2 | წმინდა წერილებიდან მიღებული ნუგეში

ᲑᲘᲑᲚᲘᲐᲨᲘ ᲜᲐᲗᲥᲕᲐᲛᲘᲐ: „ყველაფერი, რაც წინათ დაიწერა, ჩვენ სასწავლებლად დაიწერა, რათა მოთმინებითა და წმინდა წერილებიდან მიღებული ნუგეშით გვქონდეს იმედი“ (ᲠᲝᲛᲐᲔᲚᲔᲑᲘ 15:4).

არსი

ბიბლიაში ჩაწერილი მანუგეშებელი აზრები ძალას გვმატებს და უარყოფითი ფიქრების მოშორებაში გვეხმარება. ღვთის სიტყვა უტყუარ იმედსაც გვისახავს, რომ ემოციური ტკივილი მალე წარსულს ჩაჰბარდება.

როგორ გვეხმარება ბიბლია

დროდადრო ყველას გვეუფლება უარყოფითი გრძნობები, მაგრამ მათ, ვისაც შფოთვითი აშლილობა ან დეპრესია ტანჯავს, ყოველდღე უწევთ ასეთ გრძნობებთან გამკლავება.

ბიბლიაში ბევრ დადებით და გამამხნევებელ აზრს ვხვდებით, რაც ნეგატიური ფიქრების მოშორებაში გვეხმარება (ფილიპელები 4:8). ღვთის სიტყვა გვანუგეშებს და გვამშვიდებს; შედეგად კი ემოციური წონასწორობის შენარჩუნება გვიადვილდება (ფსალმუნი 94:18, 19).
ბიბლიის დახმარებით შეგვიძლია გავუმკლავდეთ უღირსობის გრძნობას (ლუკა 12:6, 7).
ბიბლია გვარწმუნებს, რომ მარტო არ ვართ და ჩვენს შემოქმედს ბოლომდე ესმის ჩვენი (ფსალმუნი 34:18; 1 იოანე 3:19, 20).
ბიბლია გვპირდება, რომ ღმერთი სამუდამოდ წაშლის ცუდ მოგონებებს ჩვენი გონებიდან (ესაია 65:17; გამოცხადება 21:4). ეს იმედი ძალას გვმატებს, რომ ფარ-ხმალი არ დავყაროთ და უარყოფითმა ემოციებმა არ დაგვჯაბნოს.

ღვთის სიტყვის ძალა — ჯესიკა

რასთან მიწევს ბრძოლა

„25 წლის ასაკში ნევროზული შეტევა მქონდა და მძიმე დეპრესიის დიაგნოზი დამისვეს. წარსულის მტკივნეული მოგონებები მოსვენებას მიკარგავდა და თავს ვერაფერს ვუხერხებდი. ექიმებმა მითხრეს, რომ ჩემი დეპრესია უარყოფითი ფიქრებით იყო გამოწვეული, რაც ფსიქოლოგიურმა ტრავმებმა განაპირობა. მედიკამენტურ თერაპიასთან ერთად ფსიქოთერაპიაც დამჭირდა, რომ ამომეცნო უარყოფითი აზრები და მათთვის წინააღმდეგობა გამეწია“.

როგორ მეხმარება ბიბლია

„ღრმა დეპრესიის დროს პანიკური შეტევები, უკიდურესად ძლიერი შფოთვა და ინსომნია მტანჯავდა. ღამღამობით დამთრგუნველი ფიქრები მეძალებოდა და ძილს მიკრთობდა. 94-ე ფსალმუნის მე-19 მუხლში ნათქვამია, რომ როცა საფიქრალი მოსვენებას გვიკარგავს, ღმერთი გვანუგეშებს და გვამშვიდებს. ამიტომ ყოველთვის საწოლთან მედო ბიბლია და ბლოკნოტი, რომელშიც გამამხნევებელი მუხლები მქონდა ამოწერილი. როცა ვერ ვიძინებდი, ბიბლიას ვკითხულობდი და ღვთის აზრებით ვინუგეშებდი თავს.

ბიბლია მოგვიწოდებს, უკუვაგდოთ ისეთი აზრები, რაც ღვთის შეხედულებებს ეწინააღმდეგება. ადრე ვფიქრობდი, რომ უღირსი ვიყავი და სიყვარულს არ ვიმსახურებდი. შემდეგ გავიგე, რომ ასეთი თვალსაზრისი ეწინააღმდეგება ბიბლიას, რომელიც ღმერთს მოსიყვარულე და თანამგრძნობ მამად ახასიათებს. ღვთის სიტყვა გვარწმუნებს, რომ ის თითოეულ ჩვენგანზე ზრუნავს. თანდათან ვისწავლე ჩემი ფიქრების მართვა. ვცდილობ, საკუთარ თავს იეჰოვას თვალით ვუყურო, რაც მეხმარება, გავთავისუფლდე უარყოფითი ფიქრებისგან და დავძლიო უღირსობის გრძნობა.

მოუთმენლად ველი, როდის ჩაჰბარდება წარსულს მტკივნეული მოგონებები და არაჯანსაღი ფიქრები. იმის ცოდნა, რომ მენტალური პრობლემები აღარ იარსებებს, მეხმარება, ავიტანო ჩემი მდგომარეობა და მოთმინებით დაველოდო დროს, როცა დეპრესიისგან საბოლოოდ გავთავისუფლდები“.