„გსურს“, დახმარება აღმოუჩინო სხვებს?

¹ იესო ნამდვილად ზრუნავდა ადამიანებზე. როდესაც მასთან ერთი კეთროვანი მივიდა თხოვნით, გაიწოდა ხელი, შეეხო ამ კაცს და უთხრა: „მსურს, განიწმიდე!“ (მარკ. 1:40—42). როგორ უნდა მივბაძოთ ამ მხრივ იესოს?

² დაინტერესებული ადამიანები: კრების თითოეული წევრი ეხმარება დაინტერესებულს იეჰოვას მსახურად გახდომაში. როდესაც თქვენს კრებაში ახლები მოვლენ, მიესალმე და გაეცანი. ეცადე, რომ წაახალისო. შეაქე ისინი კომენტარებისთვის და ცხოვრებაში ბიბლიური პრინციპების გამოყენებისთვის. დაანახვე, რომ კრებაში ნამდვილი მეგობრების პოვნა შეუძლიათ.

³ თანაქრისტიანები: დახმარებას განსაკუთრებით კი ისინი იმსახურებენ, „ვინც ჩვენიანია რწმენით“ (გალ. 6:10). ბევრი მათგანი ჯანმრთელობასთან დაკავშირებულ პრობლემებს ებრძვის. თუ მოინახულებ და პრაქტიკულ დახმარებას აღმოუჩენ, ეს მათთვის დიდი გამხნევება იქნება. ზოგი შეიძლება სხვა სიძნელეებს აწყდება ცხოვრებაში. მოუსმინე და გაამხნევე, დაანახვე, რომ მათით ხარ დაინტერესებული (1 თეს. 5:14). უხუცესებსაც სჭირდებათ ჩვენთან თანამშრომლობა, როდესაც თავიანთ პასუხისმგებლობებს ასრულებენ (ებრ. 13:17). თუ ყოველთვის მზად ვიქნებით დახმარების აღმოსაჩენად, თანაქრისტიანებისთვის „გამაძლიერებელნი“ გავხდებით (კოლ. 4:11, აქ).

⁴ ოჯახის წევრები: აგრეთვე უნდა ვეცადოთ, რომ იესოს მსგავსად გულშემატკივრობა ოჯახშიც გამოვავლინოთ. სწორედ შვილებისადმი გულშემატკივრობა უბიძგებს მშობლებს, რომ ‘აღზარდონ ისინი [შვილები] უფლის მოძღვრებითა და დარიგებით’ (ეფეს. 6:4). შვილებსაც თავიანთი წვლილის შეტანა შეუძლიათ ამაში, თუ ოჯახური შესწავლისთვის, კრების შეხვედრებისა და სამქადაგებლო მსახურებისთვის დროულად მოემზადებიან. შვილებმა კი იესოს მსგავსად თანაგრძნობა შეიძლება იმით გამოავლინონ, რომ მშობლებს სიბერის ჟამს სიყვარულით დაეხმარონ. თითოეულ ჩვენგანს შეუძლია ამ სახით თუ სხვაგვარად „ისწავლოს საკუთარ ოჯახში ღვთისადმი ერთგულების გამოვლენა“ (1 ტიმ. 5:4, აქ).

⁵ როდესაც იესოს ვბაძავთ სხვებისთვის დახმარების აღმოჩენაში, შეიძლება პრობლემები შევამციროთ და ჩვენი ოჯახი თუ კრება უფრო გავაერთიანოთ. და რაც ყველაზე მთავარია, იეჰოვას, „მოწყალების მამას“, მოვუტანთ ქებას და დიდებას (2 კორ. 1:3).