ᲒᲐᲚᲘᲝᲜᲘ

აქაიის პროკონსული; იუდეველებმა პავლე მის სასამართლო ტახტთან მიიყვანეს და ბრალი დასდეს, თითქოს ხალხს ღვთისადმი განსხვავებული სახის თაყვანისცემისკენ მოუწოდებდა. გალიონმა უარი თქვა ამ საქმის განხილვაზე, რადგან რომის არც ერთი კანონი არ იყო დარღვეული. ამის შემდეგ ხალხმა დაიჭირა სინაგოგის წინამძღვარი სოსთენე და სცემა, თუმცა გალიონს არც ამისთვის მიუქცევია ყურადღება (სქ. 18:12—17).

ისტორიული ცნობების თანახმად, გალიონი ახ. წ. პირველი საუკუნის დასაწყისში ესპანეთში, კერძოდ ქალაქ კორდოვაში დაიბადა. ის იყო ორატორ სენეკას ვაჟი და ფილოსოფოს სენეკას უფროსი ძმა. გალიონის ნამდვილი სახელი იყო ლუციუს ანეუს ნოვატუსი, თუმცა მას შემდეგ, რაც იგი ორატორმა ლუციუს იუნიუს გალიონმა იშვილა, მან მისი სახელი დაირქვა.

ქალაქ დელფოში აღმოჩენილი ხელნაწერის ფრაგმენტი გვეხმარება, დავადგინოთ, თუ რომელ წლებში მსახურობდა გალიონი აქაიის პროკონსულად (სქ. 18:12). მართალია, ტექსტი ფრაგმენტულია, მაგრამ შემდეგი სიტყვები აშკარად იკითხება: „[ლუციუს იუ]ნიუს გალიონი ... პროკონსული“. ისტორიკოსები მიიჩნევენ, რომ ეს ტექსტი იმპერატორ კლავდიუს კეისრის წერილის ნაწილია და იქ მოხსენიებული რიცხვი ოცდაექვსი მიანიშნებს ოცდამეექვსედ კლავდიუსის იმპერატორად გამოცხადებაზე (სწორედ კლავდიუსმა დაუბრუნა აქაიას დამოუკიდებელი პროვინციის სტატუსი, რომელიც სენატს ექვემდებარებოდა და რომელსაც შესაბამისად პროკონსული მართავდა). ეს წერილი ახ. წ. 52 წლის პირველ ნახევარში უნდა დაწერილიყო, რადგან სხვა ჩანაწერები ცხადყოფს, რომ კლავდიუსი იმპერატორად ოცდამეშვიდედ ახ. წ. 52 წლის 1 აგვისტომდე გამოაცხადეს. კარიაში აღმოჩენილი წარწერიდან და რომში, კლავდიუსის აკვედუკზე შესრულებული წარწერიდან ვიგებთ, რომ კლავდიუსი იმპერატორად ოცდამეექვსედ და ოცდამეშვიდედ სახალხო ტრიბუნად მსახურების მეთორმეტე წელს გამოაცხადეს. კლავდიუსის სახალხო ტრიბუნად მსახურების მეთორმეტე წელი ახ. წ. 52 წელს დაიწყო და ახ. წ. 53 წლის 24 იანვრამდე გაგრძელდა. აქედან გამომდინარე, გალიონს აქაიის პროკონსულად (როგორც წესი, პროკონსულად ზაფხულობით ერთი წლით ინიშნებოდნენ) ახ. წ. 51 წლის ზაფხულიდან ახ. წ. 52 წლის ზაფხულამდე უნდა ემსახურა, თუმცა ზოგიერთი მეცნიერი ახ. წ. 52—53 წლებს ასახელებს.