„როგორ გავიგებ, თუ არავინ განმიმარტავს?“

¹ როცა მახარებელმა ფილიპემ ჰკითხა ეთიოპელ საჭურისს, ესმოდა თუ არა, რასაც ღვთის სიტყვიდან კითხულობდა, მამაკაცმა უპასუხა: „როგორ გავიგებ, თუ არავინ განმიმარტავს?“. ფილიპე სიხარულით დაეხმარა მას იესოს შესახებ კეთილი ცნობის გაგებაში, რის შედეგადაც მამაკაცი დაუყოვნებლივ მოინათლა (საქ. 8:26—38). ფილიპე ემორჩილებოდა ქრისტეს ბრძანებას — ‘მოემოწაფა ყველა ხალხი, მოენათლა და განესწავლა ისინი’ (მათ. 28:19, 20).

² ფილიპეს მსგავსად, ჩვენც უნდა დავემორჩილოთ მოწაფეების მომზადების ბრძანებას. მაგრამ ისეთი სწრაფი სულიერი წინსვლა, როგორიც ეთიოპელ საჭურისს ჰქონდა, იშვიათად თუ შეიმჩნევა მათ შემთხვევაში, ვისაც ბიბლიას ვასწავლით. ის კაცი, იუდეველი პროზელიტი იყო, კარგად ესმოდა საღვთო წერილი, ჰქონდა მორჩილი გული და მხოლოდ ისღა დარჩენოდა, რომ იესო აღთქმულ მესიად მიეღო. ასე რომ, რთულია, თუ ისინი, ვისაც ვასწავლით, არ იცნობენ ბიბლიას, თავგზააბნეული არიან ცრუ რელიგიის სწავლებებით ან დამძიმებული არიან პირადი რთული პრობლემებით. რა დაგვეხმარება იმაში, რომ წარმატებულად მივიყვანოთ ბიბლიის შემსწავლელები მიძღვნასა და მონათვლამდე?

³ განჭვრიტე ბიბლიის შემსწავლელის სულიერი მოთხოვნილებები. 1998 წლის აგვისტოს „ჩვენი სამეფო მსახურების“ დანართში საუბარი იყო დროის იმ ხანგრძლივობაზე, რომლის განმავლობაშიც შეგვეძლო შესწავლის ჩატარება ბროშურის „რას მოითხოვს“ და წიგნ „შემეცნების“ გამოყენებით. იქ მოცემული იყო შემდეგი მითითება: „აუცილებელია, შესწავლის სიჩქარე განვსაზღვროთ დაინტერესებულის მდგომარეობისა და უნარის მიხედვით. . . ჩვენი სურვილი არ არის, რომ სიჩქარის გამო შემსწავლელს საშუალება არ მივცეთ, ნათლად გაერკვეს მასალაში. ყოველ შემსწავლელს ესაჭიროება მყარი საფუძველი ღვთის სიტყვის ახლად შეძენილი რწმენისთვის“. აქედან გამომდინარე, სასურველია, თუ არ ვიჩქარებთ წიგნ „შემეცნების“ მასალის ექვს თვეში გავლას. ზოგ შემთხვევაში შეიძლება საჭირო იყოს ექვს თვეზე მეტი, რათა დავეხმაროთ მათ, რომ მონათვლამდე მივიდნენ. ყოველკვირა, როცა შესწავლას ატარებ, იმდენი დრო დაუთმე, რამდენიც საჭირო იქნება, რომ შემსწავლელს დაეხმარო ღვთის სიტყვიდან შესწავლილის გაგებასა და მიღებაში. ზოგჯერ წიგნ „შემეცნებიდან“ ერთი რომელიმე თავის შესწავლას შეიძლება ორი ან სამი კვირა დასჭირდეს. ეს კი მრავალი მითითებული მუხლის წაკითხვისა და ახსნის საშუალებას მოგცემს (რომ. 12:2).

