Kwosana na Lũka

3 Mwakanĩ wa 15 wa kũsumbĩka kwa Kaisali Tivelio, yĩla Vondio Vilato waĩ ngavana wa Yutia, Elote * waĩ mũsumbĩ wa kĩsio kya Kalilii, Vilivu mwana-a-ĩthe waĩ mũsumbĩ wa kĩsio kya Itulea na Takakoniti, na Lisania waĩ mũsumbĩ wa kĩsio kya Avilene, 2 ĩvindanĩ ya mũnene wa athembi Anasi na ya Kaiava, ndeto ya Ngai nĩyamũkĩe Yoana mwana wa Nzekalia e weũnĩ.

3 Kwoou athi kĩsionĩ kĩla kyathyũlũlũkĩte Yolotani, akĩtavya andũ mavatiswe nĩ kana monanyʼe nĩmelilĩte nũndũ wa naĩ syoo nĩ kana maekewe, 4 o tondũ kũandĩkĩtwe ĩvukunĩ ya mwathani Isaia: “Wasya mũnene wa mũndũ ũkũneena weũnĩ, akyasya: ‘Seũvyai nzĩa ya Yeova! Lũngalyai nzĩa syake. 5 Myanda yonthe no nginya ĩlindwe, na iĩma syonthe vamwe na tũlĩma no nginya iananwʼe na nthĩ; nzĩa ila nthyoeku no nginya ilũngwe, na nzĩa ila syĩ maliko iyalalwa; 6 na mĩĩ yonthe ĩkoona * ũtangĩĩo wa Ngai.’” *

7 Na ambĩĩa kũneena na andũ aingĩ ala mookaa vala ũĩ nĩ kana amavatise, akĩmea: “Inywʼĩ ũsyao wa nzoka mbai, nũũ ũla ũmũtavĩtye kana nĩmũtonya kũkĩa ũthilĩku ũla wũkĩte? 8 Kwondũ wa ũu, syaai ũsyao ũkwonanyʼa nĩmwĩlilĩte. Mũikambĩĩe kũsũanĩa ngoonĩ syenyu mũkyasya, ‘Avalaamu nĩwe ĩthe waitũ.’ Nũndũ nĩmwĩa kana Ngai nũtonya kũmũkĩlĩlya Avalaamu syana kuma mavianĩ aa. 9 Kwa wʼo, yu ĩthoka nĩyiĩtwe matinanĩ ma mĩtĩ. Kwoou kĩla mũtĩ ũtasyaaa ũsyao mũseo ũkatemwa na kwĩkwʼa mwakinĩ.”

10 Na ĩkomano nĩyamũkũlasya: “Kwoou, twaĩle kwĩka ata?” 11 Nake aimasũngĩa: “Eka mũndũ ũla wĩ na ngũa ilĩ * anenge ũla ũte nayo, na eka ũla wĩ na kyaũya eke oou.” 12 O na aumĩthya ma koti nĩmookie kũvatiswa, na mamwĩa: “Mũmanyĩsya, twaĩle kwĩka ata?” 13 Nake amea: “Mũiketye * kĩndũ kĩvĩtũkĩte koti ũla ũtwʼĩtwe.” 14 O na asikalĩ nĩmamũkũlasya: “Twaĩle kwĩka ata?” Nake aimea: “Mũikathĩnyʼe * mũndũ kana kũmũsikatĩa ũndũ wa ũvũngũ, ĩndĩ ĩanĩwai nĩ kĩla mũnengetwe.” *

15 Na andũ nĩmekalaa meteelete na onthe nĩmasũanĩaa ũũ ngoonĩ syoo ĩũlũ wa Yoana, “Nĩvatonyeka akethĩwa nowe Klĩsto?” 16 Yoana amasũngĩaa ũũ onthe: “Nyie, a vakwa, nĩmũvatisa na kĩwʼũ, ĩndĩ ũla wĩ vinya kwĩ nyie nĩwũkĩte, ũla ndii sya iatũ syake ndaĩlĩtwe nĩ kũthasya. Akamũvatisa na veva mũtheu na mwaki. 17 Kĩũlũkya kyake kya kũũlũkya nganũ kĩ kwʼokonĩ kwake nĩ kana athesye vyũ kĩvũĩo kyake na ayũmbanyʼa nganũ ĩkũmbĩnĩ yake, ĩndĩ mavuti akamavĩvya na mwaki ũtatonya kũvowʼa.”

18 O na nĩwanenganie motao angĩ maingĩ na aendeea kũtavya andũ ũvoo mũseo. 19 Ĩndĩ Mũsumbĩ Elote, yĩla wakaniwʼe nĩ Yoana ĩũlũ wa Elotia mũka wa mwana-a-ĩthe na ĩũlũ wa meko onthe mathũku ala weekĩte, 20 nĩwongelile ũndũ ũũ o nawʼo mekonĩ asu onthe: Amũvingĩa Yoana yela.

21 Yĩla andũ onthe mavatisiwe, o nake Yesũ nĩwavatisiwe. Na aivoya, ĩtu yavingũka, 22 Na veva mũtheu wamũtheeea ũilye ta ĩvũĩ, na wasya wauma ĩtunĩ, ũkyasya: “Nue Mwana wakwa mwendwa; nĩnendeeawʼa nue.”