წერილი ხელმძღვანელი საბჭოსგან

ძვირფასო თანამორწმუნენო,

გამორჩეული ხალხი ვართ, რადგან წილად გვხვდა პატივი, ვიწოდებოდეთ სამყაროს უზენაესი მმართველის, იეჰოვას სახელით. მისი სახელი მარადიული და შეუდარებელია. თავად იეჰოვამ მოგვცა თავისი სახელის ტარების უფლება; ამ გამორჩეული სახელით განსაკუთრებით 1931 წლიდან გვიცნობენ (ეს. 43:10). ჩვენ გვეამაყება, იეჰოვას მოწმეები რომ ვართ.

ეშმაკი დაუღალავად ცდილობს, ადამიანებს დაავიწყოს ღვთის სახელი. მის გავლენაში მყოფი ხალხები იეჰოვას სახელს არაფრად აგდებენ. დიდ ბაბილონს, ცრუ რელიგიურ სამყაროს, სძულს ღვთის სახელი, რის გამოც ბიბლიის ბევრი თარგმანიდან ამოღებულიც კია ის. მაგრამ იესო დიდად აფასებდა მამის სახელს და, როცა თავის მიმდევრებს ასწავლიდა, როგორ ელოცათ, პირველ რიგში მამის სახელი მოიხსენია: «ამიტომ, ასე ილოცეთ: „ჩვენო ზეციერო მამა, განიწმინდოს შენი სახელი“» (მათ. 6:9). მოგვიანებით, როცა მამის წინაშე მხურვალედ ლოცულობდა, თქვა: „შენი სახელი გამოვუცხადე ადამიანებს, რომლებიც შენ მომეცი ქვეყნიერებიდან“ (იოან. 17:6). ჩვენ გვსურს, იესოს მივბაძოთ და, ისე როგორც არასდროს, დიდი მონდომებით გავაცხადოთ იეჰოვას სახელი მთელ მსოფლიოში.

2009 წლის წლიურმა მუხლმა „საფუძვლიანად დავამოწმოთ სასიხარულო ცნობა“ აღგვძრა, ჩვენი მსახურება სრულად შეგვესრულებინა (საქ. 20:24). აშკარაა, რომ იეჰოვამ დიდად აკურთხა ჩვენი ძალისხმევა გასულ სამსახურებრივ წელს. მთელმა მსოფლიომ არნახული დამოწმება მიიღო, რამაც იეჰოვას სახელს დიდება და პატივი მოუტანა. მაუწყებელთა უმაღლესმა რიცხვმა 7 313 173 -ს მიაღწია. ისინი ერთხმად ქადაგებენ ყველასთან და ასწავლიან გულმართალ ადამიანებს, რომლებიც ყოველდღიური პრობლემებიდან გამოსავალს ეძებენ. ქრისტეს სიკვდილის გახსენების საღამოს 18 168 323 დაესწრო, რაც იმაზე მიუთითებს, რომ ამ ბოროტი ქვეყნიერების აღსასრულამდე, შესაძლოა, კიდევ მილიონობით ადამიანმა მოუხმოს იეჰოვას სახელს.

მანამ იეჰოვა ამის საშუალებას გვაძლევს, მთელი ენთუზიაზმით განვაგრძობთ სამეფოს შესახებ სასიხარულო ცნობის ქადაგებას და ყველაფერს გავაკეთებთ იმისათვის, რომ ჩვენს ტერიტორიაზე მცხოვრებ ხალხს ეს ცნობა გავაცნოთ (მათ. 24:14; მარ. 13:10). კარდაკარ, ქუჩაში თუ არაფორმალურად ქადაგებისას, წერილებითა თუ ტელეფონით დამოწმებისას ვეცდებით, რაც შეიძლება მეტ ადამიანს გავაგებინოთ იეჰოვას სახელი და მისი განზრახვა.

საფუძვლიანი მიზეზი გვაქვს გვჯეროდეს, რომ იეჰოვა ძალიან მალე თავის სახელს განწმენდს (ეზეკ. 36:23). სწრაფად გვიახლოვდება დრო, როცა სამუდამოდ დადუმდებიან ისინი, ვინც ღვთის სახელს შეურაცხყოფს. როგორი დიდებული დღე იქნება ეს იეჰოვას ერთგული მსახურებისთვის, რომლებიც მის სახელს აცნობენ ადამიანებს და მის უზენაესობას უჭერენ მხარს!

იეჰოვა სათუთად ზრუნავს თავის ხალხზე და ეს ნათლად გამოჩნდა საოლქო თუ საერთაშორისო კონგრესებზე დევიზით „იფხიზლეთ!“, რომელთა უმეტესობაც 2009 წელს ჩატარდა. ისინი მართლაც მნიშვნელოვანი კონგრესები იყო ჩვენს თეოკრატიულ ისტორიაში და უფრო ნათლად დაგვანახვა იმის აუცილებლობა, რომ იეჰოვას დღის მოლოდინში სიფხიზლე არ დავკარგოთ (მარ. 13:37; 1 თეს. 5:1, 2, 4).

იეჰოვა მართლაც კარგია ჩვენთვის; ის სიხარულით გვივსებს გულებს. „აბიბინებულ საძოვრებზე“ გვასვენებს და „წყალუხვი მოსასვენებელი ადგილებისკენ“ მიგვიძღვის (ფსალმ. 23:1, 2; 100:2, 5).

იყავით დარწმუნებული, რომ იეჰოვა უხვად გაკურთხებთ, თუ კვლავ სამეფოს საქმით იქნებით დაკავებულნი მომდევნო თვეებში!

მიიღეთ ჩვენი ქრისტიანული სიყვარული,

თქვენი ძმები,

იეჰოვას მოწმეთა ხელმძღვანელი საბჭო