ჯგუფურ ქადაგებას სიხარული მოაქვს

¹ ვიდრე 70 მოწაფეს საქადაგებლად გაგზავნიდა, იესომ მათ ასწავლა, რა უნდა ელაპარაკათ. შემდეგ ისინი ორ-ორი კაცისგან შემდგარ ჯგუფებად დაყო და მიუჩინა ტერიტორია, სადაც სასიხარულო ცნობა უნდა ეუწყებინათ. ასეთი სახით ქადაგებამ მათ დიდი სიხარული მოუტანა (ლუკ. 10:1—17). ჯგუფური ქადაგება დღესაც ამხნევებს ღვთის ხალხს და სამქადაგებლო მსახურებაში ორგანიზებულობასა და ეფექტურობას ასწავლის.

² უხუცესები ხელმძღვანელობას უწევენ. უხუცესების ერთ-ერთი მნიშვნელოვანი პასუხისმგებლობა იმაზე ზრუნვაა, რომ ყველა მაუწყებელმა რეგულარულად მიიღოს მონაწილეობა სამქადაგებლო მსახურებაში. კვირის სამუშაო დღეებში ქადაგებას, ძირითადად, სამსახურებრივი ზედამხედველი უწევს ორგანიზებას. თითოეული წიგნის შესწავლის ზედამხედველი კი პასუხისმგებელია, ორგანიზება გაუწიოს თავისი ჯგუფის საქმიანობას — განსაკუთრებით შაბათ-კვირას. იმ შემთხვევაში, როცა მთელი კრება ესწრება სამქადაგებლო სამსახურის შეხვედრას (მაგალითად, „საგუშაგო კოშკის“ შესწავლის შემდეგ), წიგნის შესწავლის თითოეულმა ზედამხედველმა თვითონ უნდა იზრუნოს თავისი ჯგუფის საჭიროებებზე.

³ „შესაფერისად და წესიერად“. ძმამ, რომელიც სამქადაგებლო სამსახურის შეხვედრას ატარებს, დროულად უნდა დაიწყოს შეხვედრა და მას 10—15 წუთზე მეტი არ უნდა დაუთმოს. იგი ჯგუფებად ანაწილებს მაუწყებლებს, უნიშნავს მათ უბანს (გარდა იმ შემთხვევებისა, როცა ამაზე იზრუნებენ წიგნის შესწავლის ზედამხედველები, როგორც ზემოთ იყო აღნიშნული) და ამის შემდეგ ასრულებს შეხვედრას ლოცვით. ასეთი ორგანიზებულობის წყალობით თავიდან ავირიდებთ უშუალოდ სამქადაგებლო უბანზე მაუწყებლების თავმოყრას, რამაც შეიძლება ჩრდილი მიაყენოს ჩვენს საქმიანობას. პავლეც ხომ სწორედ ამისკენ მოგვიწოდებს: „ყველაფერი შესაფერისად და წესიერად ხდებოდეს“ (1 კორ. 14:40). ყველამ, ვინც ამ შეხვედრებს ესწრება, ხელი უნდა შეუწყოს მათ წესიერად და შესაფერისად ჩატარებას. ისინი დროულად უნდა მოვიდნენ, მზადყოფნით უნდა მიიღონ იმ ძმის მითითებები, ვინც შეხვედრას უძღვება და დამთავრებისთანავე უნდა წავიდნენ თავიანთ უბანზე.

⁴ ჯგუფური ქადაგება გვაახლოებს. ჯგუფური ქადაგება კრების წევრების გაცნობის შესანიშნავ შესაძლებლობას გვაძლევს. მართალია, არაფერია არასწორი იმაში, როდესაც მაუწყებლები წინასწარ არიან შეთანხმებული და ერთად ქადაგებას გეგმავენ, მაგრამ ისიც დიდ სარგებლობას მოგვიტანს, თუ ვინმესთან წინასწარ მოლაპარაკების გარეშე დავესწრებით სამქადაგებლო სამსახურის შეხვედრებს. ამ დროს შეიძლება ისეთ ძმასთან ან დასთან დაგვავალონ ქადაგება, რომელსაც კარგად არ ვიცნობთ, და სიყვარულში ‘გაფართოების’ საშუალება მოგვეცემა (2 კორ. 6:11—13, აფ).

⁵ ჯგუფური ქადაგება გვამხნევებს და გვაახლოებს, როგორც „ჭეშმარიტების თანამშრომლებს“ (3 იოან. 8). მოდი, მთელი გულით მივიღოთ მონაწილეობა მასში!