აუცილებლად მოინახულე განმეორებით!
1 „რა კარგი საუბარი იყო! არ დამავიწყდეს, განმეორებით მოვინახულო ეს ადამიანი“. გითქვამს ოდესმე ასეთი სიტყვები და დაგვიწყებია ამის შემდეგ პიროვნების მისამართი? თუ დიახ, როგორც იცი, ამ ყველაფრის ჩაწერა დამახსოვრების საუკეთესო საშუალებაა, რათა ადამიანი აუცილებლად მოინახულო განმეორებით.
2 ყველაფერი ჩაიწერე. სანამ დაინტერესებულ ადამიანთან საუბარი კარგად გახსოვს, ნუ დაგეზარება: მაშინვე ჩაიწერე ყველაფერი, რაც ამ მონახულებას ეხება. ჩაწერე პიროვნების სახელი და აღწერე მისი გარეგნობა, რომ შემდეგ გაიხსენო. ჩაწერე მისი მისამართი, მაგრამ არა ვარაუდით — ჯობია შეამოწმო, რომ ყველაფერს ზუსტად წერ. აღნიშნე, რა თემაზე ისაუბრეთ, რომელი მუხლები ამოიკითხე და რომელი პუბლიკაციები დაუტოვე.
3 თუ რამე კითხვა დასვი, რომელზეც განმეორებითი მონახულების დროს უნდა უპასუხო, ესეც ჩაწერე. რა გაიგე იმ ადამიანის, მისი ოჯახისა თუ რელიგიის შესახებ? ჩაინიშნე ყველაფერი. შემდეგ, როცა განმეორებით მოინახულებ და მოიხსენიებ ამ ფაქტებს, ამით მის მიმართ შენი ინტერესი გამოვლინდება. ბოლოს ჩაწერე პირველი მონახულების დღე და დრო, ასევე განმეორებითი მონახულების დათქმული დრო. ზუსტი ჩანაწერები შეგახსენებს ყველაფერს და იმის ალბათობაც ნაკლები იქნება, რომ შეპირებული მონახულება დაგავიწყდეს (1 ტიმ. 1:12).
4 როცა ყველაფრის ჩაწერას მორჩები, ჩანაწერები შეინახე სამქადაგებლო მსახურებისთვის განკუთვნილ ნივთებთან ერთად, რაშიც შედის: ჩანთა, ბიბლია, ბროშურა, „როგორ დავიწყოთ და გავაგრძელოთ ბიბლიურ თემაზე საუბარი“, და სხვა ლიტერატურა — რათა ის ყოველთვის ხელთ გქონდეს. კარგია, თუ ჩანაწერებს მათ შესახებ, ვინც შინ არ დაგხვდა, გააკეთებ არა იქ, სადაც გიწერია შენიშვნები განმეორებითი მონახულებების შესახებ, არამედ ცალკე. რა თქმა უნდა, მიუხედავად იმისა, თუ რა ძალისხმევას ახმარ ზუსტი ჩანაწერების გაკეთებას, მნიშვნელოვანია, აუცილებლად მოინახულო ადამიანები!
5 იფიქრე ადამიანის შესახებ. როცა მსახურებისთვის ემზადები, გადახედე განმეორებითი მონახულებების ჩანაწერებს. დაფიქრდი თითოეულ ადამიანზე და იმაზე, თუ როგორი მიდგომა იქნებოდა საუკეთესო, როცა მიაკითხავ მათ. იფიქრე იმაზე, თუ როგორ დააინტერესო ადამიანი ბიბლიის საშინაო შესწავლის დაწყებით. ასეთ დაგეგმარებას შეუძლია ნაყოფიერი გაგხადოს სასიხარულო ცნობის ქადაგებაში და, შედეგად, სიხარული მოგგვაროს (იგავ. 21:5ა).
6 ასე რომ, როცა შემდგომში მომსმენი ადამიანი შეგხვდება, ნუ იფიქრებ, რომ ადვილად დაიმახსოვრებ ყველაფერს. ჯობია, ჩაიწერო ყველაფერი, გადახედო ამ ჩანაწერებს, იფიქრო ადამიანზე და შემდეგ აუცილებლად მოინახულო!