დაუყოვნებლივ მოინახულე

მას შემდეგ, რაც ჩვენი განახლებული ვებ-გვერდი ყველასთვის ხელმისაწვდომი გახდა, საოცრად გაიზარდა იმ ადამიანთა რიცხვი, რომლებიც ვებ-გვერდის მეშვეობით ითხოვენ ბიბლიის შესწავლას. ამას გარდა, ბევრი ბიბლიის შესწავლის დაწყების სურვილს იმ და-ძმებთანაც გამოთქვამს, რომლებიც მსახურების ახალი ფორმით, საზოგადოებრივი თავშეყრის ადგილებში, ქადაგებენ. ინფორმაცია დაინტერესებულების შესახებ ფილიალს ეგზავნება, რომელიც დაუყოვნებლივ მუშავდება. მაგალითად, როცა ჩვენს ვებ-გვერდზე ბიბლიის შესწავლის მოთხოვნა ფიქსირდება, ამ ინფორმაციას ფილიალი, არა უგვიანეს ორი დღისა, ატყობინებს იმ უხუცესებს, რომელთა სამქადაგებლო ტერიტორიაზეც ეს დაინტერესებული ცხოვრობს. თუმცა როგორც გაირკვა, ზოგს, ვინც ბიბლიის შესწავლის სურვილი გამოთქვა, რამდენიმე კვირის განმავლობაში ვერ მიაკითხეს. რა უნდა გავაკეთოთ იმისათვის, რომ დაინტერესებული დროულად მოვინახულოთ, რათა მას ინტერესი არ გაუნელდეს? (მარ. 4:14, 15).

თუ ბიბლიის შესწავლის მსურველი შენს სამქადაგებლო ტერიტორიაზე არ ცხოვრობს, დაუყოვნებლივ შეავსე ბლანკი „გთხოვთ მოინახულოთ“ (S-43) და არა უგვიანეს შემდეგი კრების შეხვედრისა, გადაეცი კრების მდივანს. მდივანმა ეს ინფორმაცია ერთ ან ორ დღეში უნდა მიაწოდოს შესაბამის კრებას ან ჩვენი ვებ-გვერდის მეშვეობით გაუგზავნოს ფილიალს. უხუცესებმა რეგულარულად უნდა შეამოწმონ ვებ-გვერდზე მიღებული წერილები. იმ შემთხვევაში, თუ ისინი თავიანთ ტერიტორიაზე მცხოვრები დაინტერესებულის შესახებ რაიმე ინფორმაციას მიიღებენ, დაუყოვნებლივ უნდა იმოქმედონ. როცა უხუცესი რომელიმე მაუწყებელს დაინტერესებულის მონახულებას დაავალებს, მან არ უნდა გადადოს მასთან მისვლა. თუ დაინტერესებული შინ არ დაგხვდება, დაუტოვე საკონტაქტო ინფორმაცია.