დავიხვეწოთ ქადაგებაში — გულწრფელად დაინტერესდი სხვებით

რატომ არის მნიშვნელოვანი. იესო თითოეული ადამიანით ინტერესდებოდა — თბილად ეპყრობოდა და გულწრფელ ინტერესს იჩენდა. მაგალითად, როდესაც მან ყრუ მამაკაცს შეატყო, რომ თავს უხერხულად გრძნობდა, ის ცნობისმოყვარე ხალხის თვალს გაარიდა, ცალკე გაიყვანა და განკურნა (მარ. 7:31—35). იესო თავისი მოწაფეების გრძნობებსაც ითვალისწინებდა; ესმოდა, რომ ისინი ბევრს ვერ იტვირთავდნენ და ამიტომ ერთ ჯერზე ზღვა ინფორმაციას არ აწვდიდა (იოან. 16:12). ზეცაში გამეფებული იესო დღესაც გულწრფელად ინტერესდება ჩვენით (2 ტიმ. 4:17). ჩვენ ქრისტეს მიმდევრები ვართ და გვსურს, რომ მას მივბაძოთ (1 პეტ. 2:21; 1 იოან. 3:16, 18). მსახურებაში უფრო წარმატებულნი ვიქნებით, თუ მხედველობაში მივიღებთ, რომ მობინადრეებს სხვადასხვა პირობებში უწევთ ცხოვრება, ამავე დროს, ერთმანეთისგან განსხვავებული ინტერესები და საფიქრალი აქვთ. მობინადრე იმ შემთხვევაში უფრო მოგვისმენს, თუ დაინახავს, რომ მასთან ფორმალური ვიზიტით კი არ ვიმყოფებით რაღაც ცნობის გადასაცემად ან ლიტერატურის დასატოვებლად, არამედ გულწრფელად გვაინტერესებს იგი.