ქადაგება გვეხმარება მოთმინებაში
1 ღვთის სიტყვა მოგვიწოდებს, „მოთმინებით გავირბინოთ ჩვენ წინ მდებარე მანძილი“ (ებრ. 12:1). როგორც ასპარეზზე მორბენალს სჭირდება მოთმინება გამარჯვების მოსაპოვებლად, ჩვენც ასევე გვჭირდება მოთმინება, რომ მარადიულად ცხოვრების ჯილდო მივიღოთ (ებრ. 10:36). როგორ შეუძლია ქრისტიანულ მსახურებას დაგვეხმაროს, რომ ბოლომდე მოვითმინოთ? (მათ. 24:13).
2 სულიერად განმტკიცებულნი: როდესაც ვქადაგებთ სამართლიან ახალ ქვეყნიერებასთან დაკავშირებული შესანიშნავი დანაპირების შესახებ, ეს გვეხმარება, ყოველთვის ნათლად გვედგას თვალწინ ჩვენი იმედი (1 თეს. 5:8). სამქადაგებლო მსახურებაში რეგულარულად მონაწილეობის მიღებით შესაძლებლობა გვეძლევა, სხვებსაც გადავცეთ ჭეშმარიტი სწავლებები, რომლებიც ბიბლიიდან გავიგეთ. ჩვენ ვიცავთ ჩვენს რწმენას, რაც გვეხმარება სულიერად განმტკიცებაში.
3 იმისათვის, რომ ეფექტურად ვასწავლოთ სხვებს, უპირველესად, ჩვენ თვითონ კარგად უნდა გვესმოდეს ბიბლიური ჭეშმარიტება. ამისათვის საჭიროა ღვთის სიტყვის პირადად გამოკვლევა და მასზე ფიქრი. გულწრფელი ძალისხმევა, რასაც ამ ყოველივეს ვახმართ, გვმატებს ცოდნას, გვიძლიერებს რწმენას და სულიერად გამომაცოცხლებელია (იგავ. 2:3—5). ამიტომაც, როდესაც ყველანაირად ვცდილობთ სხვების დახმარებას, ასეთი სახით ჩვენ თვითონაც ვმტკიცდებით რწმენაში (1 ტიმ. 4:15, 16).
4 გულმოდგინედ ქადაგება მნიშვნელოვანია, რომ „შევიმოსოთ ღვთის სრული საჭურვლით“. ეს კი აუცილებელია იმისათვის, რომ მტკიცედ ვიდგეთ და წინააღმდეგობა გავუწიოთ სატანასა და მის დემონებს (ეფეს. 6:10—13, 15). ღვთის წმინდა მსახურებაში აქტიური მონაწილეობის მიღება გვეხმარება, ყურადღება სულიერ საკითხებზე გვქონდეს მიპყრობილი და სატანის ქვეყნიერების უარყოფითი ზეგავლენისგან დავიცვათ თავი (კოლ. 3:2). როდესაც სხვებს იეჰოვას გზებს ვასწავლით, ამით საკუთარ თავსაც ვახსენებთ, თუ რამდენად მნიშვნელოვანია სიწმინდის შენარჩუნება (1 პეტ. 2:12).
5 ღვთისგან გაძლიერებულნი: სასიხარულო ცნობის ქადაგება იეჰოვაზე მინდობას გვასწავლის (2 კორ. 4:1, 7). ეს მართლაც შესანიშნავი კურთხევაა! ღმერთზე მინდობით არა მარტო ჩვენს მსახურებას შევასრულებთ, არამედ, რა ვითარებაშიც არ უნდა აღმოვჩნდეთ, ნებისმიერ სირთულეს გავუმკლავდებით (ფილ. 4:11—13). იეჰოვაზე სრულად მინდობა მნიშვნელოვანია იმისათვის, რომ ბოლომდე მოვითმინოთ (ფსალმ. 54:23). ქადაგება მართლაც რომ მრავალმხრივ გვეხმარება მოთმინებაში.