პენსიაში გასვლა — მსახურების გაფართოების შესანიშნავი შესაძლებლობა?
1 მრავალი, ვინც თავდაუზოგავად შრომობს, ელის პენსიაში გასვლას, რომ გათავისუფლდეს მძიმე შრომისა და სტრესისგან, რასაც სამსახურში განიცდის. თუმცა კი, ხშირ შემთხვევაში, პენსიაში გასვლას თან სდევს გულგრილობა, მოწყენილობა და ნაადრევი სიბერე. აზრით აღსავსე საქმიანობის გარეშე ცხოვრების შედეგად ადამიანი შეიძლება საკუთარ თავზე გადამეტებულმა საზრუნავმა და დარდმა მოიცვას. ერთი ბრაზილიური გაზეთი წერდა, რომ პენსიაში გასული სახელმწიფო მოსამსახურეები უჩივიან პრობლემებს — დაწყებული უკმაყოფილებით, გაღიზიანებით, შიშითა და არასრულფასოვნების გრძნობით და დამთავრებული დეპრესიითა და იმაზე ფიქრით, რომ მათმა ცხოვრებამ აზრი დაკარგა.
2 ამის საპირისპიროდ, ბევრი ქრისტიანისთვის ცხოვრების ეს ახალი ეტაპი სულიერი მსახურების გაფართოების საშუალება ხდება. ერთმა ძმამ, რომელიც პიონერი გახდა ორი კვირის შემდეგ, რაც 65 წელი შეუსრულდა, აღნიშნა: „უნდა ვთქვა, რომ ცხოვრებაში ამდენი კურთხევა არ განმიცდია, რამდენიც ბოლო 10 წლის განმავლობაში, პიონერული მსახურების პერიოდში, განვიცადე“. ერთმა ცოლ-ქმარმა თქვა: „ჩვენთვის ოქროს წლები პიონერული მსახურების დაწყების შემდეგ დაიწყო“. დიახ, ბევრს პენსიაში გასვლა აძლევს იმის შესანიშნავ შესაძლებლობას, რომ ეს პერიოდი მსახურების გასაფართოებლად გამოიყენოს და იეჰოვასაგან უხვი კურთხევები მიიღოს.
3 იყავი დაკავებული და აქტიური. ბევრი, ვინც ახლა პენსიონერია, ცუდ პირობებში გაიზარდა და ადრეული ასაკიდანვე მოუწიათ მძიმე შრომა. მართალია ისეთივე ენერგია აღარ აქვთ, როგორც ახალგაზრდობაში, მაგრამ მათ ჯერ კიდევ ბევრის გაკეთება შეუძლიათ. ერთ-ერთი ფილიალის ტერიტორიაზე პიონერთა 22 პროცენტი — დაახლოებით 20 000-მდე და-ძმა — საშუალოდ 60 წლისაა. ხანდაზმულებს დიდი წვლილი შეაქვთ სამქადაგებლო მსახურებაში. მათი გამოცდილება და ღვთისთვის მოსაწონი თვისებები ამდიდრებს კრებებს, რომლებშიც ისინი მსახურობენ (იაკ. 3:17, 18).
4 ქრისტიანულ მსახურებაში აქტიური მონაწილეობა ხელს უწყობს ჯანმრთელობას და ხალისს მატებს სიცოცხლეს. 84 წლის დამ, რომელმაც პიონერად მსახურება მაშინ დაიწყო, როცა პენსიაში გავიდა, აღნიშნა: „დაინტერესებულ ადამიანებთან ჩატარებული ბიბლიის საშინაო შესწავლები მეხმარება, გონებრივად აქტიური დავრჩე. მე არა მყავს მანქანა, ამიტომ ფეხით ბევრს დავდივარ, რითაც ვინარჩუნებ ჯანმრთელობას“. ასაკოვანი პიონერი წყვილი ამბობს: „მსახურება გვეხმარება ემოციური და ფიზიკური ჯანმრთელობის შენარჩუნებაში. ჩვენ ყოველთვის ერთად ვართ, ბევრს ვიცინით და ვხარობთ ცხოვრებით“.
5 მსახურება იქ, სადაც დიდი მოთხოვნილებაა. ზოგი ქრისტიანი, ვინც პენსიაში გავიდა და თან ფინანსური მდგომარეობაც აძლევს ამის საშუალებას, მსახურობს იქ, სადაც მქადაგებლებზე მეტი მოთხოვნილებაა. სხვები მსახურებას ზრდიან უცხოენოვან ტერიტორიაზე ქადაგებით. პავლე მოციქულის მსგავსად, ეს გულმოდგინე მაუწყებლებიც ‘ყოველივე ამას აკეთებენ სახარებისათვის, რათა ისინიც გახდნენ მისი თანამონაწილენი’ (1 კორ. 9:23).
6 ერთმა ცოლ-ქმარმა პიონერად მას შემდეგ დაიწყო მსახურება, რაც ორი შვილი აღზარდეს. პიონერად მსახურებიდან შვიდი წლის გასვლის შემდეგ მათ დაიწყეს ჩინური ენის სწავლა. დღეს ისინი 70-ს გადაცილებული არიან. მათ ახლახან დიდი სიხარული განიცადეს, როდესაც ჩინური ჯგუფი, სადაც ისინი მსახურობენ, კრებად ჩამოყალიბდა. მართლაც დიდი კურთხევაა ასეთი წყვილები!
7 მსახურებიდან პენსიაში არ გადიან. მიუხედავად იმისა, რომ ადრე თუ გვიან ადამიანთა უმეტესობა პენსიაში გადის, ქრისტიანები ღვთის მსახურებიდან პენსიაში არ გადიან. ისინი ერთგულად აგრძელებენ მსახურებას „ბოლომდის“ (მათ. 24:13, 14). რა თქმა უნდა, ასაკის მატებასთან ერთად, ზოგი იმდენს ვეღარ ემსახურება იეჰოვას, როგორც უწინ. მაგრამ გამამხნევებელია იმის დანახვა, რომ ისინი მთელი გულით აკეთებენ ყველაფერს, რაც შეუძლიათ! ღვთის სიტყვა არწმუნებს მათ, რომ იეჰოვა არ დაივიწყებს მათ შრომასა და სიყვარულს, რაც მისი სახელის გულისთვის გამოავლინეს (ლუკ. 21:1—4; ებრ. 6:10).
8 თუ საპენსიო ასაკს უახლოვდები, რატომ არ ილოცებ და იფიქრებ იმაზე, თუ როგორ შეგიძლია შეცვლილი ვითარების მაქსიმალურად გამოყენება? ღვთის დახმარებით შეიძლება მიაღწიო იმას, რომ პენსიაში გასვლა აქტიური მსახურებისთვის გამოიყენო. ეს იეჰოვას განადიდებს და შენ უხვ კურთხევებს მოგიტანს (ფსალმ. 148:12, 13).