დაუღალავად ვიქადაგოთ სასიხარულო ცნობა
1 ზოგჯერ შეიძლება ვფიქრობთ, რომ ჩვენი ტერიტორია უკვე არაერთხელ, საკმაოდ საფუძვლიანად დამუშავდა, და ცოტა თუ ეხმაურება ჩვენს ქადაგებას. მაგრამ, ჩვენ მრავალი მიზეზი გვაქვს იმისა, რომ განვაგრძოთ ქადაგება (მათ. 28:19, 20).
2 დასამოწმებლად: იესომ იწინასწარმეტყველა, რომ მისი მიმდევრები სამეფოს შესახებ ცნობას იქადაგებდნენ „ყველა ხალხისთვის დასამოწმებლად“, რაც ამ „ქვეყნიერების აღსასრულის“ ერთ-ერთი ნიშანი იქნებოდა (მათ. 24:3, 14). როდესაც ხალხი ხედავს, რომ სამეფოს შესახებ სასიხარულო ცნობას ვქადაგებთ, ეს მათთვის დიდი დამოწმებაა. მიუხედავად იმისა, რომ ზოგმა შეიძლება არც კი მოგვისმინოს, მას შემდეგ, რაც სამქადაგებლო უბანს დავტოვებთ, მათ შესაძლოა ჩვენზე საათების ან დღეების განმავლობაშიც კი ილაპარაკონ. როდესაც გვახსოვს ის, თუ რატომ ვქადაგებთ, ეს გვეხმარება, ნებისმიერი სიტუაციის მიუხედავად განვაგრძოთ მსახურება. ამ მიზეზებს შორისაა ის, რომ ქადაგებით გულს ვუხარებთ იეჰოვას, რადგან ბიბლიური წინასწარმეტყველების შესრულებაში ვიღებთ მონაწილეობას, ვამოწმებთ სასიხარულო ცნობას და ხალხს მოახლოებული განადგურების შესახებ ვაფრთხილებთ (2 თეს. 1:6—9).
3 საჭიროა, გულმოდგინედ ვიქადაგოთ: ამ ქვეყნიერებაში ბევრი რამ არის, რაც დროს ართმევს ხალხს და მათი ყურადღება სხვა რამეზე გადააქვს. ამიტომ ჩვენი მხრიდან გულმოდგინებაა საჭირო, რომ მათ სულიერისადმი ინტერესი გავუღვივოთ. ერთ ქალს მოწმეები მთელი წლის განმავლობაში ყოველკვირა აკითხავდნენ და კართან ესაუბრებოდნენ. ერთხელაც ქალმა ისინი შეიპატიჟა, რათა სახლში განეგრძოთ ბიბლიურ თემებზე მსჯელობა. მოსმენილმა მასზე დიდი შთაბეჭდილება მოახდინა. მან ბიბლიის შესწავლა და კრების შეხვედრებზე დასწრება დაიწყო და მალე მონათვლის სურვილიც გამოთქვა.
4 მსოფლიოში სწრაფად იცვლება მდგომარეობა და, შესაბამისად, ხალხის განწყობაც. მრავალმა, ვინც ადრე არ მიგვიღო, ახლა შეიძლება სიამოვნებით მოისმინოს იმედის მომცემი ცნობა. ერთი ადამიანიც რომ დადებითად გამოეხმაუროს სამეფოს ცნობას, შეგვიძლია თამამად ვთქვათ, რომ ჩვენმა დაუღალავმა ქადაგებამ შედეგი გამოიღო.
5 მთელ მსოფლიოში სულ უფრო და უფრო მეტი ადამიანი ‘ოხრავს და კვნესის მთელი იმ სისაძაგლის გამო, რაც ხდება’ (ეზეკ. 9:4). ის შედეგი, რასაც ჩვენ ვაღწევთ, იმის მაჩვენებელია, რომ ჯერ კიდევ არიან ადამიანები, რომლებიც დადებითად ეხმაურებიან სამეფოს შესახებ სასიხარულო ცნობას (ეს. 2:2, 3). ამიტომ, გულმოდგინედ და დაუღალავად განვაგრძოთ ქადაგება და კვლავაც ვიყოთ „უკეთესობის მახარობლები“ (ეს. 52:7; საქ. 5:42).