ნუ დაივიწყებთ თავშესაფარში მყოფ მოხუცებულებსა და უმწეოებს!
1. რატომ უნდა მივაწვდინოთ ხმა მათ, რომლებიც მოხუცებულთა და უმწეოთა თავშესაფრებში იმყოფებიან?
1 ბევრ ხანდაზმულს უწევს ასაკით გამოწვეულ უძლურებასთან გამკლავება (ეკლ. 12:1—7). ზოგი ხანდაზმული მოხუცებულთა და უმწეოთა თავშესაფარში გადაჰყავთ, რის გამოც ფაქტობრივად შეუძლებელი ხდება კარდაკარ მსახურების დროს მათი ნახვა. ეს იმ ქვეყნებშიც კი ჩვეულ მოვლენად იქცა, სადაც ტრადიციულად ასაკოვანი მშობლები თავიანთ შვილებთან ან სხვა ნათესავებთან ერთად ცხოვრობდნენ. მოხუცებულებსა თუ სხვა უმწეოებს, რომლებიც ამგვარ თავშესაფრებში იმყოფებიან, მართალია, გადაადგილების უნარიც შეზღუდული აქვთ და მეხსიერებაც ღალატობთ, მაგრამ მაინც შეუძლიათ იეჰოვას შესახებ მეტის სწავლა და მისი შეყვარება. თუმცა წამოიჭრება კითხვა: როგორ მივაწვდინოთ ხმა ამ ადამიანებს და როგორ გავუზიაროთ მათ „მშვენიერი იმედი“? (ტიტ. 2:13).
2. სად შეგვიძლია მოხუცებულთა და უმწეოთა თავშესაფრების მოძიება?
2 თადარიგის დაჭერა. ჩვეულებისამებრ, ასეთი თავშესაფრების კოორდინატების მოძიება შესაძლებელია ადგილობრივ სატელეფონო ცნობარში. გადაშალეთ სატელეფონო ცნობარი და იხილეთ საინფორმაციო სვეტი — მოხუცთა დაწესებულებები, უმწეოთა თავშესაფრები. სამსახურებრივი ზედამხედველი შეარჩევს გამოცდილ მაუწყებლებს, რომლებიც ამგვარ დაწესებულებებში მყოფთ მოინახულებენ. კარგი დაგეგმვისა და იეჰოვაზე მინდობის წყალობით ხშირად ისეც ხდება, რომ ასეთ დროს ბიბლიის ჯგუფურ შესწავლას ეყრება საფუძველი (იგავ. 21:5; 1 იოან. 5:14, 15).
3, 4. ა) ვის უნდა მივმართოთ, თუ ბიბლიის ჯგუფური შესწავლის ჩატარება გვსურს? ბ) რა საკითხები უნდა შევათანხმოთ უფლებამოსილ პირებთან?
3 თუ რა სახით ჩატარდება ბიბლიის შესწავლა, დამოკიდებულია დაწესებულების ტიპზე. თუ დიდ დაწესებულებაში გვიწევს მისვლა, სადაც ბევრი ბენეფიციარი (თავშესაფრის მცხოვრები) და მრავალრიცხოვანი მომსახურე პერსონალია, უმჯობესი იქნება, მივიდეთ მიმღებში და ვიკითხოთ, როგორ შეიძლება დაწესებულების დირექტორთან გასაუბრება. მაგალითად, თუ სათნოების სახლ „კათარზისს“ მივაკითხავთ, თავდაპირველად ბენეფიციარებთან გასაუბრების ნებართვა ხელმძღვანელი პირისგან უნდა მივიღოთ.
4 ნებისმიერ შემთხვევაში, აუხსენი, რომ მოხალისე ხარ და დიდი სიამოვნებით უთმობ საკუთარ დროს იმ ადამიანებს, რომელთაც უყვართ კითხვა და ბიბლიურ თემებზე საუბარი. შემდეგ ჰკითხე, ხომ არ ისურვებდა ბენეფიციართაგან ვინმე ბიბლიური თემების ირგვლივ ჯგუფურ მსჯელობაში ჩართვას, კვირაში ერთხელ, სულ რაღაც ნახევარი საათით. ამ დროს უამრავი პუბლიკაციის გამოყენება შეგიძლია, თუმცა ბევრის დაკვირვებით, „ბიბლიური მოთხრობები“ და „ოდესმე მცხოვრებთაგან ყველაზე დიდებული ადამიანი“ ყველაზე დიდი მოწონებით სარგებლობს. სახელმძღვანელოები შეგიძლია დაწესებულების დირექტორს აჩვენო. ინფორმაცია ბიბლიის ჯგუფური შესწავლის ჩატარების დღის, დროისა და ადგილის შესახებ, დირექტორთან შეთანხმების შემდეგ, განთავსდება თავშესაფრის საინფორმაციო სტენდზე. ნუ მოგერიდება იმის თქმა, რომ იეჰოვას მოწმე ხარ. იმავდროულად, აუხსენი დაწესებულების დირექტორს, რომ ამ შეხვედრას ბიბლიურ-საგანმანათლებლო ხასიათი ექნება და არ შესრულდება რელიგიური რიტუალები.
