Wendo wa Ngai Wĩkalaa Tene na Tene

1, 2. Nĩ kyaũ kĩtumaa ũmwenda Yeova Ngai?

WE NŨMWENDETE Ngai? Nũtonya kwĩthĩwa ũmwendete mũno nginya o na ũkatwʼa kwĩyumya ũmũthũkũmae. O na nũtonya kwĩthĩwa wonaa Ngai tawe Mũnyanyau ũla mũseo vyũ. Ĩndĩ o na ũtambĩte kũmwenda Yeova, we nĩwe wĩthĩawa e wa mbee kũkwenda. Na ũu nĩ wʼo nũndũ Mbivilia yaĩtye atĩĩ: “Twĩthĩawa na wendo, nĩkwĩthĩwa we nĩwe watwendie mbee.”​—1 Yoana 4:19.

² Kwasũanĩa nzĩa mbingĩ ila Yeova ũtũmĩaa kũtwonyʼa kana nũtwendete. Nũtũnengete nthĩ mbanake ya kũtũa na akatũnenga syĩndũ ila twendaa nĩ kana tũtanĩe thayũ. (Mathayo 5:45; Ũvuanyʼo 4:11) Endaa twĩthĩwe na ngwatanĩo nzeo vamwe nake, na kwoou nĩwĩkĩte mĩvango mĩseo nĩ kana atũtetheesye tũmũmanye. Yĩla tũũsoma Mbivilia, twĩthĩawa tũimwĩthukĩĩsya Yeova. Na yĩla tũũmũvoya, ethĩawa atwĩthukĩĩsye. (Savuli 65:2) Yeova nũtũtongoeasya na akatwĩkĩa vinya atũmĩĩte veva wake mũtheu. (Luka 11:13) O na nĩwatũmie Mwana wake ũla ũmwendete mũno kũũ nthĩ nĩ kana atũtangĩĩe kuma naĩnĩ na kĩkwʼũnĩ.​—Soma Yoana 3:16; Alomi 5:8.

3. Twaĩle kwĩka ata nĩ kana tũendeee kwĩthĩwa na ũnyanya mũseo vamwe na Yeova?

³ Kwatata kũvindĩĩsya ĩũlũ wa mũnyanyau ũla wa vakuvĩ vyũ, ũla ũlũmanasya naku kwĩ kũseo na kwĩ kũthũku. Nĩ kana mũendeee kwĩthĩwa na ũnyanya ta ũsu, no nginya wĩkĩe kĩthito. Ũu nowʼo twaĩle kwĩka nĩ kana tũendeee kũlũlũmĩĩlya ũnyanya witũ na Yeova, nũndũ nĩwe Mũnyanya ũla mũseo vyũ. Ũnyanya witũ vamwe nake no wĩkale tene na tene. Nĩkyo kĩtumi Mbivilia ĩtwĩaa “[twĩyĩkalye] ene wendonĩ wa Ngai.” (Yuta 21) Tũtonya kwĩka ũu ata? Mbivilia ĩsũngĩĩte ĩkasya: “Kũũ nĩkwʼo kũmwenda Ngai: tũkwatae mĩao yake; na mĩao yake ti mũio mũito.”​—1 Yoana 5:3.

“KŨŨ NĨKWʼO KŨMWENDA NGAI”

4, 5. Nĩ kyaũ kyatumie wambĩĩa kũmwenda Yeova?

⁴ We nũũlilikana ĩvinda yĩla wambĩĩie kũmwenda Yeova? Kwasũanĩa ũndũ weewie yĩla weemanyĩisye kana Yeova nĩwendaa wĩĩkala tene na tene yĩla ũkatwʼĩkĩthya maũndũ meũ ĩtunĩ na nthĩ.

⁵ Nĩweemanyĩisye maũndũ ala Yeova wĩkĩte nĩ kana eanĩsye ũndũ ũsu. O na nĩwamanyie kana Yeova nĩwanengie andũ mũthĩnzĩo wa vata mũno yĩla watũmie Mwana wake e ũmwe kũũ nthĩ. (Mathayo 20:28; Yoana 8:29; Alomi 5:12, 18) Yĩla wamanyie kana Yeova nũkwendete mũno, ngoo yaku nĩyakiitiwe, na ũu watuma o naku wambĩĩa kũmwenda.​—Soma 1 Yoana 4:9, 10.

