თავს ნუ შეიკავებ ქადაგებისგან
1. რას სჭირდება გამბედაობა და რატომ?
1 შეგიკავებია თავი სკოლაში ქადაგებისგან იმის შიშით, რომ დაგცინებდნენ? ქადაგებას დიდი გაბედულება სჭირდება, განსაკუთრებით მაშინ, თუ მორცხვი ხარ. რა დაგეხმარება ასეთ სიტუაციაში?
2. როგორ უნდა გამოიყენოს ქრისტიანმა განსჯის უნარი სკოლაში ქადაგებისას?
2 გამოიყენე განსჯის უნარი: სკოლა შეიძლება იყოს ის ადგილი, სადაც სხვებთან ქადაგების განსაკუთრებული შესაძლებლობა გაქვს, მაგრამ გახსოვდეს, რომ საჭირო არ არის ყველასთან საუბრის წამოწყება, როგორც ამას კარდაკარ მსახურებისას გააკეთებდი. გამოიყენე განსჯის უნარი, რომ განსაზღვრო, როდის წამოიწყო საუბარი (ეკლ. 3:1, 7). კლასში შეიძლება განიხილებოდეს ისეთი მასალა ან მოგცენ ისეთი დავალება, რომელიც შენს რწმენაზე საუბრის შესაძლებლობას მოგცემდა. ან შეიძლება თანაკლასელმა გკითხოს, რატომ არ იღებ მონაწილეობას ამა თუ იმ ღონისძიებაში. ზოგიერთი ქრისტიანი სასწავლო წლის დასაწყისშივე ეუბნება მასწავლებლებს, რომ იეჰოვას მოწმეა და აძლევს ლიტერატურას, რომლებშიც ჩვენი სწავლებებია განხილული. სხვები ლიტერატურას მერხზე დებენ იმ მიზნით, რომ თანაკლასელებმა მათ კითხვები დაუსვან.
3. როგორ შეიძლება მოემზადო სკოლაში ქადაგებისთვის?
3 მზად იყავი: თუ მომზადებული ხარ, უფრო თამამად იქადაგებ (1 პეტ. 3:15). ამიტომ ეცადე, წინასწარ იფიქრო, როგორ უპასუხებდი კითხვებს, რომლებიც შეიძლება თანაკლასელებს გაუჩნდეთ (იგავ. 15:28). თუ შესაძლებელია, თან იქონიე ბიბლია და რამდენიმე პუბლიკაცია, მაგალითად, წიგნი „მსჯელობა“, „ახალგაზრდების შეკითხვები“ და ლიტერატურა შემოქმედების შესახებ, რათა საჭიროების შემთხვევაში შეძლო მათი გამოყენება. სთხოვე მშობლებს ოჯახთან ერთად თაყვანისცემაზე წარმოადგინოთ სიტუაციები, რომლებსაც შეიძლება სკოლაში შეხვდე.
4. რატომ უნდა განაგრძო სკოლაში ქადაგება?
4 გქონდეს დადებითი განწყობა: ნუ დაასკვნი, რომ თანაკლასელები ჭეშმარიტების ხსენებაზე ყოველთვის დაგცინებენ. ზოგი, ალბათ, დააფასებს შენს გაბედულებას და შეიძლება მოგისმინოს კიდეც. მაგრამ, თუ არავინ მოგისმენს, გული არ გაიტეხო. იეჰოვას ისიც ესიამოვნება, რომ ძალისხმევა გამოავლინე (ებრ. 13:15, 16). ყოველთვის სთხოვე ღმერთს, დაგეხმაროს გაბედულად ლაპარაკში (საქ. 4:29; 2 ტიმ. 1:7, 8). წარმოიდგინე შენი სიხარული, როცა ვინმე მოგისმენს. ეს ადამიანი შეიძლება იეჰოვას მსახურიც კი გახდეს.