეტი ადამიანი ისმენს და ეხმაურება მას, ვიდრე ოდესმე. სწრაფად სრულდება ის, რაც ღვთის სიტყვაში იყო ნაწინასწარმეტყველები (ეს. 60:22).
ორგანიზაციული ცვლილებები
1976 წლისთვის ძმა ნორი უკვე 30 წელზე მეტი ხნის მანძილზე გულმოდგინედ ასრულებდა საზოგადოება „საგუშაგო კოშკის“ პრეზიდენტის მოვალეობას. მან მრავალჯერ შემოიარა მსოფლიო, რათა გაემხნევებინა მისიონერები და მეტი ესწავლებინა ბეთელის ოჯახის წევრებისთვის. მან საკუთარი თვალით ნახა მოწმეების საოცარი ზრდა, რომელთა რაოდენობაც 1942 წლიდან 1976 წლამდე 117 209-დან 2 248 390-მდე გაიზარდა.
1976 წლის ზაფხულში 71 წლის ნეითან ნორმა შეამჩნია, რომ უჭირდა წონასწორობის შენარჩუნება და აქეთ-იქით საგნებს ეჯახებოდა. სამედიცინო გამოკვლევამ აჩვენა, რომ მას ტვინის სიმსივნე ჰქონდა, რომელიც ოპერაციას არ ექვემდებარებოდა. რამდენიმე თვის მანძილზე ძმა ნორი ცდილობდა, მუშაობა გაეგრძელებინა, მაგრამ მისი მდგომარეობა არასახარბიელო იყო. შეუშლიდა ხელს მისი ავადმყოფობა ღვთის საქმის წინსვლას?
1971 წლიდან ხელმძღვანელ საბჭოს ახალი წევრები ემატებოდა. 1975 წლისთვის მასში უკვე 17 წევრი იყო. თითქმის მთელი ამ წლის მანძილზე ხელმძღვანელი საბჭო ლოცულობდა და ფიქრობდა, როგორ შეიძლებოდა საუკეთესოდ ეზრუნათ იმ ყველაფერზე, რაც მსოფლიო სამქადაგებლო და სწავლების საქმეს უკავშირდებოდა და რაც, ღვთის სიტყვის მიხედვით, ჩვენს დღეებში უნდა შესრულებულიყო (მათ. 28:19, 20). 1975 წლის 4 დეკემბერს ხელმძღვანელმა საბჭომ ერთხმად მოიწონა იეჰოვას მოწმეთა თანამედროვე ისტორიაში ერთ-ერთი უმნიშვნელოვანესი ორგანიზაციული ცვლილება.
1976 წლის 1 იანვრიდან საზოგადოება „საგუშაგო კოშკისა“ და იეჰოვას მოწმეთა ყველა კრების საქმიანობას ხელმძღვანელი საბჭოსგან შემდგარი ექვსი ადმინისტრაციული კომიტეტი გაუწევდა ხელმძღვანელობას. ამასთან დაკავშირებით 1976 წლის 1 თებერვალს ორგანიზაციის ყველა ფილიალში მოხდა ცვლილება. ფილიალს უკვე ერთი ადამიანი კი აღარ უხელმძღვანელებდა, არამედ ფილიალის კომიტეტი, რომელშიც სამი ან მეტი წევრი იქნებოდა და ერთი მათგანი განუსაზღვრელი დროით იმსახურებდა კოორდინატორად.a რამდენიმე თვის შემდეგ ხელმძღვანელმა საბჭომ აღნიშნა: „კარგი შედეგი გამოიღო იმან, რომ სამეფოს ინტერესებთან დაკავშირებულ საკითხებს განიხილავს რამდენიმე ძმა, რომლებიც ერთმანეთს ეკითხებიან რჩევას (იგავ. 11:14; 15:22; 24:6)“.
მიუხედავად იმისა, რომ 1976 წლის მიწურულისთვის ძმა ნორის ჯანმრთელობა ისევ არასახარბიელო იყო, ის მონაწილეობას იღებდა ფილიალის კომიტეტის წევრებისა და სხვა თანამშრომლების სწავლების საქმეში, რომლებიც მსოფლიოს სხვადასხვა კუთხიდან ჩამოდიოდნენ მთავარ სამმართველოში სპეციალურ შეხვედრაზე. დღისით ის შეხვედრაში მონაწილეობდა, საღამოობით კი ამ ძმებს პატარა ჯგუფებად თავისთან სტუმრად ეპატიჟებოდა. ამგვარად, ნორს და მის ცოლს, ოდრის, ახლო ურთიერთობა ჰქონდათ მათთან, ვინც კარგად იცნობდა მას, ვისაც უყვარდა და ვისთანაც წლების მანძილზე მჭიდროდ თანამშრომლობდა. ძმა ნორის ჯანმრთელობა გაუარესდა და 1977 წლის 8 ივნისს ის გარდაიცვალა.
