საზოგადოება „საგუშაგო კოშკის“ საგანმანათლებლო ცენტრის მიძღვნა — იეჰოვასთვის განკუთვნილი დღესასწაული

უძველესი დროიდან სასიხარულო დღესასწაულები ჭეშმარიტი თაყვანისმცემლობის ნაწილი იყო. ძველ ისრაელში ზოგი დღესასწაული რამდენიმე დღე გრძელდებოდა და მათ იეჰოვას ათასობით თაყვანისმცემელი ესწრებოდა. სოლომონის მიერ აგებული ტაძრის გახსნამ შვიდ დღეს გასტანა, რასაც ერთკვირიანი კარვობის დღესასწაული მოჰყვა. ამან ისრაელებს საშუალება მისცა დაფიქრებულიყვნენ, როგორი განსაკუთრებული დამოკიდებულება ჰქონდა იეჰოვას მათთან. ისინი დაბრუნდნენ შინ „მხიარულნი და გულსავსენი იმ სიკეთის გამო, რაც გაუკეთა უფალმა“ (მესამე მეფეთა 8:66).

1999 წლის 17—22 მაისს საზოგადოება „საგუშაგო კოშკის“ პატერსონში (ნიუ-იორკი, აშშ) არსებულ საგანმანათლებლო ცენტრში ჩატარებულმა ღონისძიებამ სტუმრებს ძველი დროის ის სასიხარულო დღესასწაულები გაახსენა. ეს განსაკუთრებული კვირა გლობალური ბიბლიური განათლების მისაღებად განკუთვნილი 28-შენობიანი კომპლექსის მიძღვნას დაეთმო. ყველაფერი გაკეთდა იმისათვის, რომ ამ დაუვიწყარი კვირის განმავლობაში პატერსონის კომპლექსის საფუძვლიანად დათვალიერების შესაძლებლობა მისცემოდა ბრუკლინში, უოლკილსა და პატერსონში მომსახურე მთავარი სამმართველოს პერსონალის ყველა 5 400 წევრს. სტუმრებს შორის იყვნენ 500-ზე მეტი ყოფილი წევრი, რომლებმაც საგანმანათლებლო ცენტრის მშენებლობაში მიიღეს მონაწილეობა, წარმომადგენლები საზოგადოება „საგუშაგო კოშკის“ 23 ფილიალიდან და სხვები ახლომდებარე კრებებიდან — მთლიანობაში სულ მცირე 8 100 კაცი.

ექსკურსიები ბევრ რამეს ჰფენს ნათელს

სტუმრები საგანმანათლებლო ცენტრს რომ გასცნობოდნენ, მოეწყო სპეციალური გამოფენები, შემეცნებითი ვიდეოფილმების ჩვენება და ექსკურსიები. მთავარ ვესტიბიულში სტუმრების ყურადღება მაშინვე დედამიწაზე იესოს მსახურების დროს არსებული იერუსალიმის ტაძრის მაკეტმა მიიპყრო. სხვა გამოფენები ყურადღებას ამახვილებდა საზოგადოება „საგუშაგო კოშკის“ ბიბლიური სკოლა „გალაადის“ ისტორიაზე, ისტორიული მნიშვნელობის მქონე კონგრესებზე, კრების შეხვედრებზე, დღესდღეობით ბიბლიის საშინაო შესწავლების რიცხვის ზრდაზე, რომელთაგანაც მილიონობით შესწავლა ამჟამად ყოველკვირეულად ტარდება, აგრეთვე იმაზე, თუ რა გააკეთა იურიდიულმა განყოფილებამ, რომ ხელი შეეწყო ასეთი საქმიანობისთვის, რომლითაც ქრისტეს განკარგულებისადმი მორჩილება გამოიხატება (მათ. 28:19, 20).

მეზობელ დარბაზში, სადაც 1 700 მოხერხებული ადგილია, მიძღვნის დღესასწაულზე დამსწრე სტუმრებს შესაძლებლობა მიეცათ ენახათ 33-წუთიანი ვიდეოფილმი, სახელწოდებით „არა ძლიერებით — ჩემი სულით!“. ამ ვიდეოფილმში ნაჩვენები იყო, როგორ დაარსდა საზოგადოება „საგუშაგო კოშკის“ საგანმანათლებლო ცენტრი. ინტერვიუებში მოყოლილი შემთხვევებიდან აშკარად გამოჩნდა, როგორ ხელმძღვანელობდა იეჰოვა ამ საქმეს და როგორ აკურთხა მომუშავეთა ძალისხმევა, რომ წარმატებით დასრულებულიყო ეს 15-წლიანი პროექტი. ამ სამშენებლო საქმეში ათასობით მოხალისემ მიიღო მონაწილეობა. ერთხანს, 1994 წელს, მშენებლობაში მონაწილეობდა 526 კაცი, მათ შორის: 350 სრული დროით მომსახურე მოხალისე, 113 დროებითი მომუშავე და კიდევ 63 პირი, რომლებიც ყოველდღე მოდიოდნენ დასახმარებლად. ბევრად უფრო მეტმა შესაწირავებით დაუჭირა მხარი ამ საქმიანობას. ყველა მათგანს ესმოდა, რომ ყოველივე ეს შეუძლებელი იქნებოდა იეჰოვას სულის გარეშე (ზაქარია 4:6).

დამთვალიერებლებმა დაინახეს, რომ საგანმანათლებლო ცენტრში შესრულებული საქმის მიზანი ღვთიური სწავლების მხარდაჭერაა. სკოლა „გალაადის“ შესასვლელში, შენობის პირველ სართულზე მოწყობილ გამოფენაზე, წარმოდგენილი იყო სკოლის მდიდარი სულიერი მემკვიდრეობა და ისტორია. 1943 წელს პირველი კლასის ჩამოყალიბებიდან მოყოლებული, რომელიც მაშინ სამხრეთ ლანსინგში (ნიუ-იორკი) იყო, სკოლა „გალაადში“ მისიონერული მსახურებისთვის 7 000-ზე მეტი სტუდენტი მომზადდა. სკოლის შენობის მეორე სართულზე გამართულ გამოფენებზე ნაჩვენები იყო, რა მიზანს ემსახურება ფილიალის კომიტეტის წევრებისა და მიმომსვლელი ზედამხედველებისთვის განკუთვნილი სკოლები; ორივე მათგანის კლასები იმავე სართულზეა. ფილიალის სკოლაში, რომელიც 1995 წლის ნოემბრიდან ფუნქციონირებს, საფუძვლიანი მომზადება გაიარა 106 ქვეყნიდან ჩამოსულმა ფილიალის კომიტეტის 360-მა წევრმა.

დათვალიერების დროს მნახველებისთვის მალე ცხადი შეიქნა, რომ ბევრგან შესაძლებლობა ჰქონდათ, გამოფენაზე წარმოდგენილ სურათებზე მეტი რამ ენახათ. მათ დაათვალიერებინეს სხვადასხვა განყოფილება, ოფისები და სხვა სამუშაო ადგილები; ისინი საფუძვლიანად გაეცნენ იქ შესრულებულ სამუშაოებს. განსაკუთრებით საინტერესო იყო აუდიო- და ვიდეომომსახურებისთვის განკუთვნილი შენობის დათვალიერება. რა შესანიშნავი საშუალებები გამოიყენება იქ ბიბლიური განათლების მხარდასაჭერად! ბევრი ინფორმაციული გამოფენისა და მოკლემეტრაჟიანი ვიდეოფილმების საშუალებით სტუმრებმა გაიგეს, როგორ ხდება ხმის ჩაწერა და როგორ მზადდება ვიდეოფილმები. მათ ზოგი რამ შეიტყვეს იმის შესახებ, თუ რა საგულდაგულოდ ხდება რეკვიზიტისა და კოსტიუმების შერჩევა და მომზადება. დაინახეს, როგორ კეთდება სცენის დეკორაცია მინიმალური დანახარჯებით, მაგრამ რა დიდი ყურადღება ექცევა ყოველ წვრილმანს. აგრეთვე ნახეს, როგორ ირჩევა მუსიკა, რომ ხალხმა თავი იმ სიტუაციაში წარმოიდგინოს, რომელსაც უყურებენ. 1990 წლიდან მოყოლებული საზოგადოებამ 41 ენაზე გამოსცა ათი ვიდეოფილმი სხვადასხვა ბიბლიურ თემაზე, იმ სხვა დამატებითი ვიდეოფილმების გარდა, რომლებიც ამერიკული ჟესტების ენაზე მოლაპარაკეთათვის არის გამოცემული.

ბევრმა დამთვალიერებელმა იხილა ფოტოლაბორატორია, მხატვრული გაფორმების განყოფილება, კომპიუტერული განყოფილება, რომელიც ზრუნავს კომპიუტერზე მუშაობის სწავლებასა და მათ მოვლაზე, სამსახურებრივი განყოფილება, რომელიც ზედამხედველობს 11 242 კრებისა და 572 მომომსვლელი ზედამხედველის საქმიანობას, და კორესპონდენციის განყოფილება, სადაც ყოველწლიურად დაახლოებით 14 000 სხვადასხვა საკითხთან დაკავშირებულ შეკითხვას პასუხობენ. მათზე შთაბეჭდილება მოახდინა იმან, თუ როგორი კვლევა-ძიება ტარდება წერილების გაგზავნამდე, და იმ პირების მიმართ გამოვლენილმა გულწრფელმა ინტერესმა, რომელთა შეკითხვებიდანაც აშკარად ჩანს, რომ სერიოზულ პრობლემებს ებრძვიან.

დამთვალიერებლების ჯგუფმა მთარგმნელობითი განყოფილებაც მოინახულა. ისინი გაოცებული დარჩნენ, როცა შეიტყვეს, რომ გასული ხუთი წლის განმავლობაში კიდევ 102 ენა დაემატა იმ ენების რიცხვს, რომლებზეც საზოგადოება ბიბლიურ ლიტერატურას გამოსცემს. მთელ მსოფლიოში იეჰოვას მოწმეთა დაახლოებით 80 პროცენტი ინგლისურ ენაზე კი არა, სხვა ენებზე კითხულობს საზოგადოების პუბლიკაციებს. მათი მოთხოვნილებების დასაკმაყოფილებლად 1 700-ზე მეტი მოხალისე ასრულებს მთარგმნელობით საქმეს 100 ქვეყანაში. გამოფენაზე სტუმრებმა იხილეს „საგუშაგო კოშკი“ ამერიკულ, ევროპულ, აზიურ და აფრიკულ ენებზე. დამთვალიერებლებს შესაძლებლობა მიეცათ, ენახათ 31 ენაზე გამოქვეყნებული „ახალი ქვეყნიერების თარგმანი“. მათ შეიტყვეს, რომ ამჟამად საზოგადოება „საგუშაგო კოშკის“ პუბლიკაციები 332 ენაზეა ხელმისაწვდომი და რომ აქედან 219 ენაზე გამოქვეყნებულია ბროშურა „რას მოითხოვს ღმერთი ჩვენგან?“.

იურიდიული განყოფილების მნახველებს გააცნეს იმ საქმიანობის სხვადასხვა სფერო, რომლებიც მსოფლიო მასშტაბით იურიდიულ მიდგომას ითხოვს. მათ ნახეს ვიდეოფილმი ნამდვილი სასამართლო საქმის მოსმენის შესახებ, რომელზეც მოწმე ადვოკატს არგუმენტები მოჰყავდა სისხლის გადასხმის საკითხთან დაკავშირებით. ამასთანავე, მათ გაიგეს, რა კეთდება იმისათვის, რომ კეთილი ცნობის საჯაროდ ქადაგება დაბრკოლებების გარეშე წარიმართოს (ფილიპელთა 1:7). ყურადღება გამახვილდა ამა წლის მარტში ფედერალური საოლქო სასამართლოს მიერ მიღებულ გადაწყვეტილებაზე — კანონები შეცვლილიყო ორადელის რაიონში (ნიუ-ჯერზი, აშშ), რომ იეჰოვას მოწმეებისგან, რომელთაც იმ დასახლებაში კარდაკარ საჯარო მსახურება სურთ, არ მოეთხოვათ ნებართვის მიღება და სამკერდე ნიშნების ტარება.

მაგრამ სტუმრებმა მარტო ეს როდი ნახეს. მათ ბეტონის ქარხანაში დაათვალიერეს სამშენებლო გამოფენა. აგრეთვე მოინახულეს წყლის საწმენდი ნაგებობები, ელექტროსადგური, წყლის გამფილტრავი დანადგარი და ბევრი სხვა ტექნიკური მომსახურების საამქრო. ეს განუმეორებელი შესაძლებლობა იყო.

მიძღვნის პროგრამაში ხაზი ესმება ღვთიურ განათლებას

თვითონ მიძღვნის პროგრამა ოთხშაბათს, 19 მაისს, ჩატარდა, რომელიც 16.00-ზე დაიწყო. სიხარულით აღსავსე 6 929 კაცს შორის იყვნენ მთავარი სამმართველოს პერსონალის წევრები, საზოგადოების სტუმრები და კანადაში არსებულ ფილიალში შეკრებილი 372 ადამიანი, რომლებიც ტრანსლაციის საშუალებით ისმენდნენ პროგრამას.

აუდიტორიას ნამდვილად ესიამოვნა საზოგადოება „საგუშაგო კოშკის“ პრეზიდენტის, მილტონ ჯ. ჰენშელის, გამამხნევებელი მისასალმებელი სიტყვების მოსმენა. შემდეგ ხელმძღვანელი საბჭოს წევრმა და ამ პროგრამის თავმჯდომარემ, თეოდორ იარაჩმა, აუდიტორიას უილიამ მალენფანტი წარუდგინა. ამ უკანასკნელმა „სამშენებლო პროგრამის ღირსშესანიშნავ პუნქტებში“ ინტერვიუ აიღო სამი ძმისგან, რომლებსაც მნიშვნელოვანი წვლილი მიუძღოდათ საზოგადოება „საგუშაგო კოშკის“ საგანმანათლებლო ცენტრის მშენებლობის ორგანიზატორობაში, დაპროექტებასა და მშენებლობაში. ინტერვიუების დროს აღინიშნა, რომ მშენებლობის პერიოდში, რომელიც წლების მანძილზე გრძელდებოდა, 8 700-ზე მეტი დამატებითი მომუშავე საკუთარი ხარჯებით მოდიოდა მოსახმარებლად. რა შესანიშნავად მოწმობს ყოველივე ეს ერთიანობასა და გულუხვობაზე, რაც ღვთიური სწავლებით მიიღწევა!

ამას მოჰყვა მოხსენებათა სერია, სათაურით „ღვთიური განათლება მსოფლიო მასშტაბით“, რომელიც ხელმძღვანელი საბჭოს ოთხმა წევრმა წარმოადგინა. ჯონ ბარმა აღნიშნა, რომ ღვთიურ განათლებას საფუძვლად უდევს ღვთის სიტყვა, ბიბლია, რომელიც ქრისტიანებს მოუწოდებს, ‘ნაყოფი გამოიღონ ყოველ კეთილ საქმეში და გაიზარდონ ღვთის შეცნობაში’ (კოლასელთა 1:10). დენიელ სიდლიკმა განიხილა, თუ როგორ არის ღვთიური განათლება თეოკრატიულად ორგანიზებული — ქრისტიანული კრების თავიდან, იესო ქრისტედან, დაწყებული, მსოფლიო საძმოს თითოეული წევრით დამთავრებული (1 კორინთელთა 12:12—27). მოხსენებათა სერიის ბოლო ორ ნაწილში, რომლებიც გერიტ ლეშმა და კერი ბარბერმა წარმოადგინეს, ნაჩვენები იყო, როგორ ამზადებს ღვთიური განათლება მსახურებს, ყველგან მონახონ ხალხი და ასწავლონ, რომ ღვთისმოსაწონი გზით იარონ (ესაია 2:1—4; 2 კორინთელთა 3:5).

აუდიტორია ამ საგანმანათლებლო ცენტრში არსებულ სხვადასხვა სკოლას რომ გასცნობოდა, ინტერვიუები აიღეს და ისაუბრეს ინსტრუქტორებთან და მათს საქმიანობაში მონაწილე სხვა წევრებთან. ნაჩვენები იყო თითოეული სკოლის როლი მსოფლიო მასშტაბით ღვთიური განათლების პროგრამის შესრულებაში. აღინიშნა, რომ სკოლა „გალაადში“ ყურადღება მახვილდება ბიბლიის თითოეული წიგნის შესწავლაზე, იეჰოვას ხალხის თანამედროვე ისტორიასა და მისიონერული მსახურებისთვის მომზადებაზე. ფილიალის სკოლაში იმ საქმიანობის მრავალი სფეროს სრულიად ამომწურავი შესწავლა ხდება, რომელსაც ფილიალის კომიტეტის წევრები ეწევიან. სკოლა მიმომსვლელი ზედამხედველებისთვის არა მხოლოდ იმიტომ დაარსდა, რომ მიმომსვლელი ძმების მოთხოვნილებები დაკმაყოფილებულიყო, არამედ იმიტომაც, რომ მომზადებულიყვნენ კრებებისთვის განსაკუთრებული სულიერი დახმარების აღმოსაჩენად.

ამ შესანიშნავი პროგრამის დასასრულს ხელმძღვანელი საბჭოს წევრმა, ლოიდ ბერიმ, წარმოთქვა მიძღვნასთან დაკავშირებული მოხსენება, სათაურით „ვაშენოთ ჩვენს დიდებულ შემოქმედთან ერთად“. მან აღნიშნა, რომ შემოქმედი, იეჰოვა, აღტაცებულია თავისი ნამოქმედარით და გვიწვევს, მასთან ერთად ვიხაროთ (ესაია 65:18). რადგანაც „ყოველივეს აღმშენებელი ღმერთია“, მთელი ამ მშენებლობისთვის უმთავრესად იეჰოვა ღმერთი იმსახურებს ქებას (ებრაელთა 3:4). ამ აზრების გადმოცემის შემდეგ მომხსენებელმა გულწრფელი ლოცვა წარმოთქვა და საზოგადოება „საგუშაგო კოშკის“ საგანმანათლებლო ცენტრი იეჰოვას, ჩვენს დიდებულ შემოქმედს, მიუძღვნაa.

ეჭვი არ გვეპარება, რომ ეს ერთკვირიანი დღესასწაული ყველა დამსწრეს ღრმად ჩაებეჭდა გონებაში. რატომ არ დაგეგეგმათ საზოგადოება „საგუშაგო კოშკის“ საგანმანათლებლო ცენტრში სტუმრობა? დარწმუნებული ვართ, რომ მისი მონახულება და დათვალიერება წაგახალისებთ, უფრო მეტი გაიგოთ ჩვენი მოსიყვარულე შემოქმედის შესახებ და იცხოვროთ მისი სამართლიანი ნორმების შესაბამისად.

[სქოლიო]

[სურათები 10 გვერდზე]

სავსე აუდიტორია და გადაჭედილი სასადილო.

[სურათები 10 გვერდზე]

ექსკურსიები განსაკუთრებით სასიხარულო იყო.