იყავი დაკვირვებული და ამგვარად გამოავლინე პირადი ინტერესი
1 იეჰოვა ღმერთი და ქრისტე იესო საუკეთესოდ ამჩნევენ ადამიანების კონკრეტულ მოთხოვნილებებს და ეხმარებიან მათ (2 ნეშტ. 16:9; მარ. 6:34). როდესაც ვამჩნევთ, თუ რა აინტერესებთ და რა აღელვებთ ადამიანებს, რომელთაც მსახურებაში ვხვდებით, შეგვიძლია სასიხარულო ცნობის შეთავაზება შესაბამისად შევცვალოთ.
2 ყურადღება მიაქციე წვრილმანებს. იესო დაკვირვებული იყო (მარ. 12:41—43; ლუკ. 19:1—6). ჩვენც, როდესაც მობინადრის კართან ვდგავართ და ვამჩნევთ რელიგიურ სიმბოლოებს, მანქანაზე მიკრულ ნიშნებს ან ეზოში მიმოფანტულ სათამაშოებს, შეიძლება ეს ინფორმაცია იმისათვის გამოვიყენოთ, რომ სასიხარულო ცნობა ეფექტურად დავამოწმოთ.
3 მობინადრის სახის გამომეტყველება და მანერები შესაძლოა მის გრძნობებზე ბევრს ამბობდეს (იგავ. 15:13). შესაძლოა პიროვნება საყვარელი ადამიანის სიკვდილის გამო იტანჯება ან სხვა არასასიამოვნო მდგომარეობაში იმყოფება და ნუგეში სჭირდება. სათანადო ბიბლიური მუხლების ამოკითხვამ შეიძლება ის ანუგეშოს (იგავ. 16:24). ჩქარობს მობინადრე სახლიდან გასვლას ან ხელში ატირებული ჩვილი ბავშვი ხომ არ უჭირავს? თუ ასეა, უკეთესი იქნება მას სხვა დროს მიაკითხო. ყურადღებისა და ‘გულისხმიერების’ გამოვლენით აღვძრავთ პიროვნებას, რომ შემდეგი მონახულებისას მოგვისმინოს (1 პეტ. 3:8).
4 შეუსაბამე შენი სიტყვები სიტუაციას. მოციქულმა პავლემ ქალაქ ათენში შენიშნა სამსხვერპლო, რომელზეც ეწერა: „უცნობ ღმერთს“. მან ეს სიტუაცია სასიხარულო ცნობის საქადაგებლად გამოიყენა და თქვა: „მე სწორედ იმის შესახებ გაუწყებთ, ვისაც არ იცნობთ და ეთაყვანებით“. პავლეს ტაქტიანმა მიდგომამ იქ მყოფთაგან ზოგიერთი აღძრა, რომ ყურად ეღოთ სამეფოს შესახებ ცნობა და მორწმუნენი გამხდარიყვნენ (საქ. 17:23, 34).
5 დღესაც, დაკვირვებულობა დაგვეხმარება, დავინახოთ, თუ რა აინტერესებს პიროვნებას და ჩვენი სიტყვები სიტუაციას მოვარგოთ. დასვი კითხვები, რათა შეძლო მობინადრის თვალსაზრისის გაგება. იფიქრე ბიბლიურ მუხლებზე, რომელთა გამოყენებაც მისი ინტერესის გასაღრმავებლად შეიძლებოდა (იგავ. 20:5). დაკვირვებულობა და სხვების მიმართ გულწრფელი ინტერესის გამოვლენა დაგვეხმარება, რომ სასიხარულო ცნობა ტაქტიანად ვამცნოთ ხალხს.