ზიქრი

[ზაქარიას შემოკლებული ფორმა, ნიშნავს: ახსოვს იეჰოვას].

1. ლევიანი, იცჰარის ვაჟი (ჩამონათვალში მესამე), კეჰათის შვილიშვილი (გმ. 6:18, 21).

2, 3, 4. ბენიამინის ტომის საგვარეულოების 3 თავკაცი, იერუსალიმის მკვიდრნი. შიმეის, შაშაკისა და იეროხამის ვაჟები ან შთამომავლები (1მტ. 8:1, 19, 21, 23, 25, 27, 28).

5. ასაფის ვაჟი და ბაბილონის ტყვეობის შემდეგ მცხოვრები მუსიკოსის, მათანიას, წინაპარი (1მტ. 9:15). სავარაუდოდ, იგივე ზაბდი (ნემ. 11:17) და ზაქური (1მტ. 25:2, 10; ნემ. 12:35).

6. ლევიანი, მოსეს შთამომავალი ელიეზერის ხაზით; შელომოთის მამა ან წინაპარი, რომელიც დავითის მეფობის დროს ნადავლის საგანძურს მეთვალყურეობდა (1მტ. 26:25—27; 23:15, 17).

7. რეუბენელი, რომლის ვაჟი, ელიეზერი, დავითის მეფობის დროს ტომის წინამძღოლი იყო (1მტ. 27:16).

8. კაცი იუდას ტომიდან, რომლის ვაჟი, ამასია, იეჰოშაფატის ჯარის ერთ-ერთი მხედართმთავარი იყო (2მტ. 17:12, 14, 16).

9. ელიშაფატის მამა. ელიშაფატი დაეხმარა იეჰოიადას ათალიას ტახტიდან ჩამოგდებაში (2მტ. 23:1).

10. ეფრემელი მამაცი მებრძოლი. ის ჩრდილოეთი სამეფოს ჯარში მსახურობდა, რომელიც დაახლოებით ძვ. წ. 760 წელს იუდაში შეიჭრა. ზიქრიმ მოკლა მეფე ახაზის სამეფო კარის სამი წევრი, მათ შორის იყო უფლისწული (2მტ. 28:6, 7).

11. ბენიამინელი კაცი, რომლის ვაჟი, იოელი, გადასახლების შემდეგ იერუსალიმში მცხოვრებ ბენიამინელებს ზედამხედველობდა (ნემ. 11:3, 4, 7, 9).

12. მღვდელ აბიას საგვარეულოს თავკაცი, რომელიც მღვდელმთავარ იეშუას მემკვიდრის, იოიაკიმის დროს ცხოვრობდა (ნემ. 12:12, 17).