ᲛᲐᲥᲤᲔᲚᲐ

[ნაწარმოებია ფუძიდან, რომელიც ნიშნავს ორმაგს; შესაძლოა მიუთითებს იმაზე, რომ გამოქვაბულს ორი შესასვლელი ან ორი სათავსი ჰქონდა]

ამ სახელით მოიხსენიებოდა ხებრონის მახლობლად არსებული მინდორი და გამოქვაბული, რომლებიც აბრაამმა ხეთელი ეფრონისგან 400 შეკელ ვერცხლად შეიძინა (დაახლ. 880$). ამ გამოქვაბულში დაკრძალული იყო აბრაამის ცოლი სარა და შემდგომში, სულ მცირე კიდევ ხუთი ადამიანი: აბრაამი, ისაკი, რებეკა, იაკობი და ლეა (დბ. 23:14—19; 25:9; 49:30, 31; 50:13).

ტრადიციულად, ამ დასამარხად განკუთვნილ გამოქვაბულს აიგივებენ მეერათ-ჰა-მაქფელასთან, რომელიც მდებარეობს თანამედროვე ხებრონში, მუსლიმანური მეჩეთის, ჰარამ ელ-ხალილის დაბლა.

დაბადების 23:17-ში ის ებრაული სიტყვა, რომლითაც გამოიხატება მაქფელას გამოქვაბულის მდებარეობა მამრესთან მიმართებით, ნათარგმნია როგორც „მამრეს წინ“ (სსგ; აქ, 2020), „მამრეს პირისპირ“ (ბსგ), „მამრეს წინ მდებარე“ (აქ, 2006) და როგორც ზოგიერთ უცხოენოვან თარგმანშია მოხსენიებული, „მამრეს აღმოსავლეთით“ (RS). თუკი მამრეს მდებარეობა, რომელსაც ტრადიციულად ერ-რამათ-ელ-ხალილთან აიგივებენ, სწორად არის დადგენილი, მაშინ თარგმანი „მამრეს აღმოსავლეთით“ ვერ იქნება სწორი, რადგან ეს ადგილი თანამედროვე ხებრონიდან ჩრდილოეთით დაახლ. 3 კმ-ში მდებარეობს.