როგორ ჩავწვდეთ შემსწავლელის გულს
1. როგორ მოქმედებდა იესოს სიტყვები მსმენელებზე?
1 იესო ქრისტეს სიტყვები მსმენელების გულს სწვდებოდა. ერთ-ერთი შემთხვევა, რომლის შესახებაც ბიბლიაში ვკითხულობთ, სწორედ ამაზე მოწმობს: ერთხელ, როცა იესო თავის მოწაფეებს წმინდა წერილებს უხსნიდა, მათ გულები უღვიოდათ (ლუკ. 24:32). ვინაიდან ღვთისადმი მორჩილება გულიდან უნდა მოდიოდეს, ისმის კითხვა: როგორ შეგვიძლია ჩავწვდეთ შემსწავლელის გულს, რათა იგი ცხოვრებაში ცვლილებების მოსახდენად აღიძრას? (რომ. 6:17).
2. როგორ დაგვეხმარება ტაქტიანობა და გამჭრიახობა, ჩავწვდეთ მსმენელის გულს?
2 იყავი ტაქტიანი და გამჭრიახი. ბევრისთვის, ცხოვრებაში ცვლილებები რომ მოახდინოს, მხოლოდ იმის თქმა არ კმარა, რა არის სწორი და რა — არასწორი. უფრო მეტიც, თუ მათი მრწამსის სიმცდარისთვის ფარდის ასახდელად არაერთ ბიბლიურ მუხლს მოვიყვანთ, ამით შესაძლოა კიდევ უფრო დავაფრთხოთ ისინი. ადამიანი მოქმედებისკენ რომ აღვძრათ, უპირველეს ყოვლისა, უნდა გავიგოთ, რატომ სწამს მას ესა თუ ის სწავლება. ტაქტიანი და სწორად შერჩეული კითხვების მეშვეობით გავიგებთ მის თვალსაზრისს და აღვძრავთ მას, გაგვიზიაროს თავისი გულისნადები (იგავ. 20:5). მხოლოდ ამის შემდეგ შეგვიძლია მასთან იმ ბიბლიური მონაკვეთების მოყვანა, რომელიც მას გულგრილს არ დატოვებს. ამასთანავე, გულწრფელად უნდა დავინტერესდეთ მისით და ვიყოთ მომთმენები (იგავ. 25:15). არც ის უნდა დაგვავიწყდეს, რომ ზოგი სულიერად სწრაფად მიიწევს წინ, ზოგს კი მეტი დრო სჭირდება. მიეცი საშუალება იეჰოვას წმინდა სულს, რომ იმოქმედოს მის აზროვნებასა და საქციელზე (მარ. 4:26—29).
3. როგორ შეგვიძლია დავეხმაროთ ბიბლიის შემსწავლელს დადებითი თვისებების განვითარებაში?
3 დაეხმარე შემსწავლელს დადებითი თვისებების განვითარებაში. ბიბლიის ის მონაკვეთები, რომელიც ხაზს უსვამს იეჰოვას სიკეთესა და სიყვარულს, შემსწავლელს დადებითი თვისებების განვითარებაში დაეხმარება. ჩვენ შეგვიძლია მას ამოვუკითხოთ ფსალმუნის 139:1—4 ან ლუკას 12:6, 7 იმის საჩვენებლად, თუ რაოდენ დაინტერესებულია ღმერთი თითოეული ჩვენგანით. როდესაც შემსწავლელი მადლიერებას განივითარებს იეჰოვას მიერ გამოვლენილი წყალობისთვის, მას კიდევ უფრო შეუყვარდება ღმერთი და მეტად უერთგულებს მას (რომ. 5:6—8; 1 იოან. 4:19). ამასთანავე, როდესაც შემსწავლელი იგებს, რომ მისი ცუდი საქციელი გულს სტკენს იეჰოვას, შესაძლოა ის აღიძრას კარგი საქმეების კეთებისკენ, რათა ასიამოვნოს ღმერთს და პატივი მიაგოს მის სახელს (ფსალმ. 78:40, 41; იგავ. 23:15).
4. რით შეგვიძლია ვაჩვენოთ, რომ პატივს ვცემთ ბიბლიის შემსწავლელის ნების თავისუფლებას?
4 მართალია, იეჰოვა თავისი მითითებების მიყოლას არავის აიძულებს, მაგრამ ის ადამიანებს ყურადღებას უმახვილებს იმაზე, თუ რაოდენ ბრძნულია მისი რჩევების გათვალისწინება (ეს. 48:17, 18). ჩვენ იეჰოვას ვბაძავთ, როდესაც ბიბლიის შემსწავლელებს ვეხმარებით, თავად მივიდნენ ამა თუ იმ დასკვნამდე. როცა შემსწავლელი დარწმუნდება, თუ რაოდენ აუცილებელია ცხოვრებაში ცვლილებების მოხდენა, ის ასეც მოიქცევა და შემდეგ ერთგულად მიჰყვება არჩეულ კურსს (რომ. 12:2). გარდა ამისა, იგი კიდევ უფრო დაუახლოვდება იეჰოვას, „გულების შემმოწმებელ“ ღმერთს (იგავ. 17:3).