რა სწამთ მათ?

იეჰოვას მოწმეებს სწამთ ყოვლისშემძლე ღმერთი, იეჰოვა, ცისა და დედამიწის შემოქმედი. თავად სასწაულებრივი სამყარო ცხადყოფს, რომ უაღრესად გონიერი და ძლიერი შემოქმედის მიერ არის შექმნილი. როგორც ადამიანთა საქმეებში ჩანს მათი თვისებები, ისე იეჰოვა ღმერთის საქმეებიც მის თვისებებზე მეტყველებს. ბიბლია გვეუბნება: „მისი უხილავი, მისი მარადიული ძალა და ღვთაება წუთისოფლის დასაბამიდან ქმნილებათა ხილვით შეიცნობა“. აგრეთვე უხმოდ ანუ უსიტყვოდ „ცანი ღაღადებენ ღმერთის დიდებას“ (რომაელთა 1:20; ფსალმუნი 18:2—5).

ადამიანები უმიზნოდ არ აკეთებენ თიხის ჭურჭელს, ტელევიზორებსა თუ კომპიუტერებს. რაოდენ უფრო სასწაულებრივია დედამიწა და მისი მცენარეთა და ცხოველთა სამყარო. ადამიანის სხეული, რომელიც ტრილიონობით უჯრედისგან შედგება, თავისი აგებულებით აღემატება ჩვენს გაგებას. ჯერ მარტო ტვინია განმაცვიფრებელი იმის გამო, რომ ძნელშესაცნობია! თუკი ადამიანებს გარკვეული მიზნის მიღწევა სურთ თავიანთი შედარებით უმნიშვნელო გამოგონებებით, იეჰოვა ღმერთსაც ნამდვილად ჰქონდა მიზანი, როცა მოწიწების შთამნერგავ ქმნილებებს აძლევდა დასაბამს. ამას ადასტურებს იგავნის 16:4: „უფალმა ყოველივე საკუთარი მიზნისთვის შეჰქმნა“.

იეჰოვამ გარკვეული მიზნით შექმნა დედამიწა. მან ადამიანთა პირველ წყვილს განუცხადა: „ინაყოფიერეთ და იმრავლეთ, აავსეთ დედამიწა. ეპატრონეთ ზღვაში თევზს, ცაში ფრინველს, ყოველ ცხოველს, რაც კი დედამიწაზე დახოხავს“ (დაბადება 1:28). ამ წყვილმა ურჩობის გამო ვერ „აავსო“ დედამიწა გულმართალი შთამომავლებით, რომლებიც სიყვარულით იზრუნებდნენ დედამიწაზე, მცენარეებსა და ცხოველებზე. მაგრამ ამას ხელი არ შეუშლია იეჰოვას განზრახვის შესრულებისთვის. ათასობით წლის შემდეგ ასეთი რამ დაიწერა: „[ღმერთს,] რომელმაც მიწა გამოსახა . . , საუკაცრიელოდ არ შეუქმნია, დასასახლებლად გამოსახა“ იგი. დედამიწა არ განადგურდება. ის მარადიულად იარსებებს (ესაია 45:18; ფსალმუნი 77:69) იეჰოვას განზრახვა, დედამიწასთან დაკავშირებით, განხორციელდება — „აღსრულდება ჩემი განზრახული“ (ესაია 46:10).

მაშასადამე, იეჰოვას მოწმეების რწმენით, დედამიწა სამარადჟამოდ იარსებებს და მარადიულად იცხოვრებს ყველა ის ადამიანი — ცოცხლებიცა და აწ გარდაცვლილებიც — რომლებიც გაიზიარებენ იეჰოვას განზრახვას იმასთან დაკავშირებით, რომ დედამიწა გალამაზდება და მასზე ადამიანები დასახლდებიან. ადამისა და ევასგან მემკვიდრეობით მიღებული არასრულყოფილების გამო მთელი კაცობრიობა ცოდვილია (რომაელთა 5:12). ბიბლია გვეუბნება: „ცოდვის საზღაური სიკვდილია“. „ცოცხალმა იცის, რომ მოკვდება; მკვდრებმა კი არაფერი იციან“. „ცოდვილი სული უნდა მოკვდეს“ (რომაელთა 6:23; ეკლესიასტე 9:5; ეზეკიელი 18:4, 20). მაშ, როგორღა იცოცხლებს ადამიანი კვლავ და როგორ მიიღებს მიწიერ კურთხევებს? მხოლოდ და მხოლოდ ქრისტე იესოს გამომსყიდველური მსხვერპლის მეშვეობით. იესომ თქვა: „მე ვარ აღდგომა და სიცოცხლე, ჩემი მორწმუნე, კიდეც რომ მოკვდეს, იცოცხლებს“. „ყველა, ვინც წევს საფლავში, მოისმენს მის ხმას; და ამოვლენ“ (იოანე 5:28, 29, სსგ; 11:25; მათე 20:28).

როგორ მოხდება ეს? პასუხი მოცემულია „სასუფევლის სახარებაში“, ანუ სამეფოს შესახებ სასიხარულო ცნობაში, რომლის საჯაროდ გაცხადებაც იესომ დედამიწაზე ყოფნისას დაიწყო (მათე 4:17—23). დღეს კი იეჰოვას მოწმეები ქადაგებენ ამ სასიხარულო ცნობას.

[ცხრილი 13 გვერდზე]

რა სწამთ იეჰოვას მოწმეებს

მრწამსი ბიბლიური საფუძველი

სპირიტიზმი დაუშვებელია. რჯლ. 18:10—12; გალ. 5:19—21; ლევ. 19:31

[სურათი 12 გვერდზე]

დედამიწა იეჰოვამ შექმნა. ადამიანი მარადიულად იცხოვრებს და დაამუშავებს მას.