Meko ma Atũmwa

2 Na mũthenya wa Mboka ya Vendekosito ũendeee, onthe maĩ vandũ vamwe. 2 Na o mĩtũkĩ kweew’ĩka kelele kuma ĩtunĩ, ta wa kĩseve kĩkũuutana na vinya, na kyausũa nyũmba vala mailyĩ nthĩ. 3 Na moona nĩmĩ iilye ta sya mwaki na syanyaĩĩka, na syavũĩla kĩla ũmwe woo, 4 na onthe mausũwa nĩ veva mũtheu na mambĩĩa kũneena na ithyomo syĩ kĩvathũkany’o, o tondũ veva wamatonyethisye kũneena.

5 Na ĩvindanĩ yĩu Ayuti ala mamũkĩaa Ngai, kuma nthĩ syonthe ungu wa ĩtu, mekalaa Yelusaleme. 6 Kwoou yĩla wasya ũsu weew’ĩkie, ĩkomano nĩyoombanie na yaseng’a, nũndũ kĩla ũmwe waĩ ĩkomanonĩ yĩu eew’aa maineena kĩthyomo ĩ kyake. 7 Na nĩmaseng’ie mũno nginya masya: “Sisyai, onthe ala meũneena nĩ Akalilii, kana ti w’o? 8 Vatonyeka ata ũkethĩa kĩla ũmwe witũ eĩw’a maineena kĩthyomo ĩ kyake? * 9 Ithyĩ Avathiani, Ametia, Aelamu, ekali ma Mesovotamia, Yutia na Kavatosia, Vondo na kĩsio kya Asia, 10 Velikia na Vambilia, Misili na isio sya Livia ila syĩ vakuvĩ na Kulene, aeni kuma Lomi, Ayuti vamwe na andũ ala maalyũlĩte mũĩkĩĩo, 11 Akilete, na Aalavu—twĩmew’a maineena na ithyomo sitũ ĩũlũ wa maũndũ manene ma Ngai.” 12 Ĩĩ, onthe nĩmaseng’ie na masaanĩw’a, na makũlany’a ene kwa ene: “Ũndũ ũũ nĩ mwaũ?” 13 Ĩndĩ angĩ mamathekeea, na masya: “Mamilĩtwe nĩ mbinyu yĩ mũyo.” *

14 Ĩndĩ Vetelo aũngama vamwe na ala Ĩkũmi na Ũmwe na aneena namo na wasya mũnene, akyasya: “Andũ ma Yutia na ekali onthe ma Yelusaleme, ekai ũndũ ũũ ũmanyĩke kwenyu na mũyĩthukĩĩsya nesa ndeto syakwa. 15 Andũ aa kwa w’o ti amile, tondũ mũũsũanĩa, nũndũ yu nĩ ta saa itatũ sya kwakya. * 16 Ĩndĩ ũũ nĩw’o waneeniwe kwĩsĩla mwathani Yoeli: 17 ‘“Na mĩthenyanĩ ya mũminũkĩlyo,” easya ũu Ngai, “ngamatulũĩla veva wakwa andũ ma mĩthemba yonthe, na ana menyu na eĩtu menyu makathana, na anake menyu makoona mawoni, na atumĩa menyu makaota ndoto, 18 na mĩthenyanĩ ĩsu ngamatulũĩla veva wakwa aũme makwa ngombo na aka makwa ngombo, namo makathana. 19 Na ngoonany’a maũndũ ma ũsengy’o ĩũlũ ĩtunĩ na syama ĩũlũ wa nthĩ—nthakame na mwaki na matu ma syũki. 20 Syũa yĩkaalyũlwa yĩthĩwe kĩvindu na mwei wĩthĩwe nthakame mbee wa kũvika kwa ũla mũthenya mũnene na wa kũkumw’a wa Yeova. 21 Na kĩla mũndũ wĩkaĩlaa ĩsyĩtwa ya Yeova akatangĩĩwa.”’

22 “Andũ ma Isilaeli, ĩw’ai ndeto ii: Yesũ Mũnasaleti aĩ mũndũ woonaniw’e kũla mũĩ ũtheinĩ nĩ Ngai kwĩsĩla mawĩa manene na syama na maũndũ ma ũsengy’o ala Ngai weekie katĩ wenyu kwĩsĩla kwake, o tondũ inyw’ĩ mwĩsĩ. 23 Mũndũ ũsu, ũla wanenganiwe kwosana na kĩeleelo kya Ngai, na kwosana na ũndũ Ngai wamanyĩte kuma tene, nĩmwamũathĩĩie * mũtĩnĩ kwĩsĩla moko ma atũli ma mĩao, na mwamũaa. 24 Ĩndĩ Ngai nĩwamũthayũũkisye kwa kũmũthasya kuma kĩkw’ũnĩ, * nũndũ vayaĩ vatonyeka alũmw’e nĩkyo. 25 Nũndũ Ndaviti aĩtye ũũ ĩũlũ wake: ‘Nĩmwiaa Yeova mbee wakwa kĩla ĩvinda, nũndũ e kw’okonĩ kwakwa kwa aũme nĩ kana ndikathingithĩke. 26 Na nũndũ wa ũndũ ũsu ngoo yakwa nĩyatanie na ũĩmĩ wakwa watana mũno. Na ngekalaa nĩ na wĩkwatyo; 27 nũndũ ndũkandeka Mbũanĩ, * o na ndũketĩkĩlya mũĩkĩĩku waku one wanangĩko. 28 Nũtumĩte nĩmanya nzĩa sya thayũ; ũkambusũsya ũtanu mwingĩ nĩ mbee waku.’ *

29 “Ana-a-asa, ekai nĩneene nenyu na ũthasyo ĩũlũ wa ũmae waitũ Ndaviti, ũla wakwie na athikwa, na mbũa yake yĩ vamwe naitũ nginya ũmũnthĩ. 30 Nũndũ aĩ mwathani na nĩweesĩ kana Ngai nĩwamwathĩte na wĩvĩto kana ũmwe wa nzyawa * syake akekalĩla kĩvĩla kyake kya ũsumbĩ, 31 nĩwamanyĩte mbee na akaneenea ĩũlũ wa ũthayũũkyo wa Klĩsto, kana ndaatiwa Mbũanĩ, * o na mwĩĩ wake ndwaanangĩka. * 32 Ngai nĩwamũthayũũkisye Yesũ ũsu, na ithyonthe twĩ ngũsĩ sya ũndũ ũsu. 33 Kwoou, nũndũ nĩwaneneviw’e ekalw’a kw’okonĩ kwa aũme kwa Ngai na anengwa veva mũtheu ũla wathanĩtwe nĩ Asa, nũtulũile kĩla yu mũkwona na mũkwĩw’a. 34 O na kau Ndaviti ndaambata ĩtunĩ, we mwene aĩtye, ‘Yeova eeie Mwĩaĩi wakwa atĩĩ: “Ĩkala kw’okonĩ kwakwa kwa aũme 35 nginya yĩla ngamatw’a amaitha maku kavĩla ka nyaaĩ syaku.”’ 36 Kwoou, ekai nyũmba yonthe ya Isilaeli ĩmanye nesa vyũ kana Ngai nũmũtw’ĩkĩthĩtye Mwĩaĩi na Klĩsto, Yesũ ũla mwamũaĩe mũtĩnĩ.”

37 Na yĩla meewie ũu, matonywa ngoonĩ, na makũlya Vetelo na atũmwa ala angĩ atĩĩ: “Ana-a-asa, twaĩle kwĩka ata?” 38 Nake Vetelo amea: “Ĩlilei, na ekai kĩla ũmwe wenyu avatiswe ĩsyĩtwanĩ ya Yesũ Klĩsto kwondũ wa ũekeo wa naĩ syenyu, na nĩmũũkwata mũthĩnzĩo wa veva mũtheu. 39 Nũndũ watho nĩ kwenyu na kwa syana syenyu, na kwa onthe ala me kũasa mũno, onthe ala Yeova Ngai waitũ wĩmeta kwake.” 40 Na kwa ndeto ingĩ mbingĩ nĩwaumisye ũkũsĩ mwĩanĩu na aendeea kũmesũva, akĩmea: “Tangĩĩwai kuma nzyawanĩ ĩno nthyoeku.” 41 Kwoou ala meetĩkĩlile ndeto syake na ũtanu nĩmavatisiwe, na mũthenya ũsu andũ ta 3,000 mongeleka. 42 Na maendeea kwĩyumya momanyĩsyonĩ ma atũmwa, kwĩthĩwa na mũamba, kũya lĩu vamwe, na kũvoya.

43 Vate nzika, onthe nĩmambĩĩie kũkwatwa nĩ wia, na syama na maũndũ maingĩ ma ũsengy’o mambĩĩa kwĩkĩka kwĩsĩla atũmwa. 44 Onthe ala matw’ĩkie etĩkĩli maĩ vamwe, na syĩndũ ila maĩ nasyo syaĩ syoo me onthe, 45 na nĩmatesaa syĩndũ syoo na malĩ yoo na onthe maiaana kĩla makwata, kwosana na vata wa kĩla ũmwe. 46 Na kĩla mũthenya nĩmaendaa ĩkalũnĩ me na kĩeleelo kĩmwe, na nĩmaĩsaa lĩu me mĩsyĩnĩ yĩ kĩvathũkany’o na kũaana lĩu na ũtanu mwingĩ na ũthalĩku wa ngoo, 47 maimũkumya Ngai na kwĩtĩkĩlĩka nĩ andũ onthe. Na ĩvindanĩ o yĩu, Yeova aendeea kũmongeleela kĩla mũthenya andũ angĩ ala matangĩĩawa.