დავიხვეწოთ ქადაგებაში — დამოწმება საქმიან უბანზე

რატომ არის მნიშვნელოვანი. ვინაიდან ბევრი მობინადრე მუშაობს, მათ დღის მანძილზე სახლში ვერ ვხვდებით. ამიტომ მათთვის სასიხარულო ცნობის გადასაცემად საუკეთესო ადგილი, ხშირ შემთხვევაში, სამსახურია. ასეთ ადგილებში ქადაგება სასიამოვნოცაა და ნაყოფიერიც; მიზეზი ისაა, რომ კარდაკარ მსახურებისგან განსხვავებით, საქმიან უბანზე ყველა ადგილზე გვხვდება და თავაზიანად გვეპყრობა; ისინი ჩვენში პოტენციურ კლიენტებს ხედავენ. ამგვარმა მსახურებამ შედეგი რომ გამოიღოს, მაუწყებლებმა განსჯის უნარს უნდა მიმართონ და სამაგალითოდ გამოიყურებოდნენ (2 კორ. 6:3). სამსახურებრივმა ზედამხედველმა საგულდაგულოდ უნდა შეისწავლოს, რამდენად ხშირად მუშავდება საქმიანი უბნები და — ვის მიერ.

როგორ მოვიქცეთ:

მოამზადე მოკლე შეთავაზება. თუ მომსახურე პერსონალს დიდ დროს წავართმევთ, სამომავლოდ შეიძლება აღარ მოგვეცეს მათთან გასაუბრების შესაძლებლობა.
ისეთ დროს მიდი, როცა მომსახურე პერსონალი ნაკლებად დაკავებულია; მაგალითად, სამუშაო დღის დასაწყისში.
შეეცადე, თავდაპირველად უფროსს გაესაუბრო. იყავი თბილი და მეგობრული. მაგალითად, მას შეგიძლია უთხრა: „ჩვენ სამსახურში ვაკითხავთ მათ, ვინც ხშირად სახლში არ გვხვდება“. მოკლე შესავლის შემდეგ შესთავაზე ბუკლეტი, ჟურნალები ან სხვა რომელიმე ლიტერატურა. მას დისტრიბუტორში რომ არ ავერიოთ, უმჯობესია, თუ შესაწირავებს არ ვახსენებთ გარდა იმ შემთხვევისა, თუ თავად არ გვკითხავს, როგორ ფინანსდება ჩვენი საქმიანობა.
თუ უფროსი მეგობრულად განეწყობა, სთხოვე, რომ მომსახურე პერსონალს მოკლედ გაესაუბრები. ზოგ საქმიან უბანზე შეიძლება ჯობდეს ნებართვის აღება, რომ წასაკითხი მასალა მომსახურე პერსონალისთვის განკუთვნილ ოთახში დატოვო.
გამოავლინე განსჯის უნარი და იყავი მოხერხებული. იმ შემთხვევაში, თუ პერსონალი კლიენტთან საუბრობს ან დაკავებულია, დაელოდე, სანამ გათავისუფლდება.

კარგი იქნება, თუ ამ თვეში ასე მოიქცევი:

მომდევნო ოჯახურ თაყვანისცემაზე გაივარჯიშე შეთავაზება, რომელსაც საქმიან უბანზე მსახურების შემთხვევაში გამოიყენებ.