ᲘᲑᲚᲔᲐᲛᲘ

[შესაძლოა ნაწარმოებია ფუძიდან, რომელიც ნიშნავს ჩაყლაპვას]

ისაქარის ტერიტორიაზე მდებარე ქალაქი, რომელიც თავის მიმდებარე ქალაქებთან ერთად მენაშეს ტომს მიაკუთნეს. თუმცა მენაშესტომელებმა ვერ გააძევეს იბლეამიდან იქ მცხოვრები ქანაანელები (იეს. 17:11—13; მსჯ. 1:27). როგორც ჩანს, იბლეამი იგივე მენაშეს ტომის სამკვიდროში მდებარე ბილამია, რომელიც კეჰათელ ლევიანებს მისცეს (1მტ. 6:70). თუმცა პარალელურ მუხლში, სადაც მენაშეს ტომის ნახევრის ტერიტორიაზე მდებარე ლევიანთა ქალაქებია ჩამოთვლილი (იეს. 21:25), ბილამის ან იბლეამის ნაცვლად ვხვდებით გათ-რიმონს. ამას გადამწერის შეცდომას მიაწერენ, რომელმაც, როგორც ჩანს, წინა (24-ე) მუხლიდან, შემთხვევით გადმოიტანა დანის ტომის ტერიტორიაზე მდებარე ქალაქის, გათ-რიმონის, სახელი.

იბლეამს აიგივებენ მეგიდოს სამხრ. სამხრ.-აღმ.-ით დაახლ. 18 კმ-ში მდებარე ხირბეთ-ბელამესთან.

იბლეამთან ახლოს იეჰუს ბრძანებით იუდას მეფე ახაზია სასიკვდილოდ დაჭრეს (2მფ. 9:27). მოგვიანებით იეჰუს დინასტიამ შეწყვიტა არსებობა, როცა იბლეამში ზაქარია მოკლეს (LXX, ლაგარდის გამოცემა; 2მფ. 15:10—12, JB, NW, RS).