6. Nĩ maũndũ meva matonya kwonanyʼa kana nĩwendete mũndũ? Nĩ maũndũ meva weekie yĩla wambĩĩie kũmwenda Ngai?

⁶ Ĩndĩ ndwaaĩka o kwĩwʼa wamwenda Ngai na waekela vau. Kwa ngelekanyʼo, yĩla wenda mũndũ, ve maũndũ angĩ wĩkaa eka o kũmwĩa “Nĩngwendete.” Wendo nũtumaa wĩka maũndũ ala meũmũtanĩthya. O ta ũu, kũmwenda Yeova nĩkwatumie wenda kwĩkala ũndũ we wendaa. Na o ũndũ wendo ũsu waendeeie kwongeleka, nĩvatonyeka ũkethĩwa weeyumisye ũmũthũkũme na wavatiswa. Ethĩwa nĩwavatisiwe, nĩwamwathie Yeova kana ũkamũthũkũmaa tene na tene. (Soma Alomi 14:7, 8.) Ũtonya kwĩka ata nĩ kana ũendeee kwĩkala kwosana na ũndũ wamwathie Yeova?

“TŨKWATAE MĨAO YAKE”

7. Ethĩwa nĩtũmwendete Yeova, tũkeekaa ata? Mĩao ĩmwe ũtũnengete nĩ yĩva?

⁷ Nũndũ nĩtũmwendete Yeova, ‘nĩtũkwataa mĩao yake.’ Twĩkaa ũu ata? Twonanasya kana nĩtũkwataa mĩao ya Yeova yĩla twamwĩwʼa. Twasoma Mbivilia, nĩtũmanyaa ũndũ Yeova wendaa twĩkale. Kwa ngelekanyʼo, nũtũtavĩtye kana nĩ ũthũku kũnywʼa mũno, kũya kana kũngʼea, kũkengana, kũmanyana kĩ-mwĩĩ na mũndũ tũtatwaanĩte nake, kana kũthaitha mũndũ kana kĩndũ kĩngĩ eka o we e weka.​—1 Akolintho 5:11; 6:18; 10:14; Aeveso 4:28; Akolosai 3:9.

8, 9. Tũtonya kũmanya ata ũndũ ũla Yeova ũkwenda twĩke ethĩwa Mbivilia ndĩ na mwĩao wĩ ũtheinĩ ũeleetye ũndũ ũsu? Nengane ngelekanyʼo.

⁸ Ĩndĩ nĩ kana tũmwendeesye Yeova, nĩtwaĩle kwĩka ũndũ ũngĩ eka o kũkwata mĩao yake. Na kĩtumi nũndũ, ndatũnengete mĩao mingĩ ĩeleetye kĩla ũndũ tũkomanaa nawʼo. Kwoou ve mavinda tũtonya kũlea kwona mwĩao wĩ Mbivilianĩ ũtũtavĩtye kĩla twaĩle kwĩka ũndũnĩ mũna. Vekala ũu, twaĩle kwĩka ata? (Aeveso 5:17) Mbivilia nĩyĩthĩawa na myolooto. Myolooto nĩ momanyĩsyo ma wʼo na mataalyũkaa ala matũtavasya ũndũ Yeova wonaa maũndũ. Yĩla twasoma Mbivilia, nĩtũmanyaa nesa ũndũ Yeova ũilye. Ũu nĩ kwasya kana no tũmanye ũndũ we ũsũanĩaa, na ũndũ ũmwe wonanasya kana nĩtwĩsĩ ũndũ ũsũanĩaa nĩ kwĩthĩwa tũtonya kũmanya maũndũ ala ũmenete na ala wendete.​—Soma Savuli 97:10; Nthimo 6:16-19; sisya Maelesyo ma Mũthya Na. 1, Myolooto.

⁹ Kwa ngelekanyʼo, nĩ kyaũ kĩtonya kũtũtetheesya kũnyuva kĩvĩndĩ kĩla tũkwĩloela televiseninĩ kana maũndũ ala tũũsisya Indanetinĩ? Yeova ndatwĩkĩĩe mĩao ĩũlũ wa ũndũ ũsu. Ĩndĩ myolooto ĩla ũtũmanyĩĩtye nĩtũtetheeasya kwĩka motwi maseo. Maũndũ maingĩ ma kwĩtanĩthya ala methĩawa kwʼo ũmũnthĩ, mausĩe ũngʼendu na ũlaalai. Yeova nũtũmĩaa Mbivilia kũtũmanyĩsya kana “ngoo yake nĩmenete . . . ũla wendete ũngʼendu,” na akasyoka akatwĩa kana “akasilĩla ilaalai.” (Savuli 11:5; Aevelania 13:4) Myolooto ĩsu ĩtonya kũtũtetheesya ata kwĩka motwi maseo? Yĩla twamanya kana Yeova nũmenete kĩndũ kana akyonaa kĩtaĩle, nĩtwaĩle kũekana nakyo vyũ.

10, 11. Nĩkĩ tũmwĩwʼaa Yeova?

