იეჰოვას მოწმეთა 2003 წლის საოლქო კონგრესი „დიდება მივაგოთ ღმერთს“
1 იეჰოვამ თავისი ერთგული წინასწარმეტყველის, ესაიას, მეშვეობით, ასეთი რამ ბრძანა: „გამიგონე, ჩემო ერო, და ჩემო ტომო, ყური დამიგდე“ (ესაია 51:4). განა უკანასკნელ ჟამს, რაც სულ უფრო და უფრო იძაბება ვითარება, განსაკუთრებით მნიშვნელოვანი არ არის, რომ ყურად ვიღოთ იეჰოვას მითითებები? იეჰოვასთვის ‘ყურის დაგდების’ ერთი საშუალება კი ისაა, რომ დავემორჩილოთ მის მითითებას და შევიკრიბოთ თაყვანისმცემლობისთვის. ამის განსაკუთრებული შესაძლებლობა ყოველწლიურ საოლქო კონგრესებზე გვეძლევა, რომლებსაც მოუთმენლად მოველით. იეჰოვას მოწმეთა ხელმძღვანელმა საბჭომ კვლავაც იზრუნა, რომ 2003 წელს რუსეთის ფილიალის ტერიტორიაზე მრავალი საოლქო კონგრესი ჩატარდეს.
2 როგორც 2002 წლის 1 ივლისის „საგუშაგო კოშკში“ იყო აღნიშნული, რიგ ქალაქებში ჩატარდება საერთაშორისო კონგრესები, რომლებსაც მთელი მსოფლიოდან ჩამოსული დელეგატები დაესწრებიან. ვინაიდან საერთაშორისო კონგრესები მხოლოდ რამდენიმე ქალაქში ჩატარდება, მათზე დასწრებას მხოლოდ ამ კონგრესებზე მიწვეული კრებები შეძლებენ. მაგრამ საერთაშორისო საძმოს სული საოლქო კონგრესებზეც იქნება. ბევრგან კონგრესებს მისიონერებიც დაესწრებიან. ამგვარად შესაძლებელი იქნება მათ მიერ მოყოლილი საინტერესო შემთხვევების მოსმენაც. რა შეგვიძლია გავაკეთოთ, რომ მაქსიმალური სარგებლობა მივიღოთ კონგრესებზე დასწრების შედეგად, რომლებიც ზაფხულში ჩატარდება?
3 დაესწარი კონგრესის სამივე დღის პროგრამას: ერთგული და გონიერი მონის კლასის მიერ მოწოდებულმა მითითებებმა მაქსიმალური სარგებლობა რომ მოგვიტანოს, სამივე დღის პროგრამას უნდა დავესწროთ (მათ. 24:45). ხომ არ მოგიწევთ, რამდენიმე დღით დაეთხოვოთ დამსაქმებელს კონგრესზე დასასწრებად? ნეემიამ, სანამ მეფე არტაქსერქსეს იერუსალიმის კედლების ასაშენებლად წასვლის ნებართვას სთხოვდა, ‘ილოცა ცათა ღმერთის წინაშე’ (ნეემ. 2:4). შენც ლოცვით უნდა სთხოვო იეჰოვას გამბედაობა, რომ მიხვიდე დამსაქმებელთან და კონგრესზე დასასწრებად სამი დღით დაეთხოვო. როგორ უნდა მოვიქცეთ, თუ უფროსს არ უნდა ჩვენი გაშვება? თუ მას ავუხსნით, რომ კონგრესზე ნასწავლი გვეხმარება, პატიოსანი, გულმოდგინე და სანდო თანამშრომლები ვიყოთ, მისგან შეიძლება დადებითი პასუხი მივიღოთ. გარდა ამისა, თუ ოჯახის ურწმუნო წევრები გვყავს, ჩვენი მხრიდან სიყვარულის გამოვლენა იქნება, თუ რაც შეიძლება მალე შევატყობინებთ, რომ კონგრესზე დასწრებას ვაპირებთ.
4 გამოიყენეთ სასტუმროს ოთახის დასაჯავშნად „შემოთავაზებული დასაბინავებელი ადგილების სია“: ადგილობრივმა დაბინავების განყოფილებამ გასული შვიდი თვე საოლქო კონგრესის დელეგატების დასაბინავებელი ადგილების ძებნას მოანდომა. მალე თქვენი კრება მიიღებს შემოთავაზებული დასაბინავებელი ადგილების სიას, რომელიც საინფორმაციო დაფაზე უნდა გამოიკრას. წიგნის შესწავლის ხელმძღვანელებს შეუძლიათ ამ სიის ასლი გააკეთონ თავიანთი ჯგუფებისთვის მხოლოდ იმ შემთხვევაში, თუ იმ კვირაში, როდესაც კონგრესზე მიწვევის წერილი უნდა წაკითხულიყო, კრება ორდღიან სარაიონო კონგრესს ესწრება. მაგრამ ამ შემთხვევაშიც კი შემოთავაზებული დასაბინავებელი ადგილების სიის ასლი არ უნდა გაკეთდეს ცალკეული მაუწყებლებისთვის.
