შეკითხვების ყუთი

◼ ვინ უნდა შეავსოს ტალონები და ინტერნეტ მოთხოვნები?

ჩვენი პუბლიკაციები ხშირად შეიცავს ტალონებს. ეს ტალონები შეიძლება შეავსონ და გაუგზავნონ ფილიალს იმ მიზნით, რომ მიიღონ ლიტერატურა ან იეჰოვას მოწმეებმა მიაკითხონ სახლში. გარდა ამისა, ბიბლიის შესწავლის თხოვნა შესაძლებელია ვებ-გვერდის www.watchtower.org გამოყენებით. ეს მრავალს დაეხმარა ჭეშმარიტების გაგებაში. მაგრამ მაუწყებლები გარკვეულ პრობლემებს წააწყდნენ, როდესაც ამ საშუალებებს იმ მიზნით იყენებდნენ, რომ ნათესავებსა თუ სხვებს მიეღოთ ბიბლიური ლიტერატურა ან მათთან მისულიყო რომელიმე იეჰოვას მოწმე.

ზოგი, ვისაც თავად არ უთხოვია ფილიალისთვის ლიტერატურის გამოგზავნა, უკმაყოფილებას გამოთქვამდა და ამბობდა, რომ ჩვენი ორგანიზაცია თავს აბეზრებდა მათ და ისინი ადრესატების სიის მსგავს სიაში ჰყავდათ შეყვანილი. როდესაც მაუწყებელი მიდიოდა მასთან, ვისაც თავად არ შეუვსია ტალონი, ეს მობინადრის გაღიზიანებას იწვევდა, რაც თავის მხრივ, მაუწყებელსაც უხერხულ მდგომარეობაში აგდებდა. ამიტომ ტალონი უნდა შეავსოს ან ინტერნეტ მოთხოვნა უნდა გააკეთოს თავად დაინტერესებულმა და არა მისთვის კეთილის მსურველმა მაუწყებელმა. როდესაც გაირკვევა, რომ მოთხოვნა სხვას აქვს გაკეთებული და არა დაინტერესებულ ადამიანს, მასზე ჩვეულებრივ რეაგირება არ მოხდება.

მაშ, როგორ შეგვიძლია სულიერად დავეხმაროთ ნათესავებს ან ახლობლებს? თუ გინდა, რომ მათ ჰქონდეთ ლიტერატურა, შეგიძლია საჩუქრის სახით პირადად გაუგზავნო. თუ ის დაინტერესდება და გაუჩნდება სურვილი, მიაკითხონ იეჰოვას მოწმეებმა, მაგრამ არ იცი, როგორ დაუკავშირდე ადგილობრივი კრების უხუცესებს, შეავსე ბლანკი „გთხოვთ მოინახულოთ“ (S-43) და გადაეცი შენი კრების მდივანს, რომელიც შემდგომ მას ფილიალს გაუგზავნის. მაგრამ, თუ დაინტერესებული ადამიანი ციხეში ზის, ნარკოლოგიურ ცენტრში მკურნალობს ან საავადმყოფოშია, ამ შემთხვევაში მის ნაცვლად ფილიალს შენ ნუ დაუკავშირდები. უთხარი მას, რომ თავად დაუკავშირდეს ძმებს, რომლებიც ამ დაწესებულებებში დადიან ან ფილიალს პირადად მისწეროს.