გამოიყენე ტრაქტატები საუბრის დასაწყებად
1 ნუთუ არ ეთანხმები, რომ ეფექტურად ქადაგება დიდად არის დამოკიდებული შენ მიერ საუბრის დაწყების ინიციატივის აღებაზე? ადვილი არ არის, ისეთი რამ უთხრა ადამიანს, რომ დააინტერესო და საუბარში ჩააბა. მაგრამ როგორ შეიძლება ამის ეფექტურად გაკეთება?
2 ბევრმა მაუწყებელმა დაინახა, რომ საუბრის დაწყება შეიძლება რამდენიმე კარგად შერჩეული სიტყვით ბიბლიაზე დაფუძნებული ერთ-ერთი ჩვენი ტრაქტატის შეთავაზებით. სათაურები და ფერადი ილუსტრაციები მაშინვე თვალში მოსახვედრია. ტრაქტატი არ აფრთხობს პიროვნებას და ისეთ შთაბეჭდილებას არ უტოვებს, რომ ძალიან ბევრი ინფორმაციაა წასაკითხი. მათში მოკლედ გადმოცემული საინტერესო ცნობები შეიძლება გამოყენებულ იქნეს ბიბლიის შესწავლის დასაწყებად.
3 აი რა თქვა ერთმა მოწმემ: „ამ მოუცლელ წუთისოფელში ხალხს ხშირად არ სურს კითხვისთვის ბევრი დროის დათმობა, მაგრამ ტრაქტატები იმ ზომისაა, რომ მნიშვნელოვანი ცნობა გადასცეს, თუმცა არა ისეთი ზომის, რომ ხალხმა არც კი დახედოს. მე ბევრი ტრაქტატი წავიკითხე და, საბოლოოდ, ჭეშმარიტება გავიგე“. ნურასოდეს გააუბრალოებ ამ დაბეჭდილ მოკლე ცნობებში ახსნილ ღვთის სიტყვის ძალას (ებრ. 4:12).
4 ოთხი ადვილი ნაბიჯი. ბევრმა მიაღწია წარმატებას უბრალო მიდგომით. 1) აჩვენე პიროვნებას რამდენიმე ტრაქტატი და ჰკითხე, რომელი დააინტერესებდა. 2) არჩევის შემდეგ დაუსვი კარგად მომზადებული კითხვა, რომელიც ხაზს უსვამს ტრაქტატის მთავარ აზრს. 3) კითხვაზე პასუხის გასაცემად წაუკითხე ტრაქტატში მოცემული შესაბამისი აბზაცი ან ბიბლიური მუხლი. 4) კეთილგანწყობილი გამოხმაურების შემთხვევაში განაგრძე ტრაქტატში მოცემულ ინფორმაციაზე საუბარი ან მიმართე გაკვეთილს ბროშურიდან „რას მოითხოვს“ ან თავს წიგნიდან „შემეცნება“, რომელშიც დამატებითი ინფორმაციაა. ამგვარად შეიძლება ბიბლიის შესწავლაც დაიწყო. შემდეგი რჩევები დაგეხმარება ოთხი სხვადასხვა ტრაქტატის შესათავაზებლად მომზადებაში.
5 ტრაქტატის სათაური „სინამდვილეში ვინ მართავს ქვეყნიერებას?“ შეიძლება კითხვის სახით დაისვას.
◼ თუ მოსაუბრის პასუხი ამ კითხვაზე არის „ღმერთი“ ან ამბობს, არ ვიციო, წაუკითხე მე-2 გვერდის პირველი ორი აბზაცი და მე-3 გვერდის პირველი აბზაცი. ყურადღება გაამახვილე 1 იოანეს 5:19-სა (აქ) და გამოცხადების 12:9-ზე. სულერთია, პიროვნებას ეჭვი ეპარება სატანა ეშმაკის არსებობაში თუ აღიარებს წუთისოფელზე მის გავლენას, საუბრის გასაგრძელებლად შეგიძლია მოუყვანო არგუმენტები, რომლებიც მოყვანილია ქვესათაურში „გამოცანის გასაღები — მსოფლიო პირობებიდან“. თუ თანამოსაუბრე ინტერესს ავლენს, ტრაქტატის მე-3 და მე-4 გვერდებზე მოყვანილი აზრების გამოყენებით შესთავაზე იმის ახსნა, თუ საიდან გაჩნდა ეშმაკი.
6 ტრაქტატმა „რა იმედი არსებობს საყვარელი განსვენებულებისთვის?“ შეიძლება მაშინვე აღძრას ინტერესი. საუბარი შეგიძლია დაიწყო შეკითხვით:
◼ „თქვენი აზრით, ოდესმე კვლავ ვნახავთ ჩვენს საყვარელ განსვენებულებს?“ პასუხის შემდეგ ტრაქტატის მე-4 გვერდის მეორე აბზაციდან წაუკითხე იოანე 5:28, 29. შემდეგ აუხსენი, რომ ეს გვეხმარება გავიგოთ ტრაქტატის პირველივე ქვესათაურში მოცემული ინფორმაცია. შესთავაზე მისი ერთად განხილვა.
7 ტრაქტატი „იხარე ოჯახური ცხოვრებით“ ყველა ოჯახს მიმართავს. მისი გამოყენებისას შეგეძლო გეთქვა:
◼ „ალბათ, დამეთანხმებით, რომ დღეს ოჯახი დიდი პრობლემების წინაშე დგას. თქვენი აზრით, რა შეიძლება გაკეთდეს ოჯახური კვანძების გასაძლიერებლად?“. პასუხის შემდეგ პიროვნების ყურადღება მიმართე მე-6 გვერდის პირველ აბზაცში მოცემული აზრებისკენ. შეარჩიე მე-4 და მე-5 გვერდებზე ციტირებული მუხლებიდან ერთ-ერთი და ახსენი მისი მნიშვნელობა. შემდეგ შესთავაზე ბიბლიის უფასო საშინაო შესწავლა.
8 ტრაქტატი „რატომ შეგიძლია ენდო ბიბლიას“ შეიძლება გამოყენებულ იქნეს შემდეგი შესავლით:
◼ „მრავალს სმენია კაენისა და აბელის ამბავი, რომელიც ბიბლიის პირველ წიგნშია მოთხრობილი. „დაბადებაში“ მოცემული ცნობა კაენის ცოლსაც იხსენიებს. დაინტერესებულხართ ოდესმე, საიდან მოიყვანა ის?“. პასუხის გასაცემად გამოიყენე ტრაქტატის მე-2 გვერდის ბოლო აბზაცი. ახსენი, რომ ტრაქტატში განხილულია აგრეთვე ბიბლიის მნიშვნელოვანი წინასწარმეტყველებები ჩვენს მომავალთან დაკავშირებით. დამხმარე მუხლების გამოყენებით საუბარი განაგრძე მე-5 გვერდის მეოთხე აბზაციდან.
9 ტრაქტატების გავრცელება დროთა განმავლობაში გამონაცადი ეფექტური საშუალებაა კეთილი ცნობის გადასაცემად. რადგანაც ისინი ყველგან ადვილი სატარებელია, შეგიძლია ეფექტურად გამოიყენო კარდაკარ და არაფორმალურად მსახურებისას. ტრაქტატები მნიშვნელოვან როლს ასრულებს ჩვენი მსახურების შესრულებაში. აუცილებლად თან ატარე სხვადასხვა მათგანი და ნუ დაიშურებ მათ გამოყენებას საუბრის დასაწყებად (კოლ. 4:17).