5 შეეცადე, რომ მე-4 გვერდზე მოცემულ ჩარჩოში ჩამოთვლილი რჩევების თანახმად დაჯავშნო ოთახი. სპეციალურად იმ მაუწყებლებისთვის, რომლებსაც შეზღუდული თანხები აქვთ, დაბინავების განყოფილება მოლაპარაკებას აწარმოებს საერთო საცხოვრებლებსა თუ სხვა შენობებში იაფი დასაბინავებელი ადგილების დასაქირავებლად. თუმცა ასეთ დაწესებულებებში ცხოვრება იაფი ჯდება, ჩვეულებრივ, იქ არ არის კარგი საცხოვრებელი პირობები და კარგად დასვენების საშუალება.
6 აქედან გამომდინარე, მრავალი ოჯახი თუ კრების ცალკეული წევრი წლის განმავლობაში გარკვეულ თანხას გადადებს, რათა კონგრესზე დასასწრებად სასტუმროში ოთახი დაიქირავონ. ამგვარად მათ შეუძლიათ დაფარონ გზისა და სასტუმროს ხარჯები, სადაც მათ კონგრესის ყოველი დღის შემდეგ კარგად დასვენების საშუალება ეძლევათ. საცხოვრებელი პირობები მნიშვნელოვანია, რადგან მასზეა დამოკიდებული, თუ როგორ მივიღებთ კონგრესზე სულიერ საზრდოს და ვისიამოვნებთ და-ძმებთან ურთიერთობით.
7 დაბინავების განყოფილება ცდილობს მოძებნოს ისეთი საცხოვრებლები, რომლებიც შეესაბამება განცხადებაში მოცემულ მოთხოვნებს. ამ მხრივ მათ დიდ დახმარებას უწევენ ის და-ძმები, რომლებიც მზად არიან თავიანთ ბინებში მიიღონ კონგრესის დელეგატები. თუ თქვენ იმ ქალაქში ცხოვრობთ, სადაც საოლქო კონგრესი უნდა ჩატარდეს და მზად ხართ, ბინაში მიიღოთ დელეგატები, ბლანკში „ბინები“ (CO-4), რომელსაც კრების მდივანი მოგცემთ, მიუთითეთ მნიშვნელოვანი დეტალები, კერძოდ, უზრუნველყოფთ თუ არა სტუმარს თეთრეულით, საკვებით და ასე შემდეგ.
8 განსაკუთრებული საჭიროების მქონე პირებზე ზრუნვა: თქვენ კრებაში ხომ არ ესაჭიროება ვინმეს დახმარება, კონგრესს რომ დაესწროს? განსაკუთრებული საჭიროებების მქონე ხანდაზმულებზე, ინვალიდებსა თუ სრული დროით მსახურებზე, ძირითადად, მათმა ქრისტიანმა ნათესავებმა უნდა იზრუნონ. მაგრამ თუ უხუცესებმა ან კრების სხვა წევრებმა იციან, რომ მათ განსაკუთრებული დახმარება სჭირდებათ, შეუძლიათ სიყვარულით დაეხმარონ.
9 კრების სამსახურებრივი კომიტეტი იმსჯელებს მაუწყებლების მიერ შევსებული ბლანკის თაობაზე, რომელიც განსაკუთრებული საჭიროებების მქონეთა დაბინავებას ეხება. ბლანკში მოცემული მითითებების გათვალისწინებით სამსახურებრივმა კომიტეტმა უნდა განსაზღვროს, შეიძლება თუ არა ამ განცხადებების ადგილობრივად დაკმაყოფილება. ეს განცხადება გათვალისწინებულია მხოლოდ სამაგალითო მაუწყებლებისთვის, რომელთა ბავშვებიც კარგი ყოფაქცევით გამოირჩევიან. თუ განსაკუთრებული საჭიროების მქონე მაუწყებელთან დაკავშირებით რაიმე კითხვები წამოიჭრება, დაბინავების განყოფილება დაუკავშირდება კრების მდივანს.
10 სხვა კონგრესებზე დასწრება: თუ გარემოება მოითხოვს, რომ იმ კონგრესს დაესწრო, სადაც მიწვეული არა ხარ და სასტუმროში ოთახი გჭირდება, გთხოვთ, ამის შესახებ დაელაპარაკო შენი კრების მდივანს. მას შეუძლია მოგცეს კონგრესის ორგანიზებაზე პასუხისმგებელი ბიუროს მისამართი, რომელიც მოცემულია ბლანკზე „განსაკუთრებული საჭიროებების მქონეთა განცხადება დაბინავებაზე“. თქვენი მოთხოვნა გააგზავნეთ მოცემულ მისამართზე. კონვერტზე დააწერეთ თქვენი მისამართი და დააკარით საფოსტო მარკა. თუ ქალაქში ერთზე მეტი კონგრესი ტარდება, განცხადებაში ზუსტად მიუთითეთ იმ კონგრესის ჩატარების თარიღი, რომელზეც გსურთ დასწრება. ამ ქალაქში არსებული დაბინავების განყოფილება გამოგიგზავნით კონგრესის დელეგატებისთვის შემოთავაზებული დასაბინავებელი ადგილების უახლეს სიას.
