ახალი სპეციალური ერთდღიანი კონგრესის პროგრამა
„იყავით გონებისთვის სრულწლოვანნი“ — ეს არის იმ სპეციალური ერთდღიანი კონგრესის პროგრამის დევიზი, რომელიც ჩატარდება 2000 წლის სექტემბრიდან (1 კორ. 14:20). რატომ იქნება ჩვენთვის სასარგებლო მასზე დასწრება? ჩვენ ვცხოვრობთ ბოროტებით აღსავსე წუთისოფელში. მისთვის წინააღმდეგობის გასაწევად სულიერი გონების განვითარება გვესაჭიროება, რათა ბოროტს კეთილით ვძლიოთ. ამაში კი ეს სპეციალური ერთდღიანი კონგრესი დაგვეხმარება.
პროგრამის პირველ ნახევარში სარაიონო ზედამხედველი განიხილავს თემას — „რა დაგვეხმარება იმაში, რომ სრულწლოვანნი გავხდეთ ბიბლიურ შემეცნებაში“. ის დაგვანახვებს, თუ როგორ შეგვიძლია ვიყოთ მტკიცედ ქრისტიანულ რწმენაში. თემაში „გრძნობების გაწვრთნით დაიცავი სულიერობა“, მოწვეული მომხსენებელი ხაზს გაუსვამს გამჭრიახობის განვითარებაში ბიბლიური პრინციპების გამოყენების სასიცოცხლო მნიშვნელობას.
ახალგაზრდებმაც უნდა განივითარონ გაგების უნარი. ეს საკითხი განხილული იქნება მოხსენებებში: „რატომ უნდა ვიყოთ ბოროტებისთვის ბავშვები“ და „ახალგაზრდები, რომლებიც ახლა გაგების უნარს იძენენ“. მოისმინე ახალგაზრდების ნათქვამი იმასთან დაკავშირებით, თუ რას აკეთებენ სულიერად გაძლიერებისთვის, რათა დასძლიონ თავიანთი ცნობისმოყვარეობა ბოროტი წუთისოფლის საქმიანობის მიმართ და თავიდან აიცილონ განსაცდელი.
როგორ შეგვიძლია ცხოვრებაში უდიდესი ბედნიერების პოვნა? მოწვეული მომხსენებელი განმარტავს ამას დასკვნით მოხსენებაში „სარგებლობა, რომელიც ბიბლიური პრინციპების საზრიანად გამოყენებას მოაქვს“. ის მაგალითებით გვიჩვენებს, რომ ღვთის სიტყვის გამოყენება გვეხმარება პრობლემებთან გამკლავებასა და გადაწყვეტილებების მიღებაში. აგრეთვე ეს დაგვეხმარება ნამდვილი სარგებლობის მიღებაში იქიდან, რასაც იეჰოვა გვასწავლის.
მათ, ვისაც სურს, რომ თავის მიძღვნა ამ კონგრესზე წყალში მონათვლით დაადასტუროს, ამის შესახებ რაც შეიძლება მალე უნდა შეატყობინონ თავმჯდომარე ზედამხედველს. სპეციალური კონგრესის ჩატარების თარიღის გამოცხადების შემდეგ მალე აღნიშნე ეს თარიღი შენს კალენდარში და დასახე კონკრეტული გეგმები, რათა სარგებლობა მიიღო ამ უხვი პროგრამიდან. ნუ გამოტოვებ სპეციალური კონგრესის რომელიმე ნაწილს! ის გაგაძლიერებს, რომ გაუძლო ამ ბოროტ სისტემას და იეჰოვას ერთგული დარჩე.