¹⁰ Nĩkĩ tũmwĩwʼaa Yeova? Tũimwĩwʼaa aĩ nũndũ nĩtũũkĩa aitũkanyʼa kana nũndũ nĩtũũlika thĩnanĩ tweeka motwi mathũku. (Akalatia 6:7) Tũmwĩwʼaa nũndũ nĩtũmwendete. O tondũ syana syendaa kũtanĩthya ĩthe wasyo, ithyĩ nĩtwendete kũtanĩthya Ĩthe waitũ wa ĩtunĩ. Vaiĩ ũndũ ũngĩ ũtonya kũtũtanĩthya ta kũmanya kana Yeova nũtwendete!​—Savuli 5:12; Nthimo 12:2; sisya Maelesyo ma Mũthya Na. 2, Kwĩwʼa.

¹¹ Tũimwĩwʼaa Yeova o mavinda ala ne laisi kwĩka ũu, kana yĩla tũte na ũndũ ũngĩ twĩka. O na tũinyuvaa kũatĩĩa mĩao na myolooto ĩmwe yake na tũilea kũatĩĩa ĩngĩ. (Kũtũngĩlĩlwa Kwa Mĩao 12:32) Vandũ va ũu, tũmwĩwʼaa maũndũnĩ onthe o ta mũandĩki wa Savuli, ũla waisye: “Ngeetanĩthasya mĩaonĩ yaku, ĩla nendete.” (Savuli 119:47; Alomi 6:17) Twĩenda kwĩka o ta Noa, ũla woonanisye kana nũmwendete Yeova kwa kwĩka maũndũ onthe ala Yeova wamwĩaĩe. Mbivilia yaĩtye kana “ũla Ngai wamwĩaĩe, nĩwʼo wekie.” (Mwambĩlĩlyo 6:22) We no wende Yeova easya ũu ĩũlũ waku?

12. Tũtonya kwĩka ata nĩ kana tũmũtanĩthye Yeova?

¹² Yeova ewʼaa ata twamwĩwʼa? Mbivilia yaĩtye kana ‘nĩtũtanĩthasya ngoo yake.’ (Nthimo 11:20; 27:11) Kwasũanĩa ũndũ ũsu we! Aĩ yĩla tweethĩwa twĩ ewi nĩtũtanĩthasya Mũmbi wa syĩndũ syonthe! Ĩndĩ we ndatũlasimĩthasya kwĩka ũu. Vandũ va ũu, nũtũnengete ũthasyo wa kwĩnyuvĩa. Ũu wĩonanyʼa kana nĩtwĩthĩawa na ũthasyo wa kũnyuva twĩĩka kĩla kyaĩle kana twĩĩka kĩla kĩtaĩle. Yeova endaa tũmwonyʼe nĩtũmwendete kwa kwĩka motwi maseo, ala matonya kũtuma twĩkala twĩ atanu.​—Kũtũngĩlĩlwa Kwa Mĩao 30:15, 16, 19, 20; sisya Maelesyo ma Mũthya Na. 3, Ũthasyo wa Kwĩnyuvĩa.

“MĨAO YAKE TI MŨIO MŨITO”

13, 14. Nĩkĩ tũtonya kwasya kana mĩao ya Ngai ti mĩito ũndũ tũtamĩatĩĩa? Nengane ngelekanyʼo.

¹³ Nao nata tũkambĩĩa kwona mĩao ya Yeova ta myũmũ mũno ũkethĩa tũimĩatĩĩa? Kana nata tũkambĩĩa kwona ta ĩkũtũvata ũthasyo? Mbivilia yaĩtye atĩĩ: “Mĩao yake ti mũio mũito.” (1 Yoana 5:3) Maandĩko angĩ matũmĩaa ndeto ya Kĩkiliki ĩla ĩalyũlĩtwe “mũio mũito” kwonanyʼa mĩao ĩkũvinyĩĩa andũ, kana ĩkatũmĩwa kwonanyʼa andũ ala matongoeasya angĩ na kĩthũi kana meũmaũmĩsya. (Mathayo 23:4; Meko ma Atũmwa 20:29, 30) Mbivilia ya Kĩkamba kya ĩvinda yĩĩ ĩalyũlĩte ndeto isu atĩĩ: “Ti ũndũ wĩ vinya kũmĩatĩĩa.” Kwoou mĩao ya Yeova ti “mũio mũito” nũndũ vaiĩ ĩvinda wĩsa kũtwĩa twĩke ũndũ tũtatonya.

¹⁴ Kwa ngelekanyʼo, twasye wĩtetheesya mũnyanyau kũthama. Wasisya ũyona nĩwũmbanĩtye syĩndũ syake na akasyĩkĩa makotoninĩ. Katĩ wa makotoni asu, ve amwe mũndũ ũtonya kũkua e o weka, ĩndĩ angĩ no makuiwe nĩ andũ elĩ. We wĩona mũnyanyau ta ũkwĩa ũkue ĩkotoni yĩla yĩito wĩ weka? Ndesa ũkwĩa wĩke ũu! Nĩkĩ? Nũndũ ndekwenda ũyĩũmĩa. O ta mũnyanyau ũsu, Yeova ndesa kũtwĩa twĩke ũndũ wĩsĩ tũitonya. (Kũtũngĩlĩlwa Kwa Mĩao 30:11-14) We nũtũeleawa. “Nĩwĩsĩ wũmbe witũ; nũlilikanaa kana twĩ kĩtoo.”​—Savuli 103:14.

