ᲤᲐᲡᲔᲑᲘᲡ ᲖᲠᲓᲐ – ᲠᲝᲒᲝᲠ ᲒᲐᲕᲐᲠᲗᲕᲐᲗ ᲗᲐᲕᲘ
თვალი გაუსწორეთ რეალობას
თუ ფასები ნელ-ნელა იმატებს, შეიძლება ეს ვერც კი შევნიშნოთ, მით უმეტეს, თუ ამას ჩვენი ხელფასის ზრდაც მოჰყვება. თუმცა როცა ფასების ზრდა ძალიან სწრაფად ხდება, ხელფასები კი იგივე რჩება, შეიძლება დიდი სტრესი შეგვექმნას და გამოუვალობის განცდაც დაგვეუფლოს, განსაკუთრებით იმ შემთხვევაში, თუ ოჯახი გვყავს სარჩენი.
ფაქტია, ფასების ზრდას ჩვენ ვერ შევაჩერებთ. თუმცა თუ თვალს გავუსწორებთ რეალობას, ეს ნამდვილად შეგვიმსუბუქებს მდგომარეობას.
ᲠᲐᲢᲝᲛ ᲣᲜᲓᲐ ᲒᲐᲕᲣᲡᲬᲝᲠᲝᲗ ᲗᲕᲐᲚᲘ ᲠᲔᲐᲚᲝᲑᲐᲡ
რატომ არის მნიშვნელოვანი, თვალი გავუსწოროთ იმ ფაქტს, რომ ფასების ზრდის შეჩერება ჩვენს ძალებს აღემატება?
გაგვიადვილდება სიმშვიდის შენარჩუნება. ეს, თავის მხრივ, დაგვეხმარება, საღი აზრი არ დავკარგოთ და კარგი გადაწყვეტილებები მივიღოთ.
ვეცდებით, კიდევ უფრო არ გავირთულოთ მდგომარეობა. მაგალითად, თავს არ ავარიდებთ გადასახადების გადახდას ან არამიზნობრივად არ დავხარჯავთ ფულს.
ოჯახში ფულის თემას საკამათოს არ გავხდით.
სწორად დავადგენთ პრიორიტეტებს, რაც დაგვეხმარება, განვსაზღვროთ, სინამდვილეში რა გვჭირდება და რაზე შეგვიძლია ეკონომიის გაკეთება.
ᲠᲘᲡᲘ ᲒᲐᲙᲔᲗᲔᲑᲐ ᲨᲔᲒᲘᲫᲚᲘᲐᲗ
მოერგეთ ახალ სიტუაციას. როდესაც ქვეყანაში მაღალი ინფლაციის დონეა, ყველანაირად უნდა ვეცადოთ ხარჯების შემცირებას. ზოგს უჭირს შექმნილ მდგომარეობასთან მორგება და არ იცვლის ცხოვრების წესს. ეს რაღაცით დინების საპირისპირო მიმართულებით ცურვას ჰგავს. ამ შემთხვევაში ადამიანი აუცილებლად გამოიფიტება. ფაქტია, ოჯახზე ფინანსურად ზრუნვა ძალიან მნიშვნელოვანია. თუმცა უმთავრესი ისაა, რომ დრო დავუთმოთ ერთმანეთს და სიყვარული და ყურადღება არ მოვაკლოთ.
თუ ვცდილობთ, უწინდელი ცხოვრების დონე შევინარჩუნოთ, გამოდის, რომ დინების საპირისპირო მიმართულებით ვცურავთ.