მორცხვი ხომ არა ხარ?
1 არ გვიკვირს, როცა ვხედავთ, რომ პატარა ბავშვი დედას ან მამას უკან ამოფარებული გვიყურებს. სიმორცხვე ბუნებრივია ადრეული ბავშვობის წლებში. სრულწლოვანების ასაკშიც კი მრავალი, გარკვეულწილად, ბუნებით მორცხვია. თუ სიმორცხვე გავლენას ახდენს მსახურებაში შენს მონაწილეობაზე, რის გაკეთება შეგიძლია?
2 სიმორცხვესთან გამკლავება. მნიშვნელოვანია ყურადღება მიექცეს ‘გულის დაფარულ კაცს’ (1 პეტ. 3:4). გააძლიერე სიყვარული იეჰოვასა და მოყვასის მიმართ. სრულიად დარწმუნებული იყავი, რომ ქადაგებასთან დაკავშირებული დავალების შესრულება ერთ-ერთი საუკეთესო საშუალებაა თავგანწირული სიყვარულის გამოსავლენად. მიჰყევი პირადი შესწავლისა და კრებებზე დასწრების კარგ განრიგს. ლოცვაში რეგულარულად და კონკრეტულად სთხოვე იეჰოვას დახმარება. ღვთისადმი ძლიერი რწმენა და ნდობა განგიმტკიცებს დაჯერებულობას, რომ ‘უფრო მეტად და უშიშრად ილაპარაკო ღვთის სიტყვა’ (ფილ. 1:14).
3 შეეწინააღმდეგე არასრულფასოვნების გრძნობას. როგორც ჩანს, ტიმოთეს უწევდა ამის გაკეთება. პავლემ გაამხნევა ტიმოთე: „თავს ნუ დაამცირებინებ შენი სიჭაბუკის გამო“; და შეახსენა, რომ „ღმერთმა ჩვენ მოგვცა არა სიმხდალის სული, არამედ ძალის“ (1 ტიმ. 4:12; 2 ტიმ. 1:7). იეჰოვამ სრულად გამოიყენა ტიმოთე და მას ამის გაკეთება შენს შემთხვევაშიც შეუძლია, თუ ღმერთზე სრული მინდობით წარმატების მიღწევას ცდილობ (ფსალმ. 55:12).
4 ბიბლიაში მათეს 10:37-ში მოცემულ სიტყვებზე ფიქრი დაეხმარა დას, რომელსაც სიმორცხვე მოწინააღმდეგე ქმრის მიმართ შიშს უნერგავდა. სიძნელეების მიუხედავად, მისთვის მსახურება უფრო ადვილი გახდა, საბოლოოდ კი მისმა მეუღლემ, დედამ და ძმებმა ჭეშმარიტება მიიღეს!
5 მნიშვნელოვანია მომზადება. შენი დაჯერებულობა უფრო გაიზრდება, როცა საგულდაგულოდ მოემზადები მსახურებისთვის. შეარჩიე, შეისწავლე და გაიმეორე მარტივი შეთავაზება ბროშურიდან „როგორ დავიწყოთ და გავაგრძელოთ ბიბლიურ თემაზე საუბარი“ ან განვლილი „ჩვენი სამეფო მსახურებიდან“. უსარგებლო წუხილის ნაცვლად, დადებითზე იფიქრე. სხვებთან თანამშრომლობით განავითარე გამბედაობა. გახსოვდეს, რომ მრავალი ადამიანი, რომელსაც კარდაკარ ხვდები, შენსავით მორცხვია. ყველა საჭიროებს სამეფოს ცნობას.
6 თუ მორცხვი ხარ, გულს ნუ გაიტეხ. თუ ძალ-ღონეს ახმარ საკუთარ თავს, იეჰოვა დაგეხმარება, რომ კეთილი ცნობის ეფექტური მქადაგებელი გახდე. შემდგომ კი სიხარულს მიიღებ მსახურებაში (იგავ. 10:22).