5. რომელი პრაქტიკული რჩევები უნდა გამოვიყენოთ, რომ ბიბლიის შესწავლა სახალისო და სასარგებლო აღმოჩნდეს?
5 შესწავლის ჩატარება. შესწავლის ჩატარების ფორმატს შენობაში არსებული გარემო განსაზღვრავს. ასე რომ, იყავი მოქნილი და გამჭრიახი. შესწავლის ჩამტარებელმა თან უნდა იქონიოს შემსწავლელებთან განსახილველი პუბლიკაციის რამდენიმე ეგზემპლარი და შეხვედრის ბოლოს აკრიფოს მათგან სახელმძღვანელოები. ჩამტარებელმა, საჭიროების შემთხვევაში, ზოგ შემსწავლელს დიდი შრიფტით დაბეჭდილი მასალა უნდა წაუღოს. აბზაცების წაკითხვა, კითხვების დასმა და პასუხების გაცემა უნდა მოხდეს იმ სახით, როგორც ეს ბიბლიის შესწავლაზე ხდება. მსურველთ, მათი შესაძლებლობიდან გამომდინარე, შეგიძლია წააკითხო შესასწავლ სახელმძღვანელოში დაბეჭდილი აბზაცები ან ბიბლიური მონაკვეთები. შესწავლის დროს იყავი მხიარული და მეგობრული. დაწესებულების დირექტორის ნებართვით, ბიბლიის შემსწავლელებს დროდადრო უჩვენე ჩვენი ორგანიზაციის ფილმებიდან ზოგიერთი, რომელიც ბიბლიისადმი რწმენას განამტკიცებს ანდა რომელიც ყურადღებას ამა თუ იმ ბიბლიურ ეპიზოდში მოცემულ რჩევებზე ამახვილებს. შეგიძლია ბიბლიის შესწავლა დაიწყო და დაასრულო ლოცვით; შეეცადე, ლოცვა მარტივი და ყველასთვის გასაგები იყოს. ზოგი მაუწყებელი ამგვარი შესწავლების ჩატარებისას შემსწავლელებთან ერთად სამეფო სიმღერებსაც კი მღერის.
6. როგორ შეიძლება წინააღმდეგობის გადალახვა, რამაც შესაძლოა თავი იჩინოს შესწავლის დროს?
6 როგორ უნდა მოიქცე, თუ შესწავლის დროს თავშესაფრის რომელიმე ბენეფიციარი წაკითხულს ან ნათქვამს არ ეთანხმება და საწინააღმდეგო აზრს გამოთქვამს? პასუხის გაცემისას გამჭრიახობა გამოავლინე (კოლ. 4:6). ამ დროს შეგიძლია მას შესაფერისი ბიბლიური მუხლი ამოუკითხო. მაგრამ, თუ შესწავლის დროს ამას ვერ მოახერხებ, მის ნათქვამს უყურადღებოდ ნუ დატოვებ და შესთავაზე, რომ შეხვედრის დასრულებისთანავე გაესაუბრები ამ საკითხზე.
7. როგორ უნდა მოიქცე, თუ ბენეფიციარი განსაკუთრებულ ინტერესს იჩენს ან გისვამს ისეთ კითხვას, რაც პირადად აღელვებს?
7 ბიბლიის შესწავლის მსვლელობისას დროდადრო შეიძლება ისეც მოხდეს, რომ ბენეფიციარმა რაღაც კითხვა დაგისვას ან უფრო მეტის სწავლის სურვილი გამოთქვას. ვნახოთ, როგორ იქცევა ამგვარ სიტუაციებში ერთი ჩვენი და. იგი ასე პასუხობს: „ძალიან კარგი კითხვაა. მაგრამ, რადგან ეს საკითხი პირადად თქვენ გაინტერესებთ, ცოტა ხანში, როცა შესწავლას დავასრულებთ, დიდი სიამოვნებით გაგესაუბრებით“. ხშირად შესაძლოა იმის საშუალებაც მოგვეცეს, რომ ზოგ დაინტერესებულს სხვა დროს ან სხვა გარემოში ჩავუტაროთ ბიბლიის შესწავლა.