11 ჩვენ სანახაობად ვიქეცით: ამჩნევენ თუ არა ადამიანები სხვაობას იეჰოვას მოწმეებსა და ამ წუთისოფლის ხალხს შორის? უეჭველად. ყურადღება მიაქციეთ, რა შენიშნა სასტუმროს ადმინისტრაციამ: „ჩვენს ქალაქში ასეთი დიდი შეხვედრები ხშირად ტარდება ხოლმე, მაგრამ თქვენ ყველაზე კარგად თანამშრომლობთ ჩვენთან და თავაზიანებიც ხართ. გასულ კვირას ერთ რელიგიურ ჯგუფს ჰქონდა შეხვედრა. მათსა და თქვენს შორის ძალიან დიდი სხვაობაა. ვიცით, რომ ყოველთვის შეგვიძლია თქვენი დახმარებისა და თანამშრომლობის იმედი ვიქონიოთ“. განა ასეთი გამოხმაურების შემდეგ არ ვხედავთ, რა სასარგებლო გავლენას ახდენს ჩვენზე „მაღლიდან გარდმომავალი სიბრძნე“? (იაკ. 3:17). რადგან „სანახაობად გავხდით წუთისოფლისათვის“, დაე ჩვენი ყოფაქცევა ყოველთვის ჩვენი ღმერთის, იეჰოვას ღირსებისა და სიდიადის მაჩვენებელი იყოს (1 კორ. 4:9).
12 რადგან „წარმავალია წუთისოფლის სახე“, ამიტომ ჩვენ ვსაჭიროებთ საოლქო კონგრესებზე დასწრებას, რათა სულიერზე მოვახდინოთ კონცენტრირება (1 კორ. 7:31). კონგრესის ყოველი დღის პროგრამაზე დასწრებას შეიძლება ძალისხმევა დასჭირდეს, მაგრამ ამის გაკეთება ნამდვილად ღირს. 2003 წლის საოლქო კონგრესი „დიდება მივაგოთ ღმერთს“ იმისთვის მომზადდა, რომ განგვამტკიცოს მანამ, სანამ იეჰოვას რისხვის დღე თავს დაატყდება სატანის სისტემას. დაე არაფერს მივცეთ იმის საშუალება, რომ იეჰოვას მიერ ჩვენთვის მომზადებული პროგრამის მოსმენაში შეგვიშალოს ხელი (ეს. 51:4, 5).
[ჩარჩო 3 გვერდზე]
პროგრამის განრიგი
პარასკევი და შაბათი
9.30—17.00
კვირა
9.30—16.05
[ჩარჩო 4 გვერდზე]
როგორ დავჯავშნოთ ნომერი სასტუმროში
1. სამუშაო საათებში რაც შეიძლება მალე დარეკეთ სასტუმროებში. დარეკეთ იმ სასტუმროებში, რომელთა ტელეფონის ნომრები მოცემულია „შემოთავაზებული დასაბინავებელი ადგილების სიაში“.
2. სასტუმროს ადმინისტრაციას აცნობეთ, რომ იეჰოვას მოწმეთა კონგრესს დაესწრებით.
3. უთხარით, რომელ რიცხვში აპირებთ სასტუმროში დაბინავებას.
4. დარწმუნდით, რომ ნომერს იმ ფასში გთავაზობენ, რომელიც „შემოთავაზებული დასაბინავებელი ადგილების სიაშია“ მოცემული. უფრო ძვირ ფასებზე ნუ დათანხმდებით.
გთხოვთ:
◼ დაბინავდით მხოლოდ იმ სასტუმროებში, რომლებიც მოცემულია „შემოთავაზებული დასაბინავებელი ადგილების სიაში“.
◼ შეუკვეთეთ მხოლოდ ისეთი საცხოვრებელი, რომელიც ნამდვილად გამოგადგებათ.
◼ ნუ შეცვლით პირველ შეკვეთას.
◼ გახსოვდეთ, რომ ყველა ხარჯი თქვენ უნდა დაფაროთ.
◼ ხარჯები „შემოთავაზებული დასაბინავებელი ადგილების სიაში“ მოცემული ფასების მიხედვით განსაზღვრეთ.
როგორ დავაბინავოთ განსაკუთრებული საჭიროების მქონე პირები
1. ნუ მოითხოვთ ასეთი პირების დაბინავებას წერილით, ტელეფონით ან სხვა მსგავსი საშუალებით.
2. აკურატულად შეავსეთ ბლანკი „განსაკუთრებული საჭიროებების მქონეთა განცხადება დაბინავებაზე“.
3. თქვენი განცხადება მაშინვე შეავსეთ, როდესაც კრებაში გამოაცხადებენ, რომ მიღებულია „სავარაუდო დასაბინავებელი ადგილების სია“.
4. ითანამშრომლეთ თქვენ მიერ არჩეული საცხოვრებლის პატრონთან, მიჰყევით დღის განრიგს, დაიცავით სისუფთავე და ა. შ.