15. Nĩ kyaũ kĩũtũĩkĩĩthya kana mĩao ya Yeova no ĩtũtethye?

¹⁵ Mose eeie Aisilaeli kana Yeova amanengete mĩao nĩ kana ‘methĩwe na ũseo mavinda onthe,’ na mamĩatĩĩa mesaa kũendeea ‘kwĩthĩwa thayũ.’ (Kũtũngĩlĩlwa Kwa Mĩao 5:28-33; 6:24) Ndeto isu nitũkonetye ũmũnthĩ. Maũndũ onthe ala Yeova ũtwĩaa twĩke matumaa twĩkala twĩ atanu. (Soma Isaia 48:17.) Mavinda onthe Ĩthe waitũ, Yeova, nĩwĩthĩawa esĩ kĩla kĩtwaĩle. (Alomi 11:33) Mbivilia yaĩtye: “Ngai nĩ wendo.” (1 Yoana 4:8) Ũu wĩonanyʼa kana maũndũ onthe ala Yeova ũwetaa na ala wĩkaa methĩawa matongoewʼe nĩ wendo.

16. Twĩsĩ ata kana no tũmwĩwʼe Yeova o na kau twĩ ene naĩ na tũthyũlũlũkĩtwe nĩ andũ athũku?

¹⁶ Ndwĩthĩawa wĩ ũndũ wĩ laisi kũmwĩwʼa Ngai mavinda onthe. Na kĩtumi nũndũ twĩkalĩte nthĩ nthũku ĩsumbĩkĩtwe nĩ Ndevili. Nũtataa ũndũ ũtonya atume andũ meka maũndũ mathũku. (1 Yoana 5:19) O na ĩngĩ, no nginya twĩkĩe kĩthito tũkĩlye vinya mosũanĩo na mawendi mathũku ala tũtonya kwĩthĩwa namo nũndũ twĩ ene naĩ. Nĩtwaĩle kwĩka ũu nũndũ no matume tũtamwĩwʼa Ngai. (Alomi 7:21-25) Ĩndĩ nĩtũmwendete Yeova, na kwoou tũyĩsa kũemwa nĩ kwĩka kĩla kyaĩle. Nĩwonaa kĩthito kingĩ kĩla twĩkĩaa nĩ kana tũmwĩwʼe, na nũtũtetheeasya yĩla watũnenga veva wake mũtheu. (1 Samueli 15:22, 23; Meko ma Atũmwa 5:32) Veva mũtheu nũtumaa twĩthĩwa na ndaĩa ila itonya kũtũtetheesya kũmwĩwʼa Yeova.​—Akalatia 5:22, 23.

17, 18. (a) Nĩ maũndũ meva tũkwĩmanyĩsya ĩvukunĩ yĩĩ? (b) Kĩlungu kĩla kĩatĩĩe kĩneeneete ũndũ wĩva?

¹⁷ Ĩvuku yĩĩ nĩyĩũtũtetheesya kũmanya ũndũ tũtonya kwĩthĩwa na mwĩkalĩle ũla ũmwendeeasya Yeova. Nĩtũkwĩmanyĩsya ũndũ tũtonya kũtũmĩa myolooto yake ya mwĩkalĩle thayũnĩ witũ. Lilikana kana Yeova ndatũlasimĩthasya kũmwĩwʼa. Ĩndĩ yĩla twanyuva kũmwĩwʼa, nĩtwĩkalaa twĩ atanu na tũyĩthĩwa na wĩkwatyo mũseo mũno wa ĩvinda yũkĩte. Na ũndũ ũla wa vata vyũ, nĩ kana yĩla twamwĩwʼa Yeova twĩthĩawa tũimwonyʼa ũndũ tũmwendete mũno wĩana.​—Sisya Maelesyo ma Mũthya Na. 4, Myolooto ya Mwĩkalĩle.

¹⁸ Yeova nũtũnengete wasya wa ngoo nĩ kana atũtetheesye kũmanya ũseo na ũthũku. Yĩla twamanyĩsya wasya witũ wa ngoo, nũtũtetheeasya “tũkwatae mĩao yake.” Ĩndĩ no twĩkũlye-ĩ, ‘Wasya wa ngoo nĩ kyaũ, na tũtonya kũũmanyĩsya ata?’ Ekai twĩmanyĩsye.