თავი მეთერთმეტე

რომელი რელიგიური შეხედულებები და ადათ-წესები არ მოსწონს ღმერთს?

რომელია მცდარი რელიგიური შეხედულებები და ადათ-წესები? (1)

უნდა სჯეროდეთ ქრისტიანებს, რომ ღმერთი სამებაა? (2)

რატომ არ აღნიშნავენ ჭეშმარიტი ქრისტიანები შობა-ახალწელიწადს, აღდგომასა და დაბადების დღეს? (3, 4)

შეუძლია მკვდარს, რომ ზიანი მიაყენოს ცოცხალ ადამიანს? (5)

ჯვარზე მოკვდა იესო? (6)

რამდენად მნიშვნელოვანია, ვასიამოვნოთ ღმერთს? (7)

1. ყველა რელიგიური შეხედულება და ადათ-წესი როდია არასწორი; ღმერთი არ იწონებს იმას, რასაც ცრუ რელიგიიური საწყისი აქვს და რაც ბიბლიურ მოძღვრებებს ეწინააღმდეგება (მათე 15:6).

2. სამება. არის თუ არა იეჰოვა სამება — სამი პიროვნება ერთ ღმერთში? არა! იეჰოვა არის მამა და ერთადერთი ჭეშმარიტი ღმერთი (იოანე 17:3; მარკოზი 12:29). იესო ღვთის პირმშოა და ღმერთს ემორჩილება (1 კორინთელები 11:3). მამა ძეზე დიდია (იოანე 14:28). წმინდა სული პიროვნება არ არის, ის ღვთის მოქმედი ძალაა (დაბადება 1:2; საქმეები 2:18).

3. შობა-ახალწელიწადი და აღდგომა. იესო 25 დეკემბერს არ დაბადებულა. ის დაახლოებით 1-ლ ოქტომბერს დაიბადა, წლის იმ დროს, როცა ღამით მწყემსებს ფარა ღია ცის ქვეშ ჰყავდათ (ლუკა 2:8—12). იესომ ქრისტიანებს დაავალა არა თავისი დაბადების დღის, არამედ თავისი სიკვდილის გახსენების აღნიშვნა (ლუკა 22:19, 20). შობა და შობის ადათ-წესები უძველესი ცრუ რელიგიიდან მოდის, ისევე როგორც სააღდგომო წეს-ჩვეულებები, მაგალითად, კვერცხების ღებვა და პასქის ცხობა. I საუკუნეში მცხოვრები ქრისტიანები არ აღნიშნავდნენ არც ახალ წელს, არც შობას და არც აღდგომას. ჭეშმარიტი ქრისტიანები დღესაც ასე იქცევიან.

4. დაბადების დღე. ბიბლიაში დაბადების დღე მხოლოდ ორჯერაა მოხსენიებული და ორივეჯერ იმ ადამიანებმა იზეიმეს, რომლებიც იეჰოვას არ სცემდნენ თაყვანს (დაბადება 40:20—22; მარკოზი 6:21, 22, 24—27). პირველი ქრისტიანები დაბადების დღეებს არ აღნიშნავდნენ. დაბადების დღის აღნიშვნის ტრადიციაც ცრუ რელიგიიდან იღებს სათავეს. ჭეშმარიტი ქრისტიანებიც ჩუქნიან ერთმანეთს საჩუქრებს და იკრიბებიან ერთად, ოღონდ წელიწადის ნებისმიერ სხვა დროს.

5. გარდაცვლილთა შიში. გარდაცვლილები ვერაფერს აკეთებენ და ვერაფერს გრძნობენ. ვერც ჩვენ დავეხმარებით მათ და ვერც ისინი მოგვაყენებენ ზიანს (ფსალმუნები 146:4; ეკლესიასტე 9:5, 10). სული კვდება და აღარ აგრძელებს სიცოცხლეს (ეზეკიელი 18:4). მაგრამ ზოგჯერ ბოროტი ანგელოზები, იგივე დემონები, გარდაცვლილთა სულებად გვაჩვენებენ თავს. არასწორია ნებისმიერი ადათ-წესი, რომელიც გარდაცვლილთა შიშსა და მათ თაყვანისცემას უკავშირდება (ესაია 8:19).

6. ჯვარი. იესო ჯვარზე არ მომკვდარა, ის ბოძზე ანუ ძელზე მოკვდა. ბერძნული სიტყვა, რომელსაც ბევრ ბიბლიაში ჯვრად თარგმნიან, ჩვეულებრივ მორს ნიშნავს. ჯვარი დასაბამს უძველესი ცრუ რელიგიებიდან იღებს. პირველი ქრისტიანები არ იყენებდნენ და თაყვანს არ სცემდნენ ჯვარს. აქედან გამომდინარე, სწორია ჯვრის გამოყენება თაყვანისცემაში? (მეორე კანონი 7:26; 1 კორინთელები 10:14)

7. რელიგიური შეხედულებების შეცვლა და ადათ-წესების შესრულებაზე უარის თქმა შეიძლება იოლი არ იყოს. ნათესავები და მეგობრები შეიძლება შეეცადონ თქვენ გადარწმუნებას, რომ არ შეიცვალოთ მრწამსი, მაგრამ გაცილებით მნიშვნელოვანია, ვასიამოვნოთ ღმერთს, ვიდრე ადამიანებს (იგავები 29:25; მათე 10:36, 37).

[სურათი 22 გვერდზე]

ღმერთი სამება არ არის.

[სურათი 23 გვერდზე]

შობა-ახალწელიწადისა და აღდგომის დღესასწაულები დასაბამს ცრუ რელიგიებიდან იღებს.

[სურათი 23 გვერდზე]

გარდაცვლილების თაყვანისცემა და შიში უსაფუძვლოა.