ᲤᲘᲡᲒᲐ

შემაღლებული ადგილი აბარიმის მთათა სისტემის ჩრდილოეთ ნაწილში მკვდარი ზღვის აღმოსავლეთით. მისი ზუსტი ადგილმდებარეობა უცნობია. გავრცელებული შეხედულების თანახმად, რომელიც ბიბლიასაც არ ეწინააღმდეგება, ფისგა — ესაა კონცხი რას-ელ-სიიაღა, რომელიც იმ ადგილიდან, სადაც იორდანე მკვდარ ზღვაში ჩაედინება, აღმ. დაახლოებით 16 კმ-ში მდებარეობს. რას-ელ-სიიაღა ჩრდ.-დას. მცირე მანძილითაა დაშორებული მწვერვალ ჯებელ-ენ-ნებასგან, რომელსაც ტრადიციულად ნებოს მთად (ჰარ-ნევო) მიიჩნევენ.

ამ ორი მწვერვალის თავისებურებები შეესაბამება იმ მოკლე აღწერილობას, რომელიც ბიბლიაში მათთან დაკავშირებითაა მოცემული. რას-ელ-სიიაღას დაახლოებით 100 მეტრით აღემატება ჯებელ-ენ-ნება და ის ამ უკანასკნელისგან გამოყოფილია მცირე ჩაღრმავებით, ეგრეთ წოდებული უნაგირათი. მართალია, რას-ელ-სიიაღა მეზობელ მთის მწვერვალს ოდნავ ჩამოუვარდება სიმაღლით, მაგრამ ის უფრო ახლოსაა იერიხონთან და მისგან იშლება ხედი მკვდარ ზღვაზე, რომელსაც ის დაახლოებით 1000 მ სიმაღლიდან გადაჰყურებს. მისგანვე იშლება შესანიშნავი ხედი იორდანის ველზე, რომლის ცენტრალურ ნაწილში თავმოყრილია ხებრონი, ბეთლემი და იერუსალიმი, და აქედანვეა შესაძლებელი ჩრდ. 160-ზე მეტი კმ. დაშორებული ხერმონის მთის დანახვაც.

ფისგა პირველად მოიხსენიება იმ ადგილებთან ერთად, სადაც აღთქმულ მიწამდე მიმავალი ისრაელი ბანაკდებოდა (რც. 21:20). ფისგა მდებარეობდა იმ ტერიტორიის სამხრეთ ნაწილში, რომელიც ისრაელებმა წაართვეს ამორეველებს მას შემდეგ, რაც მათმა მეფემ, სიხონმა ისრაელს თავის მიწაზე გავლა აუკრძალა (კნ. 4:46, 49; იეს. 12:1—3). მოგვიანებით, მოაბის მეფე ბალაკმა აიყვანა ბალაამი „ცოფიმის ველზე, ფისგის წვერზე“ ისრაელის დასაწყევლად, თუმცა მისი მცდელობა ამაო აღმოჩნდა (რც. 23:14).

თუმცაღა, ყველაზე მეტად ფისგა ცნობილია იმით, რომ სიკვდილამდე ცოტა ხნით ადრე მასზე ავიდა მოსე და იქიდან თვალი შეავლო აღთქმულ მიწას (კნ. 3:27; 34:1—3). ფისგა მდებარეობდა იმ ტერიტორიაზე, რომელიც რეუბენის ტომის კუთვნილებაში შედიოდა (კნ. 3:16, 17; იეს. 13:15, 20).

ყველგან, სადაც კი ბიბლიაში გვხვდება სახელწოდება ფისგა, ის გვხვდება ისეთ ფრაზებში როგორიცაა „ფისგის წვერი“, „ფისგის ფერდობები“ ან „ფისგის კალთები“. ამ მიზეზით ფისგას ხშირად მოიხსენიებენ როგორც მთას, თუმცაღა ბიბლიაში არ ვხვდებით ფრაზას „ფისგის მთა“.