1977 წლის 22 ივნისს, ძმა ნორის სიკვდილიდან ორი კვირის შემდეგ, საზოგადოება „საგუშაგო კოშკის“ ახალ პრეზიდენტად 83 წლის ფრედერიკ ფრენცი აირჩიეს. 1977 წლის 1 აგვისტოს „საგუშაგო კოშკში“ ძმა ფრენცის შესახებ ეწერა: „ამ გამოჩენილმა ბიბლეისტმა თავისი შეუბღალავი რეპუტაციითა და სამეფოს ინტერესებისთვის დაუღალავი შრომით მთელ მსოფლიოში იეჰოვას მოწმეთა ნდობა და მხარდაჭერა დაიმსახურა“.
პრეზიდენტის შეცვლის პერიოდში უკვე მოქმედებდა ახალი ორგანიზაციული წესრიგი, რაც კიდევ უფრო უწყობდა ხელს საქმის წინსვლას.
ბიბლიური ლიტერატურის დახმარებით სულიერი წყურვილის მოკვლა
1976 წლამდე იეჰოვას მოწმეებს სულიერი საზრდო არ აკლდათ. მაგრამ იმან, რაც ხელმძღვანელი საბჭოსა და სამწერლო კომიტეტის ხელმძღვანელობით განხორციელდა, აჩვენა, რომ ჭეშმარიტების წყლები უფრო ძლიერ ნაკადად მოედინებოდა და უფრო მრავალფეროვანი ხდებოდა, ვიდრე ოდესმე.
ახალი პუბლიკაციებიდან ბევრი უშუალოდ მოწმეებისთვის გამოიცემოდა. დიდი ყურადღება ექცეოდა ახალგაზრდებს. ცხოვრებისეულ სირთულეებთან გასამკლავებლად ბიბლიური პრინციპები რომ გამოეყენებინათ, ახალგაზრდებისთვის 1976 წელს გამოიცა წიგნი „საუკეთესოდ გამოიყენე ახალგაზრდობის წლები“, 1989 წელს კი — წიგნი „ახალგაზრდების შეკითხვები — პრაქტიკული რჩევები“ (ქართულად გამოიცა 1999 წელს). ბავშვებისთვის მომზადდა და 1978 წელს დაიბეჭდა ილუსტრირებული წიგნი „ჩემი წიგნი ბიბლიური მოთხრობებით“ (ქართულად გამოიცა 1995 წელს). იმავე წელს გამოიცა წიგნი „მოაწყვე ბედნიერი ოჯახური ცხოვრება“, რომელიც ოჯახების გასაძლიერებლად პრაქტიკულ რჩევებს შეიცავდა.
იეჰოვას ხალხის განსაკუთრებული საჭიროებების დასაკმაყოფილებლად „საგუშაგო კოშკში“ დროდადრო იბეჭდებოდა დროული რჩევები. მაგალითად, 1977—1978 წლებში იეჰოვას მოწმეთა მსოფლიო საქმიანობის ანგარიშმა აჩვენა, რომ მქადაგებელთა რიცხვმა იკლო. ხომ არ განაპირობა გარკვეულწილად ეს კლება იმან, რომ 1975 წელთან დაკავშირებით მოლოდინი არ გაუმართლდათ? შესაძლოა. მაგრამ სხვა მიზეზებიც არსებობდა. რისი გაკეთება შეიძლებოდა მდგომარეობის გამოსასწორებლად?