8. როგორ აღირიცხება ჯგუფური და ინდივიდუალური ბიბლიის შესწავლები?
8 როგორც წესი, უმჯობესია, რომ ჯგუფური შესწავლა ყოველთვის ერთსა და იმავე დროს ტარდებოდეს და ყოველთვის ერთი და იგივე მაუწყებლები უძღვებოდნენ. ნებისმიერი მაუწყებელი, რომელიც მოხუცებულთა თავშესაფარში ჩატარებულ ჯგუფურ ბიბლიის შესწავლაში იღებს მონაწილეობას, სამქადაგებლო მსახურების ანგარიშში აღრიცხავს ამ დროს. მას შემდეგ, რაც ბიბლიის შესწავლა ჩამოყალიბდება, ბიბლიის შესწავლის ჩამტარებელი ყოველი შესწავლის შემდეგ ერთ განმეორებით მონახულებას ჩაიწერს, ხოლო თვის ბოლოს — ერთ შესწავლას. თუ დაინტერესებულებს, რომელთაც სწავლისა და ათვისების უნარი აქვთ, ბიბლიის შესწავლა ინდივიდუალურად ჩაუტარდებათ, ის ჩვეულებრივ, სხვა ბიბლიის შესწავლების მსგავსად ჩაიწერება.
9, 10. რა თვისებებია საჭირო ბიბლიის ჯგუფური შესწავლის ჩატარების დროს? ახსენი.
9 რეგულარულად ჩაატარე ჯგუფური შესწავლები. ძალიან კარგი იქნება, თუ ბიბლიის ჯგუფურ შესწავლას ერთსა და იმავე დღეს და ერთსა და იმავე დროს ჩაატარებ. ამგვარად თავშესაფარში მყოფთ — მოხუცებულებსა თუ იქ მომსახურე პერსონალს — ეცოდინება, რომ ამ შეხვედრას რეგულარული ხასიათი აქვს, დროულად იწყება და დროულად მთავრდება (მათ. 5:37). აქედან გამომდინარე, ამ საქმის შესასრულებლად საჭიროა პასუხისმგებლობის გრძნობის ქონა, გულისხმიერება და წესრიგიანობა. არაერთი შემთხვევიდან გამოჩნდა, რომ უკეთესია, თუ ბიბლიის ჯგუფურ შესწავლას ორი გამოცდილი მაუწყებელი ჩაატარებს (ეკლ. 4:9, 10). ცხადია, დიდ დაწესებულებებში შესაძლოა მეტი მაუწყებელიც იყოს საჭირო.
10 ყველაფერთან ერთად საჭიროა, იყო მეგობრული და ყურადღებიანი (ფილ. 2:4). პირველი ვიზიტის დროს ყველა დამსწრე პირადად გაიცანი. ჩაიწერე სახელები და მომავალ შეხვედრამდე შეეცადე, რომ დაიმახსოვრო. თუმცა ზოგ ხანდაზმულს შეიძლება სწყინდეს, როცა უცნობი ადამიანი „თქვენობით“ არ მიმართავს და არ იყენებს ისეთ თავაზიან ფორმებს, როგორიცაა „ბატონო“ და „ქალბატონო“. თუ მოთმინებას გამოავლენ და თანაგრძნობით განიმსჭვალები, ამით აჩვენებ, რომ მათდამი კეთილგანწყობილი ხარ და თითოეულ მათგანს აფასებ.
11. როგორ გამოავლენენ პატივისცემას ბიბლიის ჯგუფური შესწავლის ჩამტარებლები დაწესებულების მომსახურე პერსონალისა თუ ბენეფიციართა ნათესავების მიმართ?
11 აგრეთვე მნიშვნელოვანია დაწესებულებაში მომსახურე პერსონალისა თუ ბენეფიციართა ნათესავების მიმართ პატივისცემისა და სიკეთის გამოვლენა. თუ შესწავლის ჩატარებასთან დაკავშირებული ტექნიკური საკითხები უკვე შეთანხმებულია, გონივრული იქნება, თუ დირექტორის ნებართვის გარეშე არ შეცვლი შესწავლის დროსა და ფორმატს. დროდადრო დაწესებულების დირექტორს ჰკითხე, რას ფიქრობს, ჩვენ მიერ ჩატარებულ შეხვედრებზე. როდესაც ბიბლიის შესწავლის დროს თავშესაფარში მყოფთ ოჯახის წევრები მოინახულებენ, თავად გადადგი პირველი ნაბიჯი და გაეცანი. აუხსენი, რა მიზანს ემსახურება ბიბლიის შესწავლა. უთხარი, რომ მათი ოჯახის წევრისთვის მხოლოდ კარგი გინდა. შესთავაზე, რომ თუ სურთ, შეუძლიათ, ჩამოსხდნენ და დაესწრონ შესწავლას.
