Nĩ Kyaũ Kĩtusaa Ũndũ Ũkekala Ĩvinda Yũkĩte?
Aingĩ maĩkĩĩaa kana ve mavinya matenekee matusaa ũndũ ĩvinda yoo yũkĩte yĩkethĩwa yĩilye. Kĩu kĩtumaa meka kĩla mekwona ta kĩtonya kũtuma ĩvinda yoo yũkĩte yĩthĩwa yĩ ĩseango.
KĨLA AINGĨ MAĨKĨĨAA
KŨSOMA NDATA: Amwe maĩkĩĩaa kana kĩla kĩtusaa ũndũ ĩvinda yoo yũkĩte yĩkethĩwa yĩilye nĩ ũndũ ndata syavangĩkĩte mũthenya ũla masyaiwe. Kĩu kĩtumaa masoma ndeto ila iandĩkawa nĩ ala masomaa ndata nĩ kana mamanye kĩla kĩtonya kũmakwata, na ĩndĩ mayosa ĩtambya mesiĩĩanĩe na mũisyo kana mayĩka ũndũ maunĩke.
FENG SHUI: Namo angĩ maĩkĩĩaa kana kũseũvya nyũmba yoo kwa nzĩa ĩilye ũna no kũtume maunĩka. Lo Wing,a ũla wĩkalaa Hong Kong, aĩtye, “Mũndũ ũmwe wĩsene mũno na kĩthĩo kya feng shui ambĩie ngosa kamũvĩla kana ka ngilasi na ndikaia vandũ vana ndukanĩ yakwa, no nĩkwate mbesa mbingangĩ.”
KŨTHAITHA AA-ŨMAE MAITŨ ALA MAKWIE: Angĩ maĩkĩĩaa kana no nginya mausye aa-ũmae moo ala makwie kana ngai syoo nĩ kana mekale me asũvĩĩku na maiendeea nesa. Van, ũla wĩkalaa Vietnam, aĩtye, “Naĩkĩĩaa kana kũusya aa-ũmae makwa ala makwie no kũtume nĩkala nesa mũno oyu na ndyĩsa kũtanĩa ĩvinda yũkĩte nĩ na syana syakwa.”
KŨSYAWA NA MWĨĨ ŨNGĨ ĨTINA WA KŨKWʼA: Aingĩ maĩkĩĩaa kana mũndũ ekaa kũsyawa, aikwʼa, na aisyawa ĩngĩ, na kĩu kĩyĩkĩka ĩngĩ na ĩngĩ. Kĩu kĩtumaa maĩkĩĩa kana moseo kana mothũku ala mamakwataa maetawe nĩ maũndũ ala meekie thayũnĩ mũvĩtu.
Ĩndĩ aingĩ monaa maũndũ asu no mbano, na kwoou maimaĩkĩĩaa. O na ũu wĩ o vo, nĩmasomawa moko, makasoma ndata, makatũmĩa syĩndũ sya kwaũsya ta kaati, makekya mbũũ, na makeka maũndũ angĩ ta asu. Mekaa ũu maitatĩthya mone kana nĩmeũmanya ĩvinda yoo yũkĩte.
YO MĨĨKĨĨO ĨSU NĨTETHASYA?
Mo ala methĩawa na mĩĩkĩĩo ĩsu nĩmavotete kwĩkala nesa, na me na wĩkwatyo wa kũtanĩa ĩvinda yũkĩte?
Kwasũanĩa ngelekanyʼo ya Hào, ũla wĩkalaa Vietnam. Nĩ kana atetheke, nĩwambĩĩie kũsoma ndata, kũatĩĩa kĩthĩo kya feng shui, na kũthaithaa aa-ũmae ala makwie. Ĩndĩ we nĩwatethekie? Aĩtye, “Viasala wakwa nĩwaanangĩkie, nalika makoaninĩ manene, mũsyĩ wakwa walika ithokoo, na nakwatwa nĩ mawĩmakĩo maingĩ mũno.”
O nake Qiuming kuma Taiwan nĩwaĩkĩĩaa kana mũndũ akwʼa asyokaa akasyawa na mwĩĩ ũngĩ, nĩwaĩkĩĩaa ĩvuso, ala masomaa ndata, kĩthĩo kya feng shui, na nĩwathaithaa aa-ũmae ala makwie. Ĩndĩ ĩtina wa kũosya maũndũ asu nesa, aisye: “Nesie kũmanya aĩ momanyĩsyo na syĩthĩo isu iikwatĩanĩaa o na vanini, na nivũavũanasya mũndũ. Neethĩie kana kĩla kĩwetawa nĩ ala masomaa ndata kaingĩ kĩthĩawa kĩte kya wʼo. Na nasũanĩa ũmanyĩsyo wa kana mũndũ nũsyaawa na mwĩĩ ũngĩ ĩtina wa kũkwʼa, neethĩie ndũtethya nũndũ ethĩwa ndũlilikana kĩla kyaũkwatie thayũnĩ mũvĩtu, ũtonya ata kũvĩndũa mwĩkalĩle waku na kwĩkala nesa thayũnĩ ũla ũatĩĩe?”
“Nesie kũmanya aĩ momanyĩsyo na syĩthĩo isu iikwatĩanĩaa o na vanini, na nivũavũanasya mũndũ.”—QIUMING, TAIWAN
O tondũ Hào, Qiuming, na angĩ aingĩ meyoneete, ĩvuso, ndata, aa-ũmae maitũ ala makwie, kana mũndũ kũsyawa na mwĩĩ ũngĩ ĩtina wa kũkwʼa ti kwʼo kũtusaa ũndũ ũkekala ĩvinda yũkĩte. Ĩndĩ ũu nĩ kwasya kana vai ũndũ twĩka tũkatanĩa thayũ ĩvinda yũkĩte?
Aingĩ masũanĩaa kana kũsembanyʼa na kĩsomo na ũthwii no kũtume matanĩa thayũ ĩvinda yũkĩte. Ĩndĩ kwĩthĩĩtwe ata kwa amwe ala mekĩte ũu?
a Kĩlungunĩ kĩĩ na ila ingĩ iatĩĩe, masyĩtwa amwe nĩ mavĩndũe.
b Ndeto isu ikwatĩkanaa Maandĩkonĩ Matheu ĩandĩkonĩ ya Akalatia 6:7. Syosanĩte na nthimo itũmĩawa mũno Asia. Kwa ngelekanyʼo, ĩmwe yaasya wavanda matikitiki, ũkaketha matikitiki; wavanda mboso, ũkaketha mboso.