როდის უნდა მოვინახულოთ დაინტერესებულები განმეორებით?

1. რა შედის მოწაფეების მომზადებაში?

¹ მოწაფეების მომზადებაში ისიც შედის, რომ განმეორებით მივაკითხოთ მათ, ვინც მზად არის სამეფოს შესახებ ცნობის მოსასმენად (მათ. 28:19, 20). მონახულების გასაკეთებლად საუკეთესო დროის შერჩევა ხშირად დამოკიდებულია როგორც ჩვენს, ისე დაინტერესებულის გეგმებზე. რატომ უნდა მივაკითხოთ მობინადრეს პირველი მონახულებიდან მალევე?

2, 3. რატომ უნდა ვეცადოთ, რომ შეძლებისდაგვარად მალევე მოვინახულოთ დაინტერესებული?

² რატომ უნდა მივაკითხოთ მალევე? სამეფოს შესახებ სასიხარულო ცნობის საქმე მალე დასრულდება. ამ ქვეყნიერების აღსასრული კარს არის მომდგარი (მათ. 24:14; 1 პეტ. 4:7). ამიტომ, ვიდრე „ხსნის დღე“ არ დასრულებულა, ყურად უნდა ვიღოთ მოწოდება: ‘ვიქადაგოდ სიტყვა გადაუდებლად’. ამაში კი ის იგულისხმება, რომ შეძლებისდაგვარად მალე მივაკითხოთ მათ, ვინც ინტერესს ავლენს (2 კორ. 6:1, 2; 2 ტიმ. 4:2).

³ სატანას ძალიან უნდა მოსპოს თესლი, რომელსაც დაინტერესებულთა გულებში ვთესავთ (მარ. 4:14, 15). მათ, ვინც ინტერესს ავლენს, ხშირად დასცინიან ოჯახის წევრები, თანამშრომლები და სხვები. თუ მალევე მოვინახულებთ დაინტერესებულებს, ეს შესაძლებლობას მოგვცემს, წინა საუბარზე ავაგოთ ჩვენი მსჯელობა და მანამ გავუღვივოთ ინტერესი, სანამ სხვები გაუნელებენ მას.

4. რას უნდა შევეცადოთ პირველივე მონახულებისას?

⁴ დაგეგმე, როდის მოინახულებ: სანამ მობინადრისგან წამოხვალ, კარგი იქნება, თუ შეთანხმდებით, როდის მოინახულებ მას. წამოჭერი კითხვა, რომელსაც მომდევნო მონახულებაზე გასცემ პასუხს. კარგი მონახულების გასაკეთებლად ზუსტი ჩანაწერების გაკეთებაა საჭირო. თუ შენთვის შესაძლებელია, უთხარი მობინადრეს, რომ მეორე დღეს ან უახლოეს დღეებში მოინახულებ. თუ პირველად შაბათ-კვირას მიხვედი მობინადრესთან და მას სამუშაო დღეებში არ სცალია, შეგიძლიათ შეთანხმდეთ, რომ შემდეგ შაბათ-კვირას მოინახულებ. როცა შეთანხმდებით, ყველანაირად შეეცადე, დათქმულ დროს მიხვიდე (მათ. 5:37).

5. როგორ დაგვეხმარება მოწაფეეების მომზადებაში დაინტერესებულების დროულად მონახულება?

⁵ ჩვენ საფუძვლიანი მიზეზი გვაქვს, რაც შეიძლება მალე მოვინახულოთ დაინტერესებული განმეორებით. შეუთანხმდი მობინადრეს განმეორებით მონახულებაზე და დროულად მიაკითხე, რადგან „დრო ცოტაღა დარჩა“ (1 კორ. 7:29). რაც უფრო მალე მივაკითხავთ სამეფოს ცნობით დაინტერესებულს, შედეგი მით უკეთესი იქნება.