ხელმძღვანელმა საბჭომ იეჰოვას ხალხის გასაძლიერებლად გარკვეული ზომები მიიღო, რათა სამეფოს შესახებ კვლავაც ენთუზიაზმით ექადაგათ კარდაკარ. 1979 წლის 15 ივლისის „საგუშაგო კოშკში“ დაიბეჭდა სტატიები: „იეჰოვას სახლისადმი მოშურნეობა“, „იქადაგეთ ამ უღვთო ქვეყნიერებაში“, „ისინი კარდაკარ ქადაგებდნენ“ და „რას ამბობენ სხვები კარდაკარ ქადაგების შესახებ“. ეს და სხვა სტატიები კიდევ ერთხელ არწმუნებდა იეჰოვას ხალხს, რომ კარდაკარ ქადაგებას მყარი ბიბლიური საფუძველი ჰქონდა და მოუწოდებდა, რომ ამ მნიშვნელოვან საქმეში მთელი გულით მიეღოთ მონაწილეობა (საქ. 20:20; კოლ. 3:23).b
ყურადღებას საჭიროებდა კიდევ ერთი პრობლემა. 1980 წლისთვის ზოგი, ვინც უკვე არაერთი წელი იყო იეჰოვას მოწმე, მათ შორის ზოგი პასუხისმგებელი პირი, ცდილობდა, განხეთქილება ჩამოეგდო იეჰოვას მოწმეებში და ხელი შეეშალა მათი საქმიანობისთვის. განდგომილების სულს გავლენა რომ არ მოეხდინა იეჰოვას ხალხზე, „საგუშაგო კოშკში“ დაიბეჭდა სტატიები: „შეინარჩუნეთ მტკიცე რწმენა“ (1980 წლის 1 აგვისტო), „დამღუპველი სექტები შეუმჩნევლად იკიდებენ ფეხს“ (1983 წლის 15 სექტემბერი), „უარყავით განდგომილება და ჩაეჭიდეთ ჭეშმარიტებას!“ (1983 წლის 1 აპრილი), ხოლო წიგნში „მოვიდეს სამეფო შენი“ (1981) ყურადღება მახვილდებოდა იმაზე, რომ 1914 წელს დამყარებული სამეფო ახლოს იყო. ხელმძღვანელმა საბჭომ არ მისცა მოწინააღმდეგეებს იმის უფლება, რომ ხელი შეეშალათ მათთვის ღვთის სამეფოს შესახებ ქადაგებაში, რაც იეჰოვას მოწმეების უმთავრესი საქმე იყო.
რა უნდა გაკეთებულიყო იმისთვის, რომ დაკმაყოფილებულიყო იეჰოვას მოწმეების მოთხოვნილება, კვლავაც მეტი გაეგოთ ბიბლიიდან? 1984 წელს ბიბლიის უკეთ შესასწავლად გამოიცა ბიბლიის „ახალი ქვეყნიერების თარგმანის“ გადამუშავებული ვარიანტი, რომელიც შეიცავდა მარგინალურ მუხლებს, სქოლიოებსა და დანართებს. ოთხი წლის შემდეგ, 1988 წელს იეჰოვას ხალხი ძალიან გაახარა კიდევ ერთი წიგნის მიღებამ, სახელწოდებით „გამოცხადების დიდებული აპოგეა ახლოსაა!“ (ქართულად გამოიცა 2006 წელს). მასში წიგნ „გამოცხადების“ თითოეული მუხლი ახალი გაგებით იყო ახსნილი. იმავე წელს გამოიცა ბიბლიის ენციკლოპედიის ორტომეული „წმინდა წერილების საკვლევი ცნობარი“. 1991 წელს გამოქვეყნდა შესანიშნავი ილუსტრირებული წიგნი „ოდესმე მცხოვრებთაგან ყველაზე დიდებული ადამიანი“, რომელშიც იესო ქრისტეს ცხოვრება და სწავლებები დაწვრილებით იყო განხილული (ქართულად გამოიცა 1996 წელს).
მათთვის, ვინც ჯერ კიდევ არ იყო იეჰოვას მოწმე, მაგრამ ინტერესს ავლენდა, 1982 წელს გამოიცა წიგნი „შენ შეგიძლია მარადიული ცხოვრება სამოთხეში დედამიწაზე“ (ქართულად გამოიცა 1995 წელს). ეს ახალი პუბლიკაცია დაეხმარებოდა ბიბლიის შემსწავლელებს, დაეკმაყოფილებინათ იეჰოვას მოთხოვნები, რომ დედამიწაზე სამოთხეში ეცხოვრათ. 1985 წელს გამოცემული წიგნი „სიცოცხლე — როგორ წარმოიშვა ის? ევოლუციის გზით თუ შემოქმედებით?“ დაეხმარებოდა მათ, ვისაც აინტერესებდა, როგორ გაჩნდა სიცოცხლე დედამიწაზე და რა იყო სიცოცხლის აზრი. ცოტა მოგვიანებით, 1989 წელს გამოვიდა რწმენის განმამტკიცებელი წიგნი „ბიბლია — ღვთის სიტყვაა თუ ადამიანის?“.
ყურადღება მიექცა აგრეთვე იმ თავმდაბალ ადამიანებს, რომლებსაც განსაკუთრებული დახმარება სჭირდებოდათ თავიანთი კულტურისა თუ რელიგიის გამო. მათთვის, ვინც წერა-კითხვა არ იცოდა ან კითხვა უჭირდა, 1982 წელს გამოიცა ბროშურა „მარადიულად იხარე სიცოცხლით დედამიწაზე!“, რათა იეჰოვას სამეფოს შესახებ ჭეშმარიტება მათაც ესწავლათ (ქართულად გამოიცა 1992 წელს). 1992 წლისთვის ამ ბროშურის 76 მილიონზე მეტი ეგზემპლარი დაიბეჭდა 200 ენაზე და მთელ მსოფლიოში გავრცელდა. საზოგადოება „საგუშაგო კოშკის“ პუბლიკაციებიდან იმ დროისთვის ის ყველაზე მეტ ენაზე ითარგმნა.
1983 წელს მუსლიმანებისთვის, ბუდისტებისა და ინდუსებისთვის გამოიცა სამი ბროშურა. ამ და სხვა რწმენის ადამიანებს რომ დახმარებოდნენ, საჭირო იყო მოწმეებს გარკვეული ცოდნა ჰქონოდათ მათი რელიგიური სწავლებებისა და ისტორიის შესახებ. სწორედ ამ მიზნით 1990 წელს გამოიცა წიგნი „კაცობრიობა ღვთის ძიებაში“.
ხელმძღვანელი საბჭო ძალიან იყო დაინტერესებული იმით, რომ სამეფოს შესახებ ცნობა რაც შეიძლება მეტ ადამიანს გაეგო „ყველა ერიდან და ტომიდან, ხალხიდან და ენიდან“ (გამოცხ. 7:9). ამიტომ ორგანიზება გაეწია იმას, რომ ლიტერატურა უფრო მეტ ენაზე გადათარგმნილიყო. შედეგად, 1976—1992 წლებში 42 პროცენტით გაიზარდა იმ ენების რაოდენობა, რომლებზეც „საგუშაგო კოშკი“ გამოდიოდა. 1992 წლის ოქტომბრისთვის ამ ენების რიცხვი 111-მდე გაიზარდა, ხოლო მთარგმნელების რაოდენობამ მთელ მსოფლიოში 800-ს გადააჭარბა.
სწავლების მრავალფეროვანი პროგრამა
ხელმძღვანელი საბჭოსა და სასწავლო კომიტეტის გადაწყვეტილებით მთავარი სამმართველოსა და მთელ მსოფლიოში არსებული ბეთელების ოჯახის წევრების სწავლების პროგრამა გამრავალფეროვნდა. დილის თაყვანისცემაზე „წელიწდეულისა“ და ბიბლიის კითხვის პროგრამას დაემატა ბეთელელებისთვის სასარგებლო და მნიშვნელოვანი აზრების განხილვა ბიბლიის იმ მონაკვეთიდან, რომელიც კვირის განმავლობაში იკითხებოდა. აგრეთვე ბეთელის სხვადასხვა განყოფილება მთელი ოჯახის წინაშე რეგულარულად აკეთებდა ანგარიშებს თავიანთი საქმიანობის შესახებ. გარდა ამისა, უფრო ხშირად გამოდიოდნენ სამხარეო ზედამხედველები ანგარიშებით.
მათ დასახმარებლად, ვისაც ორგანიზაციაში სხვადასხვა პასუხისმგებლობა ეკისრა, კიდევ ერთ სასწავლო პროგრამას ჩაეყარა საფუძველი. 1977 წელს ყველა უხუცესისთვის პირველად ჩატარდა სამეფო მსახურების სკოლის 15-საათიანი კურსი (საქ. 20:28). იმ დროიდან მოყოლებული სხვადასხვა ხანგრძლივობის მსგავსი კურსები რამდენიმე წელიწადში ერთხელ ტარდება. 1984 წლიდან სამეფო მსახურების სკოლის პროგრამაზე დასწრება მომსახურეებსაც შეუძლიათ. 1977 წლის დეკემბრიდან ფილიალის კომიტეტის წევრებისთვის ბრუკლინში ხუთკვირიანი სკოლის ჩატარება დაიწყო.
განსაკუთრებული ყურადღება მიექცა მათაც, ვინც პიონერად მსახურობდა. 1977 წლის დეკემბერში ამერიკის შეერთებულ შტატებში პიონერული მსახურების ორკვირიანი სკოლა ჩატარდა, მოგვიანებით კი ამ სკოლის ჩატარება მთელ მსოფლიოში დაიწყო. მომდევნო 14 წლის განმავლობაში პიონერების რიცხვი 115 389-დან 605 610-მდე გაიზარდა!
1987 წლის შემოდგომაზე ჩამოყალიბდა მსახურებაში დახელოვნების სკოლა. ამ სკოლის გავლა შეეძლოთ დაუქორწინებელ უხუცესებსა და მომსახურეებს, რომლებიც მზად იყვნენ, იქ ემსახურათ, სადაც გამოცდილ ძმებზე მეტი მოთხოვნილება იყო. 1992 წლისთვის ეს სკოლა ტარდებოდა ავსტრალიაში, ავსტრიაში, ამერიკის შეერთებულ შტატებში, გერმანიაში, დიდ ბრიტანეთში, ესპანეთში, იტალიაში, მექსიკაში, ნიგერიაში, სალვადორში, საფრანგეთსა და შვედეთში. სკოლის გავლის შემდეგ ძმები კრებაში გამოჩენილ მდგომარეობას კი არ იკავებენ, არამედ იძენენ ცოდნასა და გამოცდილებას, რომ და-ძმებს უკეთ მოემსახურონ.
ბიბლიური საგანმანათლებლო საქმიანობის მხარდასაჭერად, მსოფლიოს სხვადასხვა ქალაქში, სადაც და-ძმებს ჩასვლა გაუადვილდებოდათ, დაიგეგმა საერთაშორისო კონგრესების ჩატარება. ზოგიერთი კონგრესი ისეთ ქვეყანაში ჩატარდებოდა, სადაც ერთ დროს იეჰოვას მოწმეთა საქმიანობა აკრძალული იყო. ეს კონგრესები გააძლიერებდა და-ძმებს და აღძრავდა, მეტი გულმოდგინებით ექადაგათ სასიხარულო ცნობა.c
იზრდება შენობებზე მოთხოვნილება
იეჰოვას სიტყვა სწრაფად ვრცელდებოდა. ამიტომ საჭირო გახდა უფრო მეტი შენობის აგება და სტამბის გაფართოება. ამ საქმეს ზედამხედველობას უწევდა ხელმძღვანელი საბჭო და საგამომცემლო კომიტეტი.
სამშენებლო გამოცდილების მქონე მოწმეების დახმარებით, რომლებიც მოხალისეებად მსახურობდნენ, მთელ მსოფლიოში ახალი და უფრო დიდი ფილიალების მშენებლობა დაიწყო. 1976 წლიდან 1992 წლამდე დაახლოებით 60 ქვეყანაში ფილიალის ახალი შენობები აშენდა, სხვა 30 ქვეყანაში კი ფილიალების გაფართოება დაიწყო. ის, რომ ამ საქმეს ასრულებდნენ მოხალისე და-ძმები სხვა კრებებიდან, ზოგჯერ კი სხვა ქვეყნებიდან, აძლიერებდა იეჰოვას ხალხის ერთიანობასა და სიყვარულს.d
რამდენადაც საჭირო იყო, ლიტერატურის მრავალ ენაზე დაბეჭდვა, იმ მოწმეებმა, რომლებიც კომპიუტერულ პროგრამებში კარგად ერკვეოდნენ, დაიწყეს იმაზე მუშაობა, რომ შეექმნათ კომპიუტერიზებული ბეჭდვითი სისტემა MEPS (მრავალენოვანი ელექტრონული ფოტოაწყობის სისტემა). ეს პროექტი 1986 წელს მზად იყო. შედეგად, 1992 წლისთვის „საგუშაგო კოშკი“ ერთდროულად 66 ენაზე გამოდიოდა. ამგვარად, იეჰოვას მოწმეთა უმრავლესობას შეეძლო ერთდროულად მიეღო ერთი და იგივე სულიერი საზრდო.e
საზოგადოება „საგუშაგო კოშკის“ შენობების გაფართოებასთან ერთად ბრუკლინში არსებულ მთავარ სამმართველოსა და სხვა ფილიალებში უფრო მეტი მოხალისე გახდა საჭირო. თუ მთელი მსოფლიოს ბეთელებში 1976 წელს დაახლოებით 4 000 და-ძმა მსახურობდა, 1992-წლისთვის მათმა რიცხვმა 12 900-ს გადააჭარბა. სრული დროით მსახურთა ამ დიდი „ჯარის“ პირად და სულიერ კეთილდღეობაზე ხელმძღვანელი საბჭო და კადრების კომიტეტი ზრუნავს.
კრებასა და სამქადაგებლო საქმიანობაზე ზრუნვა
იეჰოვას სიტყვის სწრაფად გავრცელებასთან ერთად, ხელმძღვანელმა საბჭომ და სამსახურებრივმა კომიტეტმა მთელი ყურადღება მსოფლიოში კრებების განმტკიცებასა და სამქადაგებლო საქმიანობის გაფართოებაზე გადაიტანეს.
ყოველ წელს მრავალი ადამიანი ინათლებოდა. რისი გაკეთება შეიძლებოდა სულიერად მათ გასაძლიერებლად? ამასთან დაკავშირებით 1977 წლის დასაწყისში ხელმძღვანელმა საბჭომ მიიღო გადაწყვეტილება, რის შესახებაც „ჩვენს სამეფო მსახურებაში“ ეწერა: „ჩვენ ვფიქრობთ, რომ სულ მცირე ორი წიგნი უნდა შეისწავლოს იმ ადამიანმა, რომელიც ჭეშმარიტებას იღებს . . . ამგვარად, შესწავლა ნათლობის შემდეგაც უნდა გაგრძელდეს, სანამ შემსწავლელი ბოლომდე არ გაივლის მეორე წიგნს“. ეს შესაძლებლობას აძლევდა ახალმონათლულს, მეტი ცოდნა მიეღო, უკეთ ჩასწვდომოდა ბიბლიურ საკითხებს და მეტად დაეფასებინა ნათლობა. გარდა ამისა, შესწავლის გაგრძელება ეხმარებოდა შემსწავლელსა და იმ მოწმეს, ვინც მას ბიბლიას ასწავლიდა, კვლავაც ახლო ურთიერთობა ჰქონოდათ.
1976—1992 წლებში 29 000-ზე მეტი ახალი კრება ჩამოყალიბდა (მიქ. 4:1). ხელმძღვანელმა საბჭომ უფრო მეტი სარაიონო და საოლქო ზედამხედველი დანიშნა მათ დასახმარებლად. ამ წლებში მიმომსვლელი ზედამხედველების რაოდენობა დაახლოებით 2 600-დან 3 900-მდე გაიზარდა.
კრებების ზრდასთან ერთად შეხვედრების ჩასატარებლად საჭირო გახდა სამეფო დარბაზების აშენება. შესაძლებელი იყო დარბაზების სწრაფი ტემპით აშენება? 1970-იან წლებში იეჰოვას მოწმეებმა შეერთებულ შტატებში შეიმუშავეს სპეციალური სამშენებლო პროგრამა. ადგილობრივი მოწმეებისთვის სამეფო დარბაზების მშენებლობაში დასახმარებლად მეზობელი რაიონებიდან იწვევდნენ იმ მოწმეებს, რომლებსაც მშენებლობის გამოცდილება ჰქონდათ. მშენებლობაში ასობით ადამიანი მონაწილეობდა, შედეგად დარბაზები ძალიან სწრაფად, ხშირად ორ-სამ დღეში შენდებოდა. 1980 წლისთვის სამეფო დარბაზების სწრაფი მეთოდით აშენება მსოფლიოს სხვა ქვეყნებშიც მიმდინარეობდა.
აღმოსავლეთ ევროპაში მომხდარი პოლიტიკური ძვრები იეჰოვას მოწმეთა საქმიანობაზეც აისახა. ჩვენი და-ძმების სიხარულს საზღვარი არ ჰქონდა, როცა ისეთ ქვეყნებში, როგორიცაა აღმოსავლეთ გერმანია, პოლონეთი, რუმინეთი, უნგრეთი და ყოფილი საბჭოთა კავშირი, ჩვენი საქმიანობა კანონით აღიარეს, აქედან ზოგ ქვეყანაში 40-წლიანი აკრძალვის შემდეგ! ამ თავისუფლების შედეგად უფრო ადვილი იქნებოდა დაახლოებით 380 000 000 ადამიანისთვის სასიხარულო ცნობის ქადაგება. იეჰოვას მოწმეებსაც დრო არ დაუკარგავთ და ეს თავისუფლება სასიხარულო ცნობის სახალხოდ ქადაგებისთვის გამოიყენეს.
შედეგად, იეჰოვას სიტყვა სწრაფად გავრცელდა. ამას ცხადყოფს პოლონეთის შემთხვევა. 1992 წლის აპრილში იქ 106 915 იეჰოვას მოწმე იყო. იმავე თვეში ჩატარებულ ქრისტეს სიკვდილის გახსენების საღამოს 214 218 ადამიანი დაესწრო, რაც იმაზე მეტყველებდა, რომ ზრდის დიდი პოტენციალი იყო. იმავე წელს ყოფილი საბჭოთა კავშირის ქვეყნებში გახსენების საღამოს მთლიანობაში 173 473 ადამიანი დაესწრო. ეს წინა წელთან შედარებით 60 პროცენტით მეტი იყო.
მაგრამ ზოგ ქვეყანაში იეჰოვას მოწმეებს ჯერ კიდევ უქმნიდა დაბრკოლებას დევნა და თავსდატეხილი სტიქიური უბედურებები. 1992 წელს მოწმეების საქმიანობა 24 ქვეყანაში იყო შეზღუდული. ხელმძღვანელი საბჭოს თავმჯდომარეების კომიტეტი ყველაფერს აკეთებდა რთულ სიტუაციაში მყოფი და-ძმების დასახმარებლად და ინფორმაციას აწვდიდა საძმოს, თუ როგორ შეეძლოთ თავის მხრივ დახმარებოდნენ მათ (შეადარეთ 1 კორინთელების 12:12—26). ვერც დევნის ტალღამ და ვერც სტიქიურმა უბედურებებმა ვერ შეაჩერა იეჰოვას სიტყვის ქადაგება.
ღვთის საკუთრება
1976—1992 წლებში იეჰოვას სიტყვა მართლაც რომ სწრაფად გავრცელდა. ამ პერიოდში მაუწყებლების რიცხვმა თითქმის ორჯერ მოიმატა და 4 470 000-ს გადააჭარბა.
იეჰოვას ხალხი კვლავაც გულმოდგინედ ქადაგებს ღვთის სამეფოს შესახებ, თანაც უფრო მეტ ენაზე, ვიდრე ოდესმე. მიღებული პუბლიკაციების დახმარებით ისინი ბიბლიურ ცოდნას იღრმავებენ და დაინტერესებულებს ბიბლიური ჭეშმარიტების გაგებაში ეხმარებიან. მათ საკეთილდღეოდ იმოქმედა იმ საგანმანათლებლო პროგრამებმა, რომლებიც ორგანიზაციაში დამატებითი პასუხისმგებლობების მქონე პირთათვის იყო განკუთვნილი. აშკარაა, რომ იეჰოვა აკურთხებს მისი სამეფოს შესახებ ქადაგების საქმეს.
1870-იანი წლებიდან მოყოლებული ცალკეულ ადამიანებს დიდი წვლილი შეჰქონდათ სამეფოს საქმის წინსვლაში, მაგალითად ჩარლზ რასელს, ჯოზეფ რუტერფორდს, ნეითან ნორს, ფრედერიკ ფრენცს და ხელმძღვანელი საბჭოს სხვა წევრებს. მაგრამ იეჰოვას მოწმეებს სექტა არ ჩამოუყალიბებიათ და ამ ადამიანთაგან არც ერთი არ გაუღმერთებიათ. მათი წინამძღოლი ყოველთვის ქრისტე იყო (მათ. 23:10). იესო არის იეჰოვას მოწმეთა ორგანიზაციის მეთაური, რომელსაც მიცემული აქვს „მთელი ძალაუფლება“, რათა „ქვეყნიერების აღსასრულამდე“ უხელმძღვანელოს თავის საქმეს (მათ. 28:18—20). იეჰოვას მოწმეებს გადაწყვეტილი აქვთ, დაემორჩილონ ქრისტეს მეთაურობას, ჩაეჭიდონ ღვთის სიტყვას და მიჰყვნენ წმინდა სულის ხელმძღვანელობას, რათა კვლავაც თაყვანი სცენ ერთადერთ ჭეშმარიტ ღმერთს და ახსოვდეთ, რომ ისინი არიან ღვთის საკუთრება — კარგი საქმეების მოშურნე ერი (ტიტ. 2:14).
რომელია იეჰოვას მოწმეების ზოგიერთი სწავლება და ქცევის ნორმა, რითაც ისინი სხვა რელიგიებისგან განსხვავდებიან? როგორ გახდნენ ისინი იეჰოვას მოწმეებად ცნობილნი? როგორ ფინანსდება მათი საქმიანობა? რატომ არიან ისინი გამოყოფილნი სხვა რელიგიებისგან და მთლიანობაში ქვეყნიერებისგან? რატომ დევნიდნენ მათ სასტიკად და რატომ იდევნებიან დღესაც ბევრ ქვეყანაში? შემდეგ თავებში პასუხი გაეცემა ამ და სხვა მრავალ კითხვას.
[სქოლიოები]
a იხილეთ თავი 15, „ორგანიზაციის სტრუქტურის ჩამოყალიბება“.
b 1980—1985 წლებში მქადაგებელთა რიცხვი 33 პროცენტით გაიზარდა, ხოლო 1985—1992 წლებში — 47,9 პროცენტით.
c იხილეთ თავი 17, „კონგრესები ჩვენი საძმოს ერთიანობაზე მოწმობს“.
d იხილეთ თავი 20, „ერთად ვაშენებთ მთელ მსოფლიოში“.
e იხილეთ თავი 26, „ბიბლიური ლიტერატურის გამოცემა“.
[ჩანართი 117 გვერდზე]
იეჰოვას მოწმეები არ არიან სექტა და არც ერთ ადამიანს არ აღმერთებენ
[ჩარჩო/დიაგრამა 111 გვერდზე]
1976—1992 წლებში 42 პროცენტით გაიზარდა იმ ენების რაოდენობა, რომლებზეც „საგუშაგო კოშკი“ გამოდიოდა
[სქემა]
(სრული ტექსტი იხილეთ პუბლიკაციაში)
111
78
1976 1992
[ჩარჩო 111 გვერდზე]
ფრედერიკ ფრენცის ბიოგრაფია
ფრედერიკ უილიამ ფრენცი დაიბადა 1893 წლის 12 სექტემბერს ქალაქ კოვინგტონში (კენტუკის შტატი, აშშ). 1899 წელს მისი ოჯახი საცხოვრებლად გადავიდა ცინცინატში, სადაც ფრედერიკმა 1911 წელს სკოლა დაამთავრა. შემდეგ მან სწავლა განაგრძო ცინცინატის უნივერსიტეტში, სადაც ჰუმანიტარულ საგნებს სწავლობდა. მას გადაწყვეტილი ჰქონდა პრესვიტერიანელი მქადაგებელი გამხდარიყო, ამიტომ გულმოდგინედ სწავლობდა ძველბერძნულ ენას, რომელზეც ბიბლიის ნაწილი დაიწერა. უნივერსიტეტში ფრედერიკი აირჩიეს როდსის სტიპენდიის კანდიდატად, რაც ოქსფორდის უნივერსიტეტში (ინგლისი) სწავლის გაგრძელების შესაძლებლობას მისცემდა. მაგრამ ამის შესახებ განცხადების გაკეთებამდე ფრედერიკმა სტიპენდიის მიღების ყოველგვარი ინტერესი დაკარგა და ითხოვა, რომ კონკურსში მონაწილეთა სიიდან მისი გვარი ამოეღოთ.
მანამდე ფრედერიკს მისმა ძმამ ალბერტმა გაუგზავნა ბიბლიის საერთაშორისო მკვლევარების ბროშურა. მოგვიანებით ალბერტმა მას „საღვთო წერილის გამოკვლევის“ სამი ტომიც მისცა. ფრედერიკზე იმდენად იმოქმედა წაკითხულმა, რომ გადაწყვიტა, წამოსულიყო პრესვიტერიანული ეკლესიიდან და ბიბლიის მკვლევართა კრებებზე დაეწყო სიარული. 1913 წლის 30 ნოემბერს ის მოინათლა. 1914 წლის მაისში დატოვა უნივერსიტეტი და მალევე წიგნების დამტარებლად (პიონერი) დაიწყო მსახურება.
1920 წლის ივნისში ის ბრუკლინის ბეთელის ოჯახის წევრი გახდა. ძმა ნორის სიკვდილის შემდეგ, 1977 წლის ივნისში ძმა ფრენცი ორგანიზაციის პრეზიდენტად აირჩიეს. 1992 წლის 22 დეკემბერს 99 წლის ფრედერიკ ფრენცი გარდაიცვალა. ის სიკვდილამდე ერთგულად მსახურობდა ხელმძღვანელ საბჭოში.
[სქემა 112 გვერდზე]
(სრული ტექსტი იხილეთ პუბლიკაციაში)
პიონერების რიცხობრივი ზრდა
1992
600 000
400 000
1986
200 000
1981
1976
[სქემა 113 გვერდზე]
(სრული ტექსტი იხილეთ პუბლიკაციაში)
ბეთელელების რიცხობრივი ზრდა მთელ მსოფლიოში
1992
12 000
9 000
1986
6 000
1981
1976
3 000
[სქემა 114 გვერდზე]
(სრული ტექსტი იხილეთ პუბლიკაციაში)
კრებების რიცხობრივი ზრდა
80 000
1992
60 000
1986
1981
1976
40 000
20 000
[სქემა 115 გვერდზე]
(სრული ტექსტი იხილეთ პუბლიკაციაში)
სამეფოს მაუწყებელთა რიცხობრივი ზრდა
1992
4 000 000
1986
3 000 000
1981
1976
2 000 000
1 000 000
[სურათი 109 გვერდზე]
ორგანიზაციის ყველა ფილიალს ზედამხედველობს სულიერად მოწიფული ძმებისგან შემდგარი კომიტეტი. ნიგერიის ფილიალის კომიტეტი
[სურათები 116 გვერდზე]
იეჰოვას მოწმეთა ხელმძღვანელი საბჭო, 1992 წლის იანვარი
კერი ბარბერი
ჯონ ბარი
ლოიდ ბერი
ჯონ ბუთი
ფრედერიკ ფრენცი
ჯორჯ განგასი
მილტონ ჰენშელი
თეოდორ იარაჩი
კარლ კლაინი
ალბერტ შრედერი
ლაიმან სვინგლი
დენიელ სიდლიკი