Kĩmena Kĩkavetangwa Vyũ!
O na ithyĩ ene tũkaveta kĩmena ngoonĩ sitũ, vai ũndũ twĩsa kwĩka tũkatuma ala angĩ maeka kũmenana. Andũ mate mavĩtyo nĩmathĩnaa nũndũ wa kũmenwa. Kwoou nũũ ũtonya kũvetanga kĩmena vyũ?
Yeova Ngai e weka no we ũtonya kwĩka ũu. Na ũu nĩwʼo Mbivilia yathanĩte ũkeka.—Nthimo 20:22.
NGAI AKAVETANGA VYŨ KĨLA KĨETAE KĨMENA
1. SATANI, ŨLA NĨWE NDEVILI. Tũi na nzika kana Satani, ũla mũlaĩka mũlei, nĩwe ũtumĩte kwĩthĩwa na kĩmena kingĩ. Ngai akamwananga vamwe na onthe ala me kĩmena take.—Savuli 37:38; Alomi 16:20.
2. NTHĨ ĨNO YA SATANI YUSĨE KĨMENA. Ngai akavetanga vyũ kyonthe kĩla kĩtumaa kwĩthĩwa na kĩmena. Kwa ngelekanyʼo, akavetanga atongoi ma siasa me ũlũsani na atongoi ma ndĩni ala matumaa andũ mamenana. O na ĩngĩ, akavetanga akũni ma viasala me ĩtomo, ũlũsani, na matũmĩaa andũ naĩ.—2 Vetelo 3:13.
3. NAĨ. Mbivilia yĩeleetye kana andũ onthe nĩmatiĩiwe naĩ, na kĩu kĩtumaa kaingĩ masũanĩa na kwĩka maũndũ mathũku. (Alomi 5:12) Ũndũ ũmwe mũthũku mekaa nĩ kwoveea ũthatu ngoonĩ na kũmena ala angĩ. Ngai akamatetheesya kũsinda mĩtuo ĩsu yonthe mĩthũku, na kĩu kĩkatuma kĩmena kĩthela vyũ.—Isaia 54:13.
MBIVILIA NĨYATHANĨTE NTHĨ ĨTAKETHĨWA NA KĨMENA
1. KŨIKETHĨWA ŨSILI ŨTE WA KATĨ. Ũsumbĩ wa Ngai ũkasumbĩka nthĩ yonthe kuma ĩtunĩ, nawʼo ũkekalaa tene na tene, na ũkavetanga vyũ ũsili ũte wa katĩ. (Ndanieli 2:44) Andũ maikavathũlanaa kana kũmenana. Ngai akavetanga vyũ ũsili ũte wa katĩ.—Luka 18:7.
2. KĨLA MŨNDŨ AKEKALAA NA MŨUO. Vai mũndũ ũkathĩnaa nũndũ wa ũngʼendu kana makaũ. (Savuli 46:9) Nthĩ ĩkeethĩwa vandũ vaseo va kwĩkala nũndũ no ala mendete mũuo me oka makatũa vo.—Savuli 72:7.
3. KĨLA MŨNDŨ AKEKALA TENE NA TENE MAŨNDŨ ME MASEO VYŨ. Onthe ala makatũa ĩũlũ wa nthĩ makenda atũi moo kuma ngoonĩ. (Mathayo 22:39) Vai mũndũ ũkemakĩaa, ũkakwatawa nĩ mesilya mataĩle, kana ũkalilikanaa maũndũ mathũku mamũkwatie. (Isaia 65:17) Ĩvindanĩ yĩu, kũikethĩwa mũndũ ũmenete ũngĩ, na kwoou andũ “makeetanʼya mũuonĩ mwingĩ.”—Savuli 37:11.
We no wende kwĩkala nthĩ ĩilye ũu? O na ũmũnthĩ, aingĩ nĩmaekete kĩmena nũndũ wa kũatĩĩa myolooto ya Mbivilia. (Savuli 37:8) Na ũu nowʼo Ngũsĩ sya Yeova ĩũlũ wa nthĩ yonthe syĩkĩte. O na kau maumĩte nthĩ syĩ kĩvathũkanyʼo na maatĩĩa syĩthĩo syĩ kĩvathũkanyʼo, mekalanasya ta andũ ma mũsyĩ ũmwe nũndũ nĩmendene na me ngwatanĩo.—Isaia 2:2-4.
Ngũsĩ sya Yeova no syende mũno kũũtetheesya ũmanye ũndũ ũtonya kwĩka wavathũlwa na weekwa maũndũ matosanĩte na ũsili wa katĩ. Kĩla ũkwĩmanyĩsya no kĩũtetheesye kũveta o kavola kwa kavola kĩmena kĩla ũtonya kwĩthĩwa nakyo, na ũyambĩĩa kwenda ala angĩ. Ũkeemanyĩsya ũndũ ũtonya kũkuaa andũ onthe nesa, o na ala mekwoneka ta mate mũvea kana ala me kĩmena. Weeka ũu, ũkekalaa wĩ mũtanu, na ũkekalanasya nesanga na ala angĩ. Na ũndũ ũla wa vata vyũ nĩ kana, ũkeemanyĩsya ũndũ ũtonya kwĩkala nthĩ ĩsumbĩkĩtwe nĩ Ũsumbĩ wa Ngai, vala kũtakethĩwa na kĩmena ĩngĩ.—Savuli 37:29.