12, 13. მოჰყევით შემთხვევებს, საიდანაც ჩანს, რომ თავშესაფრებში ქადაგებას კარგი შედეგები მოაქვს.
12 შედეგი. მიმომსვლელი ზედამხედველებისა და კრებების ანგარიშებიდან ჩანს ის გამამხნევებელი შედეგი, რაც ამ სახის მსახურებას მოჰყვება. უფრო კონკრეტულად: ერთ შემთხვევაში, პირველ ჯერზე გამართულ განხილვას 20 ადამიანი დაესწრო; ექვსმა ინდივიდუალური ბიბლიის შესწავლის ჩატარების სურვილი გამოთქვა და მათ შორის ერთი მოინათლა. ბიბლიის შესწავლის შედეგად ერთ-ერთ თავშესაფარში მცხოვრები 85 წლის ქალბატონი ადგილობრივ კრებას დაუახლოვდა და ნათლობის სურვილიც გაუჩნდა. როდესაც ერთ თავშესაფარში სხვადასხვა სახის აქტივობები შეიზღუდა, იეჰოვას მოწმეთა მიერ ორგანიზებული ბიბლიის ჯგუფური შესწავლაც გაუქმდა, რის გამოც თავშესაფრის ბენეფიციარებმა დაწესებულების დირექტორთან იჩივლეს. შედეგად, შესწავლა განახლდა და მას 25-30 ადამიანი ესწრებოდა.
13 ჩვენ მიერ გამოვლენილი სიყვარული მხოლოდ თავშესაფარში მცხოვრებლებზე როდი ახდენს შთაბეჭდილებას. ხანდახან ასეთ შეხვედრებს მომსახურე პერსონალიც ესწრება და ისინი მონაწილეობასაც კი იღებენ მსჯელობაში. ჩვენი შრომა, სითბო და ყურადღება შეუმჩნეველი არც ჩვენ ირგვლივ მცხოვრებ ხალხს რჩება (1 პეტ. 2:12). ერთხელ, როცა ერთ-ერთი ასეთი თავშესაფრის ადმინისტრატორს ჩვენი მისვლის მიზანი გავაცანით, მან გვკითხა: „კი მაგრამ, აქამდე სად იყავით? აბა, როდიდან შეუდგებით საქმეს?“. სხვა თავშესაფრის ადმინისტრატორმა კი ჩვენი საქმიანობა შემდეგი სიტყვებით შეაფასა: „სულითა და გულით ვუჭერ მხარს ამ ღონისძიებას და ვისურვებდი, რომ ბიბლიის ჯგუფური შესწავლები სხვა თავშესაფრებშიც ჩატარებულიყო. იეჰოვას მოწმეები ასეთ შეხვედრებს სრულიად უსასყიდლოდ ატარებენ; ეს მათი რელიგიური მსახურების განუყოფელი ნაწილია, რაც საზოგადოების კეთილდღეობას ემსახურება“. ჰავაიში მდებარე ერთ-ერთმა თავშესაფარმა იეჰოვას მოწმეებს გაწეული უანგარო სამსახურისთვის ქების სიგელი გადასცა, სადაც აღნიშნული იყო, რომ მოწმეები მათ დაწესებულებაში მყოფთათვის „ფასდაუდებელ განძს“ წარმოადგენდნენ!
14. რატომ უნდა გვსურდეს, რომ თავშესაფარში მყოფთაც მივაწვდინოთ ხმა?
14 იეჰოვა ხანდაზმულებს მოუწოდებს, რომ განადიდონ იგი (ფსალმ. 148:12, 13). ეს მოწვევა თავშესაფარში მყოფ მოხუცებსაც ეხებათ. არის თქვენი კრების ტერიტორიაზე მოხუცთა თავშესაფარი, სადაც ხანში შესულები სიამოვნებით მოისმენდნენ სასიხარულო ცნობას და ნუგეშს პოვებდნენ? ადგილობრივი უხუცესების ორგანიზებით და თავშესაფრის მესვეურთა ხელშეწყობით, ჩვენ სასიხარულო ცნობას თავშესაფარში მყოფთაც მივაწვდენთ. თუ არ დავივიწყებთ ხანდაზმულებს, ამით იეჰოვას მივბაძავთ (ფსალმ. 71:9, 18).