⁴ მაგრამ რა უნდა გააკეთო, თუ ხედავ, რომ „შემეცნების“ გავლის შემდეგ საჭიროა შემსწავლელის მიერ ჭეშმარიტების გაგების დახვეწა ან ხედავ, რომ ის ჯერ კიდევ არ არის აღძრული, ჭეშმარიტების მხარეზე დადგეს და თავი მიუძღვნას ღმერთს? მაშ, კიდევ რის გაკეთება შეიძლება, რომ სიცოცხლის გზაზე დააყენო ის? (მათ. 7:14).

⁵ დააკმაყოფილე ბიბლიის შემსწავლელის სულიერი მოთხოვნილებები. თუ ჩანს, რომ პიროვნებას წინსვლა აქვს, თუმცა არც ისეთი სწრაფი, და ის შესწავლილისადმი მადლიერებას ავითარებს, განაგრძე მასთან ბიბლიის შესწავლა მეორე პუბლიკაციით იმის შემდეგ, რაც გაივლით ბროშურას „რას მოითხოვს“ და წიგნ „შემეცნებას“. ეს შეიძლება ყოველთვის არ იყოს საჭირო. ყველა შემთხვევაში, პირველად უნდა შეასწავლოთ ბროშურა „რას მოითხოვს“ და წიგნი „შემეცნება“. ბიბლიის შესწავლა, განმეორებითი მონახულებები და დრო, რომელიც შესწავლის გაგრძელებას მიეძღვნა, უნდა შეიტანო ანგარიშებში, მაშინაც კი, თუ შემსწავლელი მოინათლა, მაგრამ სხვა პუბლიკაციის შესწავლა ჯერ არ დასრულებულა.

⁶ ნიშნავს თუ არა ეს იმას, რომ, თუ ვინმეს, ვინც ახლახან მოინათლა, მაგრამ მხოლოდ ერთი წიგნი შეისწავლა, ახლა უნდა დავეხმაროთ სხვა პუბლიკაციის შესწავლაში? ეს აუცილებელი არ არის. მაგრამ ისინი შეიძლება გახდნენ არააქტიურები ან მათ შეიძლება წინსვლა არ ჰქონდეთ ჭეშმარიტებაში, და შეიძლება გრძნობენ, რომ დახმარება სჭირდებათ, რათა ჭეშმარიტება უფრო სრულად გამოიყენონ ცხოვრებაში. მანამ, სანამ მონათლულ მაუწყებელთან შესწავლას განვაახლებთ, სამსახურებრივ ზედამხედველს უნდა მივმართოთ რჩევისთვის. ხოლო, თუ ვინმეს იცნობ, ვინც წარსულში „შემეცნება“ გაიარა, მაგრამ წინ არ წაიწია მიძღვნისა და მონათვლისკენ, შეგიძლია გამოავლინო ინიციატივა და ჰკითხო, სურს თუ არა ბიბლიის შესწავლის განახლება.

⁷ ასეთი ყურადღებიანობა თითოეული დაინტერესებული პირისადმი, ვისაც კი ვასწავლით, ქრისტიანული სიყვარულის მტკიცებაა. ჩვენი მიზანია, შემსწავლელი ღრმად ჩასწვდეს ღვთის სიტყვის ჭეშმარიტებას. შემდგომში ის გაცნობიერებულად დადგება ჭეშმარიტების მხარეზე და თავს მიუძღვნის იეჰოვას, რასაც წყალში მონათვლით დაადასტურებს (ფსალმ. 39:9; ეფეს. 3:17—19).

⁸ გახსოვს, რა მოხდა, როცა ეთიოპელი საჭურისი მოინათლა? როგორც იესო ქრისტეს ახალი მოწაფე, ის „გახარებული გაუდგა თავის გზას“ (საქ. 8:39, 40). დაე ჩვენ და მათაც, ვისაც წარმატებით ვაყენებთ ჭეშმარიტების გზაზე, დიდი სიხარული გვქონდეს იეჰოვა ღმერთისათვის მსახურებაში ახლაც